(౬) అతీతానాగతవారో
(క) అనులోమపుగ్గలో
౯౨. (క) యస్స రూపక్ఖన్ధో ఉప్పజ్జిత్థ తస్స వేదనాక్ఖన్ధో ఉప్పజ్జిస్సతీతి?
పచ్ఛిమభవికానం తేసం రూపక్ఖన్ధో ఉప్పజ్జిత్థ, నో చ తేసం వేదనాక్ఖన్ధో ఉప్పజ్జిస్సతి. ఇతరేసం తేసం రూపక్ఖన్ధో చ ఉప్పజ్జిత్థ వేదనాక్ఖన్ధో చ ఉప్పజ్జిస్సతి.
(ఖ) యస్స వా పన వేదనాక్ఖన్ధో ఉప్పజ్జిస్సతి తస్స రూపక్ఖన్ధో ఉప్పజ్జిత్థాతి? ఆమన్తా.
౯౩. (క) యస్స వేదనాక్ఖన్ధో ఉప్పజ్జిత్థ తస్స సఞ్ఞాక్ఖన్ధో ఉప్పజ్జిస్సతీతి?
పచ్ఛిమభవికానం తేసం వేదనాక్ఖన్ధో ఉప్పజ్జిత్థ, నో చ తేసం సఞ్ఞాక్ఖన్ధో ఉప్పజ్జిస్సతి. ఇతరేసం తేసం వేదనాక్ఖన్ధో చ ఉప్పజ్జిత్థ సఞ్ఞాక్ఖన్ధో చ ఉప్పజ్జిస్సతి.
(ఖ) యస్స వా పన సఞ్ఞాక్ఖన్ధో ఉప్పజ్జిస్సతి తస్స వేదనాక్ఖన్ధో ఉప్పజ్జిత్థాతి? ఆమన్తా.
(ఖ) అనులోమఓకాసో
౯౪. (క) యత్థ రూపక్ఖన్ధో ఉప్పజ్జిత్థ తత్థ వేదనాక్ఖన్ధో ఉప్పజ్జిస్సతీతి?
అసఞ్ఞసత్తే తత్థ రూపక్ఖన్ధో ఉప్పజ్జిత్థ, నో చ తత్థ వేదనాక్ఖన్ధో ఉప్పజ్జిస్సతి. పఞ్చవోకారే తత్థ రూపక్ఖన్ధో చ ఉప్పజ్జిత్థ వేదనాక్ఖన్ధో చ ఉప్పజ్జిస్సతి.
(ఖ) యత్థ వా పన వేదనాక్ఖన్ధో ఉప్పజ్జిస్సతి తత్థ రూపక్ఖన్ధో ఉప్పజ్జిత్థాతి?
అరూపే తత్థ వేదనాక్ఖన్ధో ఉప్పజ్జిస్సతి, నో చ తత్థ రూపక్ఖన్ధో ఉప్పజ్జిత్థ. పఞ్చవోకారే తత్థ వేదనాక్ఖన్ధో చ ఉప్పజ్జిస్సతి రూపక్ఖన్ధో చ ఉప్పజ్జిత్థ.
౯౫. (క) యత్థ వేదనాక్ఖన్ధో ఉప్పజ్జిత్థ తత్థ సఞ్ఞాక్ఖన్ధో ఉప్పజ్జిస్సతీతి? ఆమన్తా.
(ఖ) యత్థ వా పన సఞ్ఞాక్ఖన్ధో ఉప్పజ్జిస్సతి తత్థ వేదనాక్ఖన్ధో ఉప్పజ్జిత్థాతి? ఆమన్తా.
(గ) అనులోమపుగ్గలోకాసా
౯౬. (క) యస్స యత్థ రూపక్ఖన్ధో ఉప్పజ్జిత్థ తస్స తత్థ వేదనాక్ఖన్ధో ఉప్పజ్జిస్సతీతి?
పఞ్చవోకారే పచ్ఛిమభవికానం అసఞ్ఞసత్తానం తేసం తత్థ రూపక్ఖన్ధో ఉప్పజ్జిత్థ, నో చ తేసం తత్థ వేదనాక్ఖన్ధో ఉప్పజ్జిస్సతి. ఇతరేసం పఞ్చవోకారానం తేసం తత్థ రూపక్ఖన్ధో చ ఉప్పజ్జిత్థ వేదనాక్ఖన్ధో చ ఉప్పజ్జిస్సతి.
(ఖ) యస్స వా పన యత్థ వేదనాక్ఖన్ధో ఉప్పజ్జిస్సతి తస్స తత్థ రూపక్ఖన్ధో ఉప్పజ్జిత్థాతి?
అరూపానం తేసం తత్థ వేదనాక్ఖన్ధో ఉప్పజ్జిస్సతి, నో చ తేసం తత్థ రూపక్ఖన్ధో ఉప్పజ్జిత్థ. పఞ్చవోకారానం తేసం తత్థ వేదనాక్ఖన్ధో చ ఉప్పజ్జిస్సతి రూపక్ఖన్ధో చ ఉప్పజ్జిత్థ.
౯౭. (క) యస్స యత్థ వేదనాక్ఖన్ధో ఉప్పజ్జిత్థ తస్స తత్థ సఞ్ఞాక్ఖన్ధో ఉప్పజ్జిస్సతీతి?
