(౩) అనాగతవారో

(క) అనులోమపుగ్గలో

౧౧౬. (క) యస్స రూపక్ఖన్ధో నిరుజ్ఝిస్సతి తస్స వేదనాక్ఖన్ధో నిరుజ్ఝిస్సతీతి? ఆమన్తా.

(ఖ) యస్స వా పన వేదనాక్ఖన్ధో నిరుజ్ఝిస్సతి తస్స రూపక్ఖన్ధో నిరుజ్ఝిస్సతీతి?

పచ్ఛిమభవికానం అరూపం ఉపపజ్జన్తానం యే చ అరూపం ఉపపజ్జిత్వా పరినిబ్బాయిస్సన్తి తేసం చవన్తానం తేసం వేదనాక్ఖన్ధో నిరుజ్ఝిస్సతి, నో చ తేసం రూపక్ఖన్ధో నిరుజ్ఝిస్సతి. ఇతరేసం తేసం వేదనాక్ఖన్ధో చ నిరుజ్ఝిస్సతి రూపక్ఖన్ధో చ నిరుజ్ఝిస్సతి.

(ఖ) అనులోమఓకాసో

౧౧౭. (క) యత్థ రూపక్ఖన్ధో నిరుజ్ఝిస్సతి తత్థ వేదనాక్ఖన్ధో నిరుజ్ఝిస్సతీతి?

అసఞ్ఞసత్తే తత్థ రూపక్ఖన్ధో నిరుజ్ఝిస్సతి, నో చ తత్థ వేదనాక్ఖన్ధో నిరుజ్ఝిస్సతి. పఞ్చవోకారే తత్థ రూపక్ఖన్ధో చ నిరుజ్ఝిస్సతి వేదనాక్ఖన్ధో చ నిరుజ్ఝిస్సతి.

(ఖ) యత్థ వా పన వేదనాక్ఖన్ధో నిరుజ్ఝిస్సతి తత్థ రూపక్ఖన్ధో నిరుజ్ఝిస్సతీతి?

అరూపే తత్థ వేదనాక్ఖన్ధో నిరుజ్ఝిస్సతి, నో చ తత్థ రూపక్ఖన్ధో నిరుజ్ఝిస్సతి. పఞ్చవోకారే తత్థ వేదనాక్ఖన్ధో చ నిరుజ్ఝిస్సతి రూపక్ఖన్ధో చ నిరుజ్ఝిస్సతి.

(గ) అనులోమపుగ్గలోకాసా

౧౧౮. (క) యస్స యత్థ రూపక్ఖన్ధో నిరుజ్ఝిస్సతి తస్స తత్థ వేదనాక్ఖన్ధో నిరుజ్ఝిస్సతీతి?

అసఞ్ఞసత్తానం తేసం తత్థ రూపక్ఖన్ధో నిరుజ్ఝిస్సతి, నో చ తేసం తత్థ వేదనాక్ఖన్ధో నిరుజ్ఝిస్సతి. పఞ్చవోకారానం తేసం తత్థ రూపక్ఖన్ధో చ నిరుజ్ఝిస్సతి వేదనాక్ఖన్ధో చ నిరుజ్ఝిస్సతి.

(ఖ) యస్స వా పన యత్థ వేదనాక్ఖన్ధో నిరుజ్ఝిస్సతి తస్స తత్థ రూపక్ఖన్ధో నిరుజ్ఝిస్సతీతి?

అరూపానం తేసం తత్థ వేదనాక్ఖన్ధో నిరుజ్ఝిస్సతి, నో చ తేసం తత్థ రూపక్ఖన్ధో నిరుజ్ఝిస్సతి. పఞ్చవోకారానం తేసం తత్థ వేదనాక్ఖన్ధో చ నిరుజ్ఝిస్సతి రూపక్ఖన్ధో చ నిరుజ్ఝిస్సతి.

(ఘ) పచ్చనీకపుగ్గలో

౧౧౯. (క) యస్స రూపక్ఖన్ధో న నిరుజ్ఝిస్సతి తస్స వేదనాక్ఖన్ధో న నిరుజ్ఝిస్సతీతి?

పచ్ఛిమభవికానం అరూపం ఉపపజ్జన్తానం యే చ అరూపం ఉపపజ్జిత్వా పరినిబ్బాయిస్సన్తి తేసం చవన్తానం తేసం రూపక్ఖన్ధో న నిరుజ్ఝిస్సతి, నో చ తేసం వేదనాక్ఖన్ధో న నిరుజ్ఝిస్సతి. పరినిబ్బన్తానం తేసం రూపక్ఖన్ధో చ న నిరుజ్ఝిస్సతి వేదనాక్ఖన్ధో చ న నిరుజ్ఝిస్సతి.

(ఖ) యస్స వా పన వేదనాక్ఖన్ధో న నిరుజ్ఝిస్సతి తస్స రూపక్ఖన్ధో న నిరుజ్ఝిస్సతీతి? ఆమన్తా.

(ఙ) పచ్చనీకఓకాసో

౧౨౦. (క) యత్థ రూపక్ఖన్ధో న నిరుజ్ఝిస్సతి తత్థ వేదనాక్ఖన్ధో న నిరుజ్ఝిస్సతీతి? నిరుజ్ఝిస్సతి.

(ఖ) యత్థ వా పన వేదనాక్ఖన్ధో న నిరుజ్ఝిస్సతి తత్థ రూపక్ఖన్ధో న నిరుజ్ఝిస్సతీతి? నిరుజ్ఝిస్సతి.

(చ) పచ్చనీకపుగ్గలోకాసా

౧౨౧. (క) యస్స యత్థ రూపక్ఖన్ధో న నిరుజ్ఝిస్సతి తస్స తత్థ వేదనాక్ఖన్ధో న నిరుజ్ఝిస్సతీతి?

అరూపానం తేసం తత్థ రూపక్ఖన్ధో న నిరుజ్ఝిస్సతి, నో చ తేసం తత్థ వేదనాక్ఖన్ధో న నిరుజ్ఝిస్సతి. పరినిబ్బన్తానం తేసం తత్థ రూపక్ఖన్ధో చ న నిరుజ్ఝిస్సతి వేదనాక్ఖన్ధో చ న నిరుజ్ఝిస్సతి.

(ఖ) యస్స వా పన యత్థ వేదనాక్ఖన్ధో న నిరుజ్ఝిస్సతి తస్స తత్థ రూపక్ఖన్ధో న నిరుజ్ఝిస్సతీతి?

అసఞ్ఞసత్తానం తేసం తత్థ వేదనాక్ఖన్ధో న నిరుజ్ఝిస్సతి, నో చ తేసం తత్థ రూపక్ఖన్ధో న నిరుజ్ఝిస్సతి. పరినిబ్బన్తానం తేసం తత్థ వేదనాక్ఖన్ధో చ న నిరుజ్ఝిస్సతి రూపక్ఖన్ధో చ న నిరుజ్ఝిస్సతి.