(౫) పచ్చుప్పన్నానాగతవారో
(క) అనులోమపుగ్గలో
౮౦. (క) యస్స రూపక్ఖన్ధో ఉప్పజ్జతి తస్స వేదనాక్ఖన్ధో ఉప్పజ్జిస్సతీతి?
పచ్ఛిమభవికానం పఞ్చవోకారం ఉపపజ్జన్తానం తేసం రూపక్ఖన్ధో ఉప్పజ్జతి, నో చ తేసం వేదనాక్ఖన్ధో ఉప్పజ్జిస్సతి. ఇతరేసం పఞ్చవోకారం ఉపపజ్జన్తానం అసఞ్ఞసత్తం ఉపపజ్జన్తానం తేసం రూపక్ఖన్ధో చ ఉప్పజ్జతి వేదనాక్ఖన్ధో చ ఉప్పజ్జిస్సతి.
(ఖ) యస్స వా పన వేదనాక్ఖన్ధో ఉప్పజ్జిస్సతి తస్స రూపక్ఖన్ధో ఉప్పజ్జతీతి?
సబ్బేసం చవన్తానం అరూపం ఉపపజ్జన్తానం తేసం వేదనాక్ఖన్ధో ఉప్పజ్జిస్సతి, నో చ తేసం రూపక్ఖన్ధో ఉప్పజ్జతి. పఞ్చవోకారం ఉపపజ్జన్తానం అసఞ్ఞసత్తం ఉపపజ్జన్తానం తేసం వేదనాక్ఖన్ధో చ ఉప్పజ్జిస్సతి రూపక్ఖన్ధో చ ఉప్పజ్జతి.
౮౧. (క) యస్స వేదనాక్ఖన్ధో ఉప్పజ్జతి తస్స సఞ్ఞాక్ఖన్ధో ఉప్పజ్జిస్సతీతి?
పచ్ఛిమభవికానం ఉపపజ్జన్తానం తేసం వేదనాక్ఖన్ధో ఉప్పజ్జతి, నో చ తేసం సఞ్ఞాక్ఖన్ధో ఉప్పజ్జిస్సతి. ఇతరేసం చతువోకారం పఞ్చవోకారం ఉపపజ్జన్తానం తేసం వేదనాక్ఖన్ధో చ ఉప్పజ్జతి సఞ్ఞాక్ఖన్ధో చ ఉప్పజ్జిస్సతి.
(ఖ) యస్స వా పన సఞ్ఞాక్ఖన్ధో ఉప్పజ్జిస్సతి తస్స వేదనాక్ఖన్ధో ఉప్పజ్జతీతి?
సబ్బేసం చవన్తానం అసఞ్ఞసత్తం ఉపపజ్జన్తానం తేసం సఞ్ఞాక్ఖన్ధో ఉప్పజ్జిస్సతి, నో చ తేసం వేదనాక్ఖన్ధో ఉప్పజ్జతి. చతువోకారం పఞ్చవోకారం ఉపపజ్జన్తానం తేసం సఞ్ఞాక్ఖన్ధో చ ఉప్పజ్జిస్సతి వేదనాక్ఖన్ధో చ ఉప్పజ్జతి.
(ఖ) అనులోమఓకాసో
౮౨. (క) యత్థ రూపక్ఖన్ధో ఉప్పజ్జతి తత్థ వేదనాక్ఖన్ధో ఉప్పజ్జిస్సతీతి?
అసఞ్ఞసత్తే తత్థ రూపక్ఖన్ధో ఉప్పజ్జతి, నో చ తత్థ వేదనాక్ఖన్ధో ఉప్పజ్జిస్సతి. పఞ్చవోకారే తత్థ రూపక్ఖన్ధో చ ఉప్పజ్జతి వేదనాక్ఖన్ధో చ ఉప్పజ్జిస్సతి.
(ఖ) యత్థ వా పన వేదనాక్ఖన్ధో ఉప్పజ్జిస్సతి తత్థ రూపక్ఖన్ధో ఉప్పజ్జతీతి?
అరూపే తత్థ వేదనాక్ఖన్ధో ఉప్పజ్జిస్సతి, నో చ తత్థ రూపక్ఖన్ధో ఉప్పజ్జతి. పఞ్చవోకారే తత్థ వేదనాక్ఖన్ధో చ ఉప్పజ్జిస్సతి రూపక్ఖన్ధో చ ఉప్పజ్జతి.
౮౩. (క) యత్థ వేదనాక్ఖన్ధో ఉప్పజ్జతి తత్థ సఞ్ఞాక్ఖన్ధో ఉప్పజ్జిస్సతీతి? ఆమన్తా.
(ఖ) యత్థ వా పన సఞ్ఞాక్ఖన్ధో ఉప్పజ్జిస్సతి తత్థ వేదనాక్ఖన్ధో ఉప్పజ్జతీతి? ఆమన్తా.
(గ) అనులోమపుగ్గలోకాసా
౮౪. (క) యస్స యత్థ రూపక్ఖన్ధో ఉప్పజ్జతి తస్స తత్థ వేదనాక్ఖన్ధో ఉప్పజ్జిస్సతీతి?