పచ్ఛిమభవికానం తేసం తత్థ వేదనాక్ఖన్ధో ఉప్పజ్జిత్థ, నో చ తేసం తత్థ సఞ్ఞాక్ఖన్ధో ఉప్పజ్జిస్సతి. ఇతరేసం చతువోకారానం పఞ్చవోకారానం తేసం తత్థ వేదనాక్ఖన్ధో చ ఉప్పజ్జిత్థ సఞ్ఞాక్ఖన్ధో చ ఉప్పజ్జిస్సతి.
(ఖ) యస్స వా పన యత్థ సఞ్ఞాక్ఖన్ధో ఉప్పజ్జిస్సతి తస్స తత్థ వేదనాక్ఖన్ధో ఉప్పజ్జిత్థాతి? ఆమన్తా.
(ఘ) పచ్చనీకపుగ్గలో
౯౮. (క) యస్స రూపక్ఖన్ధో నుప్పజ్జిత్థ తస్స వేదనాక్ఖన్ధో నుప్పజ్జిస్సతీతి? నత్థి.
(ఖ) యస్స వా పన వేదనాక్ఖన్ధో నుప్పజ్జిస్సతి తస్స రూపక్ఖన్ధో నుప్పజ్జిత్థాతి? ఉప్పజ్జిత్థ.
౯౯. (క) యస్స వేదనాక్ఖన్ధో నుప్పజ్జిత్థ తస్స సఞ్ఞాక్ఖన్ధో నుప్పజ్జిస్సతీతి? నత్థి.
(ఖ) యస్స వా పన సఞ్ఞాక్ఖన్ధో నుప్పజ్జిస్సతి తస్స వేదనాక్ఖన్ధో నుప్పజ్జిత్థాతి? ఉప్పజ్జిత్థ.
(ఙ) పచ్చనీకఓకాసో
౧౦౦. (క) యత్థ రూపక్ఖన్ధో నుప్పజ్జిత్థ తత్థ వేదనాక్ఖన్ధో నుప్పజ్జిస్సతీతి? ఉప్పజ్జిస్సతి.
(ఖ) యత్థ వా పన వేదనాక్ఖన్ధో నుప్పజ్జిస్సతి తత్థ రూపక్ఖన్ధో నుప్పజ్జిత్థాతి? ఉప్పజ్జిత్థ.
౧౦౧. (క) యత్థ వేదనాక్ఖన్ధో నుప్పజ్జిత్థ తత్థ సఞ్ఞాక్ఖన్ధో నుప్పజ్జిస్సతీతి? ఆమన్తా.
(ఖ) యత్థ వా పన సఞ్ఞాక్ఖన్ధో నుప్పజ్జిస్సతి తత్థ వేదనాక్ఖన్ధో నుప్పజ్జిత్థాతి? ఆమన్తా.
(చ) పచ్చనీకపుగ్గలోకాసా
౧౦౨. (క) యస్స యత్థ రూపక్ఖన్ధో నుప్పజ్జిత్థ తస్స తత్థ వేదనాక్ఖన్ధో నుప్పజ్జిస్సతీతి?
అరూపానం తేసం తత్థ రూపక్ఖన్ధో నుప్పజ్జిత్థ, నో చ తేసం తత్థ వేదనాక్ఖన్ధో నుప్పజ్జిస్సతి. సుద్ధావాసానం అరూపే పచ్ఛిమభవికానం తేసం తత్థ రూపక్ఖన్ధో చ నుప్పజ్జిత్థ వేదనాక్ఖన్ధో చ నుప్పజ్జిస్సతి.
(ఖ) యస్స వా పన యత్థ వేదనాక్ఖన్ధో నుప్పజ్జిస్సతి తస్స తత్థ రూపక్ఖన్ధో నుప్పజ్జిత్థాతి?
పఞ్చవోకారే పచ్ఛిమభవికానం అసఞ్ఞసత్తానం తేసం తత్థ వేదనాక్ఖన్ధో నుప్పజ్జిస్సతి, నో చ తేసం తత్థ రూపక్ఖన్ధో నుప్పజ్జిత్థ. సుద్ధావాసానం అరూపే పచ్ఛిమభవికానం తేసం తత్థ వేదనాక్ఖన్ధో చ నుప్పజ్జిస్సతి రూపక్ఖన్ధో చ నుప్పజ్జిత్థ.
౧౦౩. (క) యస్స యత్థ వేదనాక్ఖన్ధో నుప్పజ్జిత్థ తస్స తత్థ సఞ్ఞాక్ఖన్ధో నుప్పజ్జిస్సతీతి? ఆమన్తా.
(ఖ) యస్స వా పన యత్థ సఞ్ఞాక్ఖన్ధో నుప్పజ్జిస్సతి తస్స తత్థ వేదనాక్ఖన్ధో నుప్పజ్జిత్థాతి?
పచ్ఛిమభవికానం తేసం తత్థ సఞ్ఞాక్ఖన్ధో నుప్పజ్జిస్సతి, నో చ తేసం తత్థ వేదనాక్ఖన్ధో నుప్పజ్జిత్థ. సుద్ధావాసానం అసఞ్ఞసత్తానం తేసం తత్థ సఞ్ఞాక్ఖన్ధో చ నుప్పజ్జిస్సతి వేదనాక్ఖన్ధో చ నుప్పజ్జిత్థ.
ఉప్పాదవారో నిట్ఠితో.