(౪) పచ్చుప్పన్నాతీతవారో
(క) అనులోమపుగ్గలో
౧౨౨. (క) యస్స రూపక్ఖన్ధో నిరుజ్ఝతి తస్స వేదనాక్ఖన్ధో నిరుజ్ఝిత్థాతి? ఆమన్తా.
(ఖ) యస్స వా పన వేదనాక్ఖన్ధో నిరుజ్ఝిత్థ తస్స రూపక్ఖన్ధో నిరుజ్ఝతీతి?
సబ్బేసం ఉపపజ్జన్తానం అరూపా చవన్తానం తేసం వేదనాక్ఖన్ధో నిరుజ్ఝిత్థ, నో చ తేసం రూపక్ఖన్ధో నిరుజ్ఝతి. పఞ్చవోకారా చవన్తానం అసఞ్ఞసత్తా చవన్తానం తేసం వేదనాక్ఖన్ధో చ నిరుజ్ఝిత్థ రూపక్ఖన్ధో చ నిరుజ్ఝతి.
౧౨౩. (క) యస్స వేదనాక్ఖన్ధో నిరుజ్ఝతి తస్స సఞ్ఞాక్ఖన్ధో నిరుజ్ఝిత్థాతి? ఆమన్తా.
(ఖ) యస్స వా పన సఞ్ఞాక్ఖన్ధో నిరుజ్ఝిత్థ తస్స వేదనాక్ఖన్ధో నిరుజ్ఝతీతి?
సబ్బేసం ఉపపజ్జన్తానం అసఞ్ఞసత్తా చవన్తానం తేసం సఞ్ఞాక్ఖన్ధో నిరుజ్ఝిత్థ, నో చ తేసం వేదనాక్ఖన్ధో నిరుజ్ఝతి. చతువోకారా పఞ్చవోకారా చవన్తానం తేసం సఞ్ఞాక్ఖన్ధో చ నిరుజ్ఝిత్థ వేదనాక్ఖన్ధో చ నిరుజ్ఝతి.
(ఖ) అనులోమఓకాసో
౧౨౪. (క) యత్థ రూపక్ఖన్ధో నిరుజ్ఝతి తత్థ వేదనాక్ఖన్ధో నిరుజ్ఝిత్థాతి?
అసఞ్ఞసత్తే తత్థ రూపక్ఖన్ధో నిరుజ్ఝతి, నో చ తత్థ వేదనాక్ఖన్ధో నిరుజ్ఝిత్థ. పఞ్చవోకారే తత్థ రూపక్ఖన్ధో చ నిరుజ్ఝతి వేదనాక్ఖన్ధో చ నిరుజ్ఝిత్థ.
(ఖ) యత్థ వా పన వేదనాక్ఖన్ధో నిరుజ్ఝిత్థ తత్థ రూపక్ఖన్ధో నిరుజ్ఝతీతి?
అరూపే తత్థ వేదనాక్ఖన్ధో నిరుజ్ఝిత్థ, నో చ తత్థ రూపక్ఖన్ధో నిరుజ్ఝతి. పఞ్చవోకారే తత్థ వేదనాక్ఖన్ధో చ నిరుజ్ఝిత్థ రూపక్ఖన్ధో చ నిరుజ్ఝతి.
౧౨౫. (క) యత్థ వేదనాక్ఖన్ధో నిరుజ్ఝతి తత్థ సఞ్ఞాక్ఖన్ధో నిరుజ్ఝిత్థాతి? ఆమన్తా.
(ఖ) యత్థ వా పన సఞ్ఞాక్ఖన్ధో నిరుజ్ఝిత్థ తత్థ వేదనాక్ఖన్ధో నిరుజ్ఝతీతి? ఆమన్తా.
(గ) అనులోమపుగ్గలోకాసా
౧౨౬. (క) యస్స యత్థ రూపక్ఖన్ధో నిరుజ్ఝతి తస్స తత్థ వేదనాక్ఖన్ధో నిరుజ్ఝిత్థాతి?
సుద్ధావాసే పరినిబ్బన్తానం అసఞ్ఞసత్తా చవన్తానం తేసం తత్థ రూపక్ఖన్ధో నిరుజ్ఝతి, నో చ తేసం తత్థ వేదనాక్ఖన్ధో నిరుజ్ఝిత్థ. ఇతరేసం పఞ్చవోకారా చవన్తానం తేసం తత్థ రూపక్ఖన్ధో చ నిరుజ్ఝతి వేదనాక్ఖన్ధో చ నిరుజ్ఝిత్థ.
(ఖ) యస్స వా పన యత్థ వేదనాక్ఖన్ధో నిరుజ్ఝిత్థ తస్స తత్థ రూపక్ఖన్ధో నిరుజ్ఝతీతి?
పఞ్చవోకారం ఉపపజ్జన్తానం అరూపానం తేసం తత్థ వేదనాక్ఖన్ధో నిరుజ్ఝిత్థ, నో చ తేసం తత్థ రూపక్ఖన్ధో నిరుజ్ఝతి. పఞ్చవోకారా చవన్తానం తేసం తత్థ వేదనాక్ఖన్ధో చ నిరుజ్ఝిత్థ రూపక్ఖన్ధో చ నిరుజ్ఝతి.
౧౨౭. (క) యస్స యత్థ వేదనాక్ఖన్ధో నిరుజ్ఝతి తస్స తత్థ సఞ్ఞాక్ఖన్ధో నిరుజ్ఝిత్థాతి?
