(౩) అనాగతవారో
(క) అనులోమపుగ్గలో
౬౨. (క) యస్స రూపక్ఖన్ధో ఉప్పజ్జిస్సతి తస్స వేదనాక్ఖన్ధో ఉప్పజ్జిస్సతీతి? ఆమన్తా.
(ఖ) యస్స వా పన వేదనాక్ఖన్ధో ఉప్పజ్జిస్సతి తస్స రూపక్ఖన్ధో ఉప్పజ్జిస్సతీతి?
యే అరూపం ఉపపజ్జిత్వా పరినిబ్బాయిస్సన్తి తేసం వేదనాక్ఖన్ధో ఉప్పజ్జిస్సతి, నో చ తేసం రూపక్ఖన్ధో ఉప్పజ్జిస్సతి. ఇతరేసం తేసం వేదనాక్ఖన్ధో చ ఉప్పజ్జిస్సతి రూపక్ఖన్ధో చ ఉప్పజ్జిస్సతి.
(ఖ) అనులోమఓకాసో
౬౩. (క) యత్థ రూపక్ఖన్ధో ఉప్పజ్జిస్సతి తత్థ వేదనాక్ఖన్ధో ఉప్పజ్జిస్సతీతి?
అసఞ్ఞసత్తే తత్థ రూపక్ఖన్ధో ఉప్పజ్జిస్సతి, నో చ తత్థ వేదనాక్ఖన్ధో ఉప్పజ్జిస్సతి. పఞ్చవోకారే తత్థ రూపక్ఖన్ధో చ ఉప్పజ్జిస్సతి వేదనాక్ఖన్ధో చ ఉప్పజ్జిస్సతి.
(ఖ) యత్థ వా పన వేదనాక్ఖన్ధో ఉప్పజ్జిస్సతి తత్థ రూపక్ఖన్ధో ఉప్పజ్జిస్సతీతి?
అరూపే తత్థ వేదనాక్ఖన్ధో ఉప్పజ్జిస్సతి, నో చ తత్థ రూపక్ఖన్ధో ఉప్పజ్జిస్సతి. పఞ్చవోకారే తత్థ వేదనాక్ఖన్ధో చ ఉప్పజ్జిస్సతి రూపక్ఖన్ధో చ ఉప్పజ్జిస్సతి.
(గ) అనులోమపుగ్గలోకాసా
౬౪. (క) యస్స యత్థ రూపక్ఖన్ధో ఉప్పజ్జిస్సతి తస్స తత్థ వేదనాక్ఖన్ధో ఉప్పజ్జిస్సతీతి?
అసఞ్ఞసత్తానం తేసం తత్థ రూపక్ఖన్ధో ఉప్పజ్జిస్సతి, నో చ తేసం తత్థ వేదనాక్ఖన్ధో ఉప్పజ్జిస్సతి. పఞ్చవోకారానం తేసం తత్థ రూపక్ఖన్ధో చ ఉప్పజ్జిస్సతి వేదనాక్ఖన్ధో చ ఉప్పజ్జిస్సతి.
(ఖ) యస్స వా పన యత్థ వేదనాక్ఖన్ధో ఉప్పజ్జిస్సతి తస్స తత్థ రూపక్ఖన్ధో ఉప్పజ్జిస్సతీతి?
అరూపానం తేసం తత్థ వేదనాక్ఖన్ధో ఉప్పజ్జిస్సతి, నో చ తేసం తత్థ రూపక్ఖన్ధో ఉప్పజ్జిస్సతి. పఞ్చవోకారానం తేసం తత్థ వేదనాక్ఖన్ధో చ ఉప్పజ్జిస్సతి రూపక్ఖన్ధో చ ఉప్పజ్జిస్సతి.
(ఘ) పచ్చనీకపుగ్గలో
౬౫. (క) యస్స రూపక్ఖన్ధో నుప్పజ్జిస్సతి తస్స వేదనాక్ఖన్ధో నుప్పజ్జిస్సతీతి?
యే అరూపం ఉపపజ్జిత్వా పరినిబ్బాయిస్సన్తి తేసం రూపక్ఖన్ధో నుప్పజ్జిస్సతి, నో చ తేసం వేదనాక్ఖన్ధో నుప్పజ్జిస్సతి. పచ్ఛిమభవికానం తేసం రూపక్ఖన్ధో చ నుప్పజ్జిస్సతి వేదనాక్ఖన్ధో చ నుప్పజ్జిస్సతి.
(ఖ) యస్స వా పన వేదనాక్ఖన్ధో నుప్పజ్జిస్సతి తస్స రూపక్ఖన్ధో నుప్పజ్జిస్సతీతి? ఆమన్తా.
(ఙ) పచ్చనీకఓకాసో
౬౬. (క) యత్థ రూపక్ఖన్ధో నుప్పజ్జిస్సతి తత్థ వేదనాక్ఖన్ధో నుప్పజ్జిస్సతీతి? ఉప్పజ్జిస్సతి.
(ఖ) యత్థ వా పన వేదనాక్ఖన్ధో నుప్పజ్జిస్సతి తత్థ రూపక్ఖన్ధో నుప్పజ్జిస్సతీతి? ఉప్పజ్జిస్సతి.
(చ) పచ్చనీకపుగ్గలోకాసా
౬౭. (క) యస్స యత్థ రూపక్ఖన్ధో నుప్పజ్జిస్సతి తస్స తత్థ వేదనాక్ఖన్ధో నుప్పజ్జిస్సతీతి?
అరూపానం తేసం తత్థ రూపక్ఖన్ధో నుప్పజ్జిస్సతి, నో చ తేసం తత్థ వేదనాక్ఖన్ధో నుప్పజ్జిస్సతి. పచ్ఛిమభవికానం తేసం తత్థ రూపక్ఖన్ధో చ నుప్పజ్జిస్సతి వేదనాక్ఖన్ధో చ నుప్పజ్జిస్సతి.
(ఖ) యస్స వా పన యత్థ వేదనాక్ఖన్ధో నుప్పజ్జిస్సతి తస్స తత్థ రూపక్ఖన్ధో నుప్పజ్జిస్సతీతి?
అసఞ్ఞసత్తానం తేసం తత్థ వేదనాక్ఖన్ధో నుప్పజ్జిస్సతి, నో చ తేసం తత్థ రూపక్ఖన్ధో నుప్పజ్జిస్సతి. పచ్ఛిమభవికానం తేసం తత్థ వేదనాక్ఖన్ధో చ నుప్పజ్జిస్సతి రూపక్ఖన్ధో చ నుప్పజ్జిస్సతి.