(౪) పచ్చుప్పన్నాతీతవారో
(క) అనులోమపుగ్గలో
౬౮. (క) యస్స రూపక్ఖన్ధో ఉప్పజ్జతి తస్స వేదనాక్ఖన్ధో ఉప్పజ్జిత్థాతి? ఆమన్తా.
(ఖ) యస్స వా పన వేదనాక్ఖన్ధో ఉప్పజ్జిత్థ తస్స రూపక్ఖన్ధో ఉప్పజ్జతీతి?
సబ్బేసం చవన్తానం అరూపం ఉపపజ్జన్తానం తేసం వేదనాక్ఖన్ధో ఉప్పజ్జిత్థ, నో చ తేసం రూపక్ఖన్ధో ఉప్పజ్జతి. పఞ్చవోకారం ఉపపజ్జన్తానం అసఞ్ఞసత్తం ఉపపజ్జన్తానం తేసం వేదనాక్ఖన్ధో చ ఉప్పజ్జిత్థ రూపక్ఖన్ధో చ ఉప్పజ్జతి.
౬౯. (క) యస్స వేదనాక్ఖన్ధో ఉప్పజ్జతి తస్స సఞ్ఞాక్ఖన్ధో ఉప్పజ్జిత్థాతి? ఆమన్తా.
(ఖ) యస్స వా పన సఞ్ఞాక్ఖన్ధో ఉప్పజ్జిత్థ తస్స వేదనాక్ఖన్ధో ఉప్పజ్జతీతి?
సబ్బేసం చవన్తానం అసఞ్ఞసత్తం ఉపపజ్జన్తానం తేసం సఞ్ఞాక్ఖన్ధో ఉప్పజ్జిత్థ, నో చ తేసం వేదనాక్ఖన్ధో ఉప్పజ్జతి. చతువోకారం పఞ్చవోకారం ఉపపజ్జన్తానం తేసం సఞ్ఞాక్ఖన్ధో చ ఉప్పజ్జిత్థ వేదనాక్ఖన్ధో చ ఉప్పజ్జతి.
(ఖ) అనులోమఓకాసో
౭౦. (క) యత్థ రూపక్ఖన్ధో ఉప్పజ్జతి తత్థ వేదనాక్ఖన్ధో ఉప్పజ్జిత్థాతి?
అసఞ్ఞసత్తే తత్థ రూపక్ఖన్ధో ఉప్పజ్జతి, నో చ తత్థ వేదనాక్ఖన్ధో ఉప్పజ్జిత్థ. పఞ్చవోకారే తత్థ రూపక్ఖన్ధో చ ఉప్పజ్జతి వేదనాక్ఖన్ధో చ ఉప్పజ్జిత్థ.
(ఖ) యత్థ వా పన వేదనాక్ఖన్ధో ఉప్పజ్జిత్థ తత్థ రూపక్ఖన్ధో ఉప్పజ్జతీతి?
అరూపే తత్థ వేదనాక్ఖన్ధో ఉప్పజ్జిత్థ, నో చ తత్థ రూపక్ఖన్ధో ఉప్పజ్జతి. పఞ్చవోకారే తత్థ వేదనాక్ఖన్ధో చ ఉప్పజ్జిత్థ రూపక్ఖన్ధో చ ఉప్పజ్జతి.
౭౧. (క) యత్థ వేదనాక్ఖన్ధో ఉప్పజ్జతి తత్థ సఞ్ఞాక్ఖన్ధో ఉప్పజ్జిత్థాతి? ఆమన్తా.
(ఖ) యత్థ వా పన సఞ్ఞాక్ఖన్ధో ఉప్పజ్జిత్థ తత్థ వేదనాక్ఖన్ధో ఉప్పజ్జతీతి? ఆమన్తా.
(గ) అనులోమపుగ్గలోకాసా
౭౨. (క) యస్స యత్థ రూపక్ఖన్ధో ఉప్పజ్జతి తస్స తత్థ వేదనాక్ఖన్ధో ఉప్పజ్జిత్థాతి?