పచ్ఛిమభవికానం పఞ్చవోకారం ఉపపజ్జన్తానం అసఞ్ఞసత్తం ఉపపజ్జన్తానం తేసం తత్థ రూపక్ఖన్ధో ఉప్పజ్జతి, నో చ తేసం తత్థ వేదనాక్ఖన్ధో ఉప్పజ్జిస్సతి. ఇతరేసం పఞ్చవోకారం ఉపపజ్జన్తానం తేసం తత్థ రూపక్ఖన్ధో చ ఉప్పజ్జతి వేదనాక్ఖన్ధో చ ఉప్పజ్జిస్సతి.
(ఖ) యస్స వా పన యత్థ వేదనాక్ఖన్ధో ఉప్పజ్జిస్సతి తస్స తత్థ రూపక్ఖన్ధో ఉప్పజ్జతీతి?
పఞ్చవోకారా చవన్తానం అరూపానం తేసం తత్థ వేదనాక్ఖన్ధో ఉప్పజ్జిస్సతి, నో చ తేసం తత్థ రూపక్ఖన్ధో ఉప్పజ్జతి. పఞ్చవోకారం ఉపపజ్జన్తానం తేసం తత్థ వేదనాక్ఖన్ధో చ ఉప్పజ్జిస్సతి రూపక్ఖన్ధో చ ఉప్పజ్జతి.
౮౫. (క) యస్స యత్థ వేదనాక్ఖన్ధో ఉప్పజ్జతి తస్స తత్థ సఞ్ఞాక్ఖన్ధో ఉప్పజ్జిస్సతీతి?
పచ్ఛిమభవికానం ఉపపజ్జన్తానం తేసం తత్థ వేదనాక్ఖన్ధో ఉప్పజ్జతి, నో చ తేసం తత్థ సఞ్ఞాక్ఖన్ధో ఉప్పజ్జిస్సతి. ఇతరేసం చతువోకారం పఞ్చవోకారం ఉపపజ్జన్తానం తేసం తత్థ వేదనాక్ఖన్ధో చ ఉప్పజ్జతి సఞ్ఞాక్ఖన్ధో చ ఉప్పజ్జిస్సతి.
(ఖ) యస్స వా పన యత్థ సఞ్ఞాక్ఖన్ధో ఉప్పజ్జిస్సతి తస్స తత్థ వేదనాక్ఖన్ధో ఉప్పజ్జతీతి?
చతువోకారా పఞ్చవోకారా చవన్తానం తేసం తత్థ సఞ్ఞాక్ఖన్ధో ఉప్పజ్జిస్సతి, నో చ తేసం తత్థ వేదనాక్ఖన్ధో ఉప్పజ్జతి. చతువోకారం పఞ్చవోకారం ఉపపజ్జన్తానం తేసం తత్థ సఞ్ఞాక్ఖన్ధో చ ఉప్పజ్జిస్సతి వేదనాక్ఖన్ధో చ ఉప్పజ్జతి.
(ఘ) పచ్చనీకపుగ్గలో
౮౬. (క) యస్స రూపక్ఖన్ధో నుప్పజ్జతి తస్స వేదనాక్ఖన్ధో నుప్పజ్జిస్సతీతి?
సబ్బేసం చవన్తానం అరూపం ఉపపజ్జన్తానం తేసం రూపక్ఖన్ధో నుప్పజ్జతి, నో చ తేసం వేదనాక్ఖన్ధో నుప్పజ్జిస్సతి. పఞ్చవోకారే పరినిబ్బన్తానం అరూపే పచ్ఛిమభవికానం తేసం రూపక్ఖన్ధో చ నుప్పజ్జతి వేదనాక్ఖన్ధో చ నుప్పజ్జిస్సతి.
(ఖ) యస్స వా పన వేదనాక్ఖన్ధో నుప్పజ్జిస్సతి తస్స రూపక్ఖన్ధో నుప్పజ్జతీతి?
పచ్ఛిమభవికానం పఞ్చవోకారం ఉపపజ్జన్తానం తేసం వేదనాక్ఖన్ధో నుప్పజ్జిస్సతి, నో చ తేసం రూపక్ఖన్ధో నుప్పజ్జతి. పఞ్చవోకారే పరినిబ్బన్తానం అరూపే పచ్ఛిమభవికానం తేసం వేదనాక్ఖన్ధో చ నుప్పజ్జిస్సతి రూపక్ఖన్ధో చ నుప్పజ్జతి.
౮౭. (క) యస్స వేదనాక్ఖన్ధో నుప్పజ్జతి తస్స సఞ్ఞాక్ఖన్ధో నుప్పజ్జిస్సతీతి?
సబ్బేసం చవన్తానం అసఞ్ఞసత్తం ఉపపజ్జన్తానం తేసం వేదనాక్ఖన్ధో నుప్పజ్జతి, నో చ తేసం సఞ్ఞాక్ఖన్ధో నుప్పజ్జిస్సతి. పరినిబ్బన్తానం తేసం వేదనాక్ఖన్ధో చ నుప్పజ్జతి సఞ్ఞాక్ఖన్ధో చ నుప్పజ్జిస్సతి.
