(౨) అతీతవారో
(క) అనులోమపుగ్గలో
౫౬. (క) యస్స రూపక్ఖన్ధో ఉప్పజ్జిత్థ తస్స వేదనాక్ఖన్ధో ఉప్పజ్జిత్థాతి? ఆమన్తా.
(ఖ) యస్స వా పన వేదనాక్ఖన్ధో ఉప్పజ్జిత్థ తస్స రూపక్ఖన్ధో ఉప్పజ్జిత్థాతి? ఆమన్తా.
(ఖ) అనులోమఓకాసో
౫౭. (క) యత్థ రూపక్ఖన్ధో ఉప్పజ్జిత్థ తత్థ వేదనాక్ఖన్ధో ఉప్పజ్జిత్థాతి?
అసఞ్ఞసత్తే తత్థ రూపక్ఖన్ధో ఉప్పజ్జిత్థ, నో చ తత్థ వేదనాక్ఖన్ధో ఉప్పజ్జిత్థ. పఞ్చవోకారే తత్థ రూపక్ఖన్ధో చ ఉప్పజ్జిత్థ వేదనాక్ఖన్ధో చ ఉప్పజ్జిత్థ.
(ఖ) యత్థ వా పన వేదనాక్ఖన్ధో ఉప్పజ్జిత్థ తత్థ రూపక్ఖన్ధో ఉప్పజ్జిత్థాతి?
అరూపే తత్థ వేదనాక్ఖన్ధో ఉప్పజ్జిత్థ, నో చ తత్థ రూపక్ఖన్ధో ఉప్పజ్జిత్థ. పఞ్చవోకారే తత్థ వేదనాక్ఖన్ధో చ ఉప్పజ్జిత్థ రూపక్ఖన్ధో చ ఉప్పజ్జిత్థ.
(గ) అనులోమపుగ్గలోకాసా
౫౮. (క) యస్స యత్థ రూపక్ఖన్ధో ఉప్పజ్జిత్థ తస్స తత్థ వేదనాక్ఖన్ధో ఉప్పజ్జిత్థాతి?
అసఞ్ఞసత్తానం తేసం తత్థ రూపక్ఖన్ధో ఉప్పజ్జిత్థ, నో చ తేసం తత్థ వేదనాక్ఖన్ధో ఉప్పజ్జిత్థ. పఞ్చవోకారానం తేసం తత్థ రూపక్ఖన్ధో చ ఉప్పజ్జిత్థ వేదనాక్ఖన్ధో చ ఉప్పజ్జిత్థ.
(ఖ) యస్స వా పన యత్థ వేదనాక్ఖన్ధో ఉప్పజ్జిత్థ తస్స తత్థ రూపక్ఖన్ధో ఉప్పజ్జిత్థాతి?
అరూపానం తేసం తత్థ వేదనాక్ఖన్ధో ఉప్పజ్జిత్థ, నో చ తేసం తత్థ రూపక్ఖన్ధో ఉప్పజ్జిత్థ. పఞ్చవోకారానం తేసం తత్థ వేదనాక్ఖన్ధో చ ఉప్పజ్జిత్థ రూపక్ఖన్ధో చ ఉప్పజ్జిత్థ.
(ఘ) పచ్చనీకపుగ్గలో
౫౯. (క) యస్స రూపక్ఖన్ధో నుప్పజ్జిత్థ తస్స వేదనాక్ఖన్ధో నుప్పజ్జిత్థాతి? నత్థి.
(ఖ) యస్స వా పన వేదనాక్ఖన్ధో నుప్పజ్జిత్థ తస్స రూపక్ఖన్ధో నుప్పజ్జిత్థాతి? నత్థి.
(ఙ) పచ్చనీకఓకాసో
౬౦. (క) యత్థ రూపక్ఖన్ధో నుప్పజ్జిత్థ తత్థ వేదనాక్ఖన్ధో నుప్పజ్జిత్థాతి? ఉప్పజ్జిత్థ.
(ఖ) యత్థ వా పన వేదనాక్ఖన్ధో నుప్పజ్జిత్థ తత్థ రూపక్ఖన్ధో నుప్పజ్జిత్థాతి? ఉప్పజ్జిత్థ.
(చ) పచ్చనీకపుగ్గలోకాసా
౬౧. (క) యస్స యత్థ రూపక్ఖన్ధో నుప్పజ్జిత్థ తస్స తత్థ వేదనాక్ఖన్ధో నుప్పజ్జిత్థాతి?
అరూపానం తేసం తత్థ రూపక్ఖన్ధో నుప్పజ్జిత్థ, నో చ తేసం తత్థ వేదనాక్ఖన్ధో నుప్పజ్జిత్థ. సుద్ధావాసానం తేసం తత్థ రూపక్ఖన్ధో చ నుప్పజ్జిత్థ వేదనాక్ఖన్ధో చ నుప్పజ్జిత్థ.
(క) యస్స వా పన యత్థ వేదనాక్ఖన్ధో నుప్పజ్జిత్థ తస్స తత్థ రూపక్ఖన్ధో నుప్పజ్జిత్థాతి?
అసఞ్ఞసత్తానం తేసం తత్థ వేదనాక్ఖన్ధో నుప్పజ్జిత్థ, నో చ తేసం తత్థ రూపక్ఖన్ధో నుప్పజ్జిత్థ. సుద్ధావాసానం తేసం తత్థ వేదనాక్ఖన్ధో చ నుప్పజ్జిత్థ రూపక్ఖన్ధో చ నుప్పజ్జిత్థ.