సుద్ధావాసం ఉపపజ్జన్తానం అసఞ్ఞసత్తం ఉపపజ్జన్తానం తేసం తత్థ రూపక్ఖన్ధో ఉప్పజ్జతి, నో చ తేసం తత్థ వేదనాక్ఖన్ధో ఉప్పజ్జిత్థ. ఇతరేసం పఞ్చవోకారం ఉపపజ్జన్తానం తేసం తత్థ రూపక్ఖన్ధో చ ఉప్పజ్జతి వేదనాక్ఖన్ధో చ ఉప్పజ్జిత్థ.
(ఖ) యస్స వా పన యత్థ వేదనాక్ఖన్ధో ఉప్పజ్జిత్థ తస్స తత్థ రూపక్ఖన్ధో ఉప్పజ్జతీతి?
పఞ్చవోకారా చవన్తానం అరూపానం తేసం తత్థ వేదనాక్ఖన్ధో ఉప్పజ్జిత్థ, నో చ తేసం తత్థ రూపక్ఖన్ధో ఉప్పజ్జతి. పఞ్చవోకారం ఉపపజ్జన్తానం తేసం తత్థ వేదనాక్ఖన్ధో చ ఉప్పజ్జిత్థ రూపక్ఖన్ధో చ ఉప్పజ్జతి.
౭౩. (క) యస్స యత్థ వేదనాక్ఖన్ధో ఉప్పజ్జతి తస్స తత్థ సఞ్ఞాక్ఖన్ధో ఉప్పజ్జిత్థాతి?
సుద్ధావాసం ఉపపజ్జన్తానం తేసం తత్థ వేదనాక్ఖన్ధో ఉప్పజ్జతి, నో చ తేసం తత్థ సఞ్ఞాక్ఖన్ధో ఉప్పజ్జిత్థ. ఇతరేసం చతువోకారం పఞ్చవోకారం ఉపపజ్జన్తానం తేసం తత్థ వేదనాక్ఖన్ధో చ ఉప్పజ్జతి సఞ్ఞాక్ఖన్ధో చ ఉప్పజ్జిత్థ.
(ఖ) యస్స వా పన యత్థ సఞ్ఞాక్ఖన్ధో ఉప్పజ్జిత్థ తస్స తత్థ వేదనాక్ఖన్ధో ఉప్పజ్జతీతి?
చతువోకారా పఞ్చవోకారా చవన్తానం తేసం తత్థ సఞ్ఞాక్ఖన్ధో ఉప్పజ్జిత్థ, నో చ తేసం తత్థ వేదనాక్ఖన్ధో ఉప్పజ్జతి. చతువోకారం పఞ్చవోకారం ఉపపజ్జన్తానం తేసం తత్థ సఞ్ఞాక్ఖన్ధో చ ఉప్పజ్జిత్థ వేదనాక్ఖన్ధో చ ఉప్పజ్జతి.
(ఘ) పచ్చనీకపుగ్గలో
౭౪. (క) యస్స రూపక్ఖన్ధో నుప్పజ్జతి తస్స వేదనాక్ఖన్ధో నుప్పజ్జిత్థాతి? ఉప్పజ్జిత్థ.
(ఖ) యస్స వా పన వేదనాక్ఖన్ధో నుప్పజ్జిత్థ తస్స రూపక్ఖన్ధో నుప్పజ్జతీతి? నత్థి.
౭౫. (క) యస్స వేదనాక్ఖన్ధో నుప్పజ్జతి తస్స సఞ్ఞాక్ఖన్ధో నుప్పజ్జిత్థాతి? ఉప్పజ్జిత్థ.
(ఖ) యస్స వా పన సఞ్ఞాక్ఖన్ధో నుప్పజ్జిత్థ తస్స వేదనాక్ఖన్ధో నుప్పజ్జతీతి? నత్థి.
(ఙ) పచ్చనీకఓకాసో
౭౬. (క) యత్థ రూపక్ఖన్ధో నుప్పజ్జతి తత్థ వేదనాక్ఖన్ధో నుప్పజ్జిత్థాతి? ఉప్పజ్జిత్థ.
