(౨) మూలమూలనయో

౮౯. (క) యే కేచి నామా ధమ్మా, సబ్బే తే నామమూలమూలాతి?

నవేవ నామమూలమూలాని. అవసేసా నామా ధమ్మా న నామమూలమూలా.

(ఖ) యే వా పన నామమూలమూలా, సబ్బే తే ధమ్మా నామాతి? ఆమన్తా.

౯౦. (క) యే కేచి నామా ధమ్మా, సబ్బే తే నామమూలేన ఏకమూలమూలాతి?

అహేతుకం నామం నామమూలేన న ఏకమూలమూలం. సహేతుకం నామం నామమూలేన ఏకమూలమూలం.

(ఖ) యే వా పన నామమూలేన ఏకమూలమూలా, సబ్బే తే ధమ్మా నామాతి?

నామసముట్ఠానం రూపం నామమూలేన ఏకమూలమూలం, న నామం. నామం నామమూలేన ఏకమూలమూలఞ్చేవ నామఞ్చ.

౯౧. (క) యే కేచి నామమూలేన ఏకమూలమూలా ధమ్మా, సబ్బే తే నామమూలేన అఞ్ఞమఞ్ఞమూలమూలాతి?

మూలాని యాని ఏకతో ఉప్పజ్జన్తి నామమూలాని ఏకమూలమూలాని చేవ అఞ్ఞమఞ్ఞమూలమూలాని చ. అవసేసా నామమూలసహజాతా ధమ్మా నామమూలేన ఏకమూలమూలా, న చ అఞ్ఞమఞ్ఞమూలమూలా.

(ఖ) యే వా పన నామమూలేన అఞ్ఞమఞ్ఞమూలమూలా, సబ్బే తే ధమ్మా నామాతి? ఆమన్తా.