(ఖ) యస్స వా పన సఞ్ఞాక్ఖన్ధో నుప్పజ్జిస్సతి తస్స వేదనాక్ఖన్ధో నుప్పజ్జతీతి?
పచ్ఛిమభవికానం ఉపపజ్జన్తానం [పచ్ఛిమభవికానం పఞ్చవోకారం ఉపపజ్జన్తానం (సీ. స్యా.)] తేసం సఞ్ఞాక్ఖన్ధో నుప్పజ్జిస్సతి, నో చ తేసం వేదనాక్ఖన్ధో నుప్పజ్జతి. పరినిబ్బన్తానం తేసం సఞ్ఞాక్ఖన్ధో చ నుప్పజ్జిస్సతి వేదనాక్ఖన్ధో చ నుప్పజ్జతి.
(ఙ) పచ్చనీకఓకాసో
౮౮. (క) యత్థ రూపక్ఖన్ధో నుప్పజ్జతి తత్థ వేదనాక్ఖన్ధో నుప్పజ్జిస్సతీతి? ఉప్పజ్జిస్సతి.
(ఖ) యత్థ వా పన వేదనాక్ఖన్ధో నుప్పజ్జిస్సతి తత్థ రూపక్ఖన్ధో నుప్పజ్జతీతి? ఉప్పజ్జతి.
౮౯. (క) యత్థ వేదనాక్ఖన్ధో నుప్పజ్జతి తత్థ సఞ్ఞాక్ఖన్ధో నుప్పజ్జిస్సతీతి? ఆమన్తా.
(ఖ) యత్థ వా పన సఞ్ఞాక్ఖన్ధో నుప్పజ్జిస్సతి తత్థ వేదనాక్ఖన్ధో నుప్పజ్జతీతి? ఆమన్తా.
(చ) పచ్చనీకపుగ్గలోకాసా
౯౦. (క) యస్స యత్థ రూపక్ఖన్ధో నుప్పజ్జతి తస్స తత్థ వేదనాక్ఖన్ధో నుప్పజ్జిస్సతీతి?
పఞ్చవోకారా చవన్తానం అరూపానం తేసం తత్థ రూపక్ఖన్ధో నుప్పజ్జతి, నో చ తేసం తత్థ వేదనాక్ఖన్ధో నుప్పజ్జిస్సతి. పఞ్చవోకారే పరినిబ్బన్తానం అరూపే పచ్ఛిమభవికానం అసఞ్ఞసత్తా చవన్తానం తేసం తత్థ రూపక్ఖన్ధో చ నుప్పజ్జతి వేదనాక్ఖన్ధో చ నుప్పజ్జిస్సతి.
(ఖ) యస్స వా పన యత్థ వేదనాక్ఖన్ధో నుప్పజ్జిస్సతి తస్స తత్థ రూపక్ఖన్ధో నుప్పజ్జతీతి?
పచ్ఛిమభవికానం పఞ్చవోకారం ఉపపజ్జన్తానం అసఞ్ఞసత్తం ఉపపజ్జన్తానం తేసం తత్థ వేదనాక్ఖన్ధో నుప్పజ్జిస్సతి, నో చ తేసం తత్థ రూపక్ఖన్ధో నుప్పజ్జతి. పఞ్చవోకారే పరినిబ్బన్తానం అరూపే పచ్ఛిమభవికానం అసఞ్ఞసత్తా చవన్తానం తేసం తత్థ వేదనాక్ఖన్ధో చ నుప్పజ్జిస్సతి రూపక్ఖన్ధో చ నుప్పజ్జతి.
౯౧. (క) యస్స యత్థ వేదనాక్ఖన్ధో నుప్పజ్జతి తస్స తత్థ సఞ్ఞాక్ఖన్ధో నుప్పజ్జిస్సతీతి?
చతువోకారా పఞ్చవోకారా చవన్తానం తేసం తత్థ వేదనాక్ఖన్ధో నుప్పజ్జతి, నో చ తేసం తత్థ సఞ్ఞాక్ఖన్ధో నుప్పజ్జిస్సతి. పరినిబ్బన్తానం అసఞ్ఞసత్తానం తేసం తత్థ వేదనాక్ఖన్ధో చ నుప్పజ్జతి సఞ్ఞాక్ఖన్ధో చ నుప్పజ్జిస్సతి.
(ఖ) యస్స వా పన యత్థ సఞ్ఞాక్ఖన్ధో నుప్పజ్జిస్సతి తస్స తత్థ వేదనాక్ఖన్ధో నుప్పజ్జతీతి?
పచ్ఛిమభవికానం ఉపపజ్జన్తానం తేసం తత్థ సఞ్ఞాక్ఖన్ధో నుప్పజ్జిస్సతి, నో చ తేసం తత్థ వేదనాక్ఖన్ధో నుప్పజ్జతి. పరినిబ్బన్తానం అసఞ్ఞసత్తానం తేసం తత్థ సఞ్ఞాక్ఖన్ధో చ నుప్పజ్జిస్సతి వేదనాక్ఖన్ధో చ నుప్పజ్జతి.