(ఖ) యత్థ వా పన వేదనాక్ఖన్ధో నుప్పజ్జిత్థ తత్థ రూపక్ఖన్ధో నుప్పజ్జతీతి? ఉప్పజ్జతి.
౭౭. (క) యత్థ వేదనాక్ఖన్ధో నుప్పజ్జతి తత్థ సఞ్ఞాక్ఖన్ధో నుప్పజ్జిత్థాతి? ఆమన్తా.
(ఖ) యత్థ వా పన సఞ్ఞాక్ఖన్ధో నుప్పజ్జిత్థ తత్థ వేదనాక్ఖన్ధో నుప్పజ్జతీతి? ఆమన్తా.
(చ) పచ్చనీకపుగ్గలోకాసా
౭౮. (క) యస్స యత్థ రూపక్ఖన్ధో నుప్పజ్జతి తస్స తత్థ వేదనాక్ఖన్ధో నుప్పజ్జిత్థాతి?
పఞ్చవోకారా చవన్తానం అరూపానం తేసం తత్థ రూపక్ఖన్ధో నుప్పజ్జతి, నో చ తేసం తత్థ వేదనాక్ఖన్ధో నుప్పజ్జిత్థ. సుద్ధావాసే పరినిబ్బన్తానం అసఞ్ఞసత్తా చవన్తానం తేసం తత్థ రూపక్ఖన్ధో చ నుప్పజ్జతి వేదనాక్ఖన్ధో చ నుప్పజ్జిత్థ.
(ఖ) యస్స వా పన యత్థ వేదనాక్ఖన్ధో నుప్పజ్జిత్థ తస్స తత్థ రూపక్ఖన్ధో నుప్పజ్జతీతి?
సుద్ధావాసం ఉపపజ్జన్తానం అసఞ్ఞసత్తం ఉపపజ్జన్తానం తేసం తత్థ వేదనాక్ఖన్ధో నుప్పజ్జిత్థ, నో చ తేసం తత్థ రూపక్ఖన్ధో నుప్పజ్జతి. సుద్ధావాసే పరినిబ్బన్తానం అసఞ్ఞసత్తా చవన్తానం తేసం తత్థ వేదనాక్ఖన్ధో చ నుప్పజ్జిత్థ రూపక్ఖన్ధో చ నుప్పజ్జతి.
౭౯. (క) యస్స యత్థ వేదనాక్ఖన్ధో నుప్పజ్జతి తస్స తత్థ సఞ్ఞాక్ఖన్ధో నుప్పజ్జిత్థాతి?
చతువోకారా పఞ్చవోకారా చవన్తానం తేసం తత్థ వేదనాక్ఖన్ధో నుప్పజ్జతి, నో చ తేసం తత్థ సఞ్ఞాక్ఖన్ధో నుప్పజ్జిత్థ. సుద్ధావాసే పరినిబ్బన్తానం అసఞ్ఞసత్తానం తేసం తత్థ వేదనాక్ఖన్ధో చ నుప్పజ్జతి సఞ్ఞాక్ఖన్ధో చ నుప్పజ్జిత్థ.
(ఖ) యస్స వా పన యత్థ సఞ్ఞాక్ఖన్ధో నుప్పజ్జిత్థ తస్స తత్థ వేదనాక్ఖన్ధో నుప్పజ్జతీతి?
సుద్ధావాసం ఉపపజ్జన్తానం తేసం తత్థ సఞ్ఞాక్ఖన్ధో నుప్పజ్జిత్థ, నో చ తేసం తత్థ వేదనాక్ఖన్ధో నుప్పజ్జతి. సుద్ధావాసే పరినిబ్బన్తానం అసఞ్ఞసత్తానం తేసం తత్థ సఞ్ఞాక్ఖన్ధో చ నుప్పజ్జిత్థ వేదనాక్ఖన్ధో చ నుప్పజ్జతి.