సుద్ధావాసే పరినిబ్బన్తానం తేసం తత్థ వేదనాక్ఖన్ధో నిరుజ్ఝతి, నో చ తేసం తత్థ సఞ్ఞాక్ఖన్ధో నిరుజ్ఝిత్థ. ఇతరేసం చతువోకారా పఞ్చవోకారా చవన్తానం తేసం తత్థ వేదనాక్ఖన్ధో చ నిరుజ్ఝతి సఞ్ఞాక్ఖన్ధో చ నిరుజ్ఝిత్థ.
(ఖ) యస్స వా పన యత్థ సఞ్ఞాక్ఖన్ధో నిరుజ్ఝిత్థ తస్స తత్థ వేదనాక్ఖన్ధో నిరుజ్ఝతీతి?
చతువోకారం పఞ్చవోకారం ఉపపజ్జన్తానం తేసం తత్థ సఞ్ఞాక్ఖన్ధో నిరుజ్ఝిత్థ, నో చ తేసం తత్థ వేదనాక్ఖన్ధో నిరుజ్ఝతి. చతువోకారా పఞ్చవోకారా చవన్తానం తేసం తత్థ సఞ్ఞాక్ఖన్ధో చ నిరుజ్ఝిత్థ వేదనాక్ఖన్ధో చ నిరుజ్ఝతి.
(ఘ) పచ్చనీకపుగ్గలో
౧౨౮. (క) యస్స రూపక్ఖన్ధో న నిరుజ్ఝతి తస్స వేదనాక్ఖన్ధో న నిరుజ్ఝిత్థాతి? నిరుజ్ఝిత్థ.
(ఖ) యస్స వా పన వేదనాక్ఖన్ధో న నిరుజ్ఝిత్థ తస్స రూపక్ఖన్ధో న నిరుజ్ఝతీతి? నత్థి.
౧౨౯. (క) యస్స వేదనాక్ఖన్ధో న నిరుజ్ఝతి తస్స సఞ్ఞాక్ఖన్ధో న నిరుజ్ఝిత్థాతి? నిరుజ్ఝిత్థ.
(ఖ) యస్స వా పన సఞ్ఞాక్ఖన్ధో న నిరుజ్ఝిత్థ తస్స వేదనాక్ఖన్ధో న నిరుజ్ఝతీతి? నత్థి.
(ఙ) పచ్చనీకఓకాసో
౧౩౦. యత్థ రూపక్ఖన్ధో న నిరుజ్ఝతి (యత్థకం పరిపుణ్ణం కాతబ్బం).
(చ) పచ్చనీకపుగ్గలోకాసా
౧౩౧. (క) యస్స యత్థ రూపక్ఖన్ధో న నిరుజ్ఝతి తస్స తత్థ వేదనాక్ఖన్ధో న నిరుజ్ఝిత్థాతి?
పఞ్చవోకారం ఉపపజ్జన్తానం అరూపానం తేసం తత్థ రూపక్ఖన్ధో న నిరుజ్ఝతి, నో చ తేసం తత్థ వేదనాక్ఖన్ధో న నిరుజ్ఝిత్థ. సుద్ధావాసం ఉపపజ్జన్తానం అసఞ్ఞసత్తం ఉపపజ్జన్తానం తేసం తత్థ రూపక్ఖన్ధో చ న నిరుజ్ఝతి వేదనాక్ఖన్ధో చ న నిరుజ్ఝిత్థ.
(ఖ) యస్స వా పన యత్థ వేదనాక్ఖన్ధో న నిరుజ్ఝిత్థ తస్స తత్థ రూపక్ఖన్ధో న నిరుజ్ఝతీతి?
సుద్ధావాసే పరినిబ్బన్తానం అసఞ్ఞసత్తా చవన్తానం తేసం తత్థ వేదనాక్ఖన్ధో న నిరుజ్ఝిత్థ, నో చ తేసం తత్థ రూపక్ఖన్ధో న నిరుజ్ఝతి. సుద్ధావాసం ఉపపజ్జన్తానం అసఞ్ఞసత్తం ఉపపజ్జన్తానం తేసం తత్థ వేదనాక్ఖన్ధో చ న నిరుజ్ఝిత్థ రూపక్ఖన్ధో చ న నిరుజ్ఝతి.
౧౩౨. (క) యస్స యత్థ వేదనాక్ఖన్ధో న నిరుజ్ఝతి తస్స తత్థ సఞ్ఞాక్ఖన్ధో న నిరుజ్ఝిత్థాతి?
చతువోకారం పఞ్చవోకారం ఉపపజ్జన్తానం తేసం తత్థ వేదనాక్ఖన్ధో న నిరుజ్ఝతి, నో చ తేసం తత్థ సఞ్ఞాక్ఖన్ధో న నిరుజ్ఝిత్థ. సుద్ధావాసం ఉపపజ్జన్తానం అసఞ్ఞసత్తానం తేసం తత్థ వేదనాక్ఖన్ధో చ న నిరుజ్ఝతి సఞ్ఞాక్ఖన్ధో చ న నిరుజ్ఝిత్థ.
(ఖ) యస్స వా పన యత్థ సఞ్ఞాక్ఖన్ధో న నిరుజ్ఝిత్థ తస్స తత్థ వేదనాక్ఖన్ధో న నిరుజ్ఝతీతి?
సుద్ధావాసే పరినిబ్బన్తానం తేసం తత్థ సఞ్ఞాక్ఖన్ధో న నిరుజ్ఝిత్థ, నో చ తేసం తత్థ వేదనాక్ఖన్ధో న నిరుజ్ఝతి. సుద్ధావాసం ఉపపజ్జన్తానం అసఞ్ఞసత్తానం తేసం తత్థ సఞ్ఞాక్ఖన్ధో చ న నిరుజ్ఝిత్థ వేదనాక్ఖన్ధో చ న నిరుజ్ఝతి.