(౩) మూలకనయో

౯౨. (క) యే కేచి నామా ధమ్మా, సబ్బే తే నామమూలకాతి?

అహేతుకం నామం న నామమూలకం. సహేతుకం నామం నామమూలకం.

(ఖ) యే వా పన నామమూలకా, సబ్బే తే ధమ్మా నామాతి?

నామసముట్ఠానం రూపం నామమూలకం, న నామం. నామం నామమూలకఞ్చేవ నామఞ్చ.

౯౩. (క) యే కేచి నామా ధమ్మా, సబ్బే తే నామమూలేన ఏకమూలకాతి?

అహేతుకం నామం నామమూలేన న ఏకమూలకం. సహేతుకం నామం నామమూలేన ఏకమూలకం.

(ఖ) యే వా పన నామమూలేన ఏకమూలకా, సబ్బే తే ధమ్మా నామాతి?

నామసముట్ఠానం రూపం నామమూలేన ఏకమూలకం, న నామం. నామం నామమూలేన ఏకమూలకఞ్చేవ నామఞ్చ.

౯౪. (క) యే కేచి నామమూలేన ఏకమూలకా ధమ్మా, సబ్బే తే నామమూలేన అఞ్ఞమఞ్ఞమూలకాతి?

మూలాని యాని ఏకతో ఉప్పజ్జన్తి నామమూలాని ఏకమూలకాని చేవ అఞ్ఞమఞ్ఞమూలకాని చ. అవసేసా నామమూలసహజాతా ధమ్మా నామమూలేన ఏకమూలకా, న చ అఞ్ఞమఞ్ఞమూలకా.

(ఖ) యే వా పన నామమూలేన అఞ్ఞమఞ్ఞమూలకా, సబ్బే తే ధమ్మా నామాతి? ఆమన్తా.