(౩) మూలకనయో

౬౮. (క) యే కేచి అకుసలా ధమ్మా, సబ్బే తే అకుసలమూలకాతి?

అహేతుకం అకుసలం న అకుసలమూలకం. సహేతుకం అకుసలం అకుసలమూలకం.

(ఖ) యే వా పన అకుసలమూలకా, సబ్బే తే ధమ్మా అకుసలాతి?

అకుసలసముట్ఠానం రూపం అకుసలమూలకం న అకుసలం. అకుసలం అకుసలమూలకఞ్చేవ అకుసలఞ్చ.

౬౯. (క) యే కేచి అకుసలా ధమ్మా, సబ్బే తే అకుసలమూలేన ఏకమూలకాతి?

అహేతుకం అకుసలం అకుసలమూలేన న ఏకమూలకం. సహేతుకం అకుసలం అకుసలమూలేన ఏకమూలకం.

(ఖ) యే వా పన అకుసలమూలేన ఏకమూలకా, సబ్బే తే ధమ్మా అకుసలాతి?

అకుసలసముట్ఠానం రూపం అకుసలమూలేన ఏకమూలకం, న అకుసలం. అకుసలం అకుసలమూలేన ఏకమూలకఞ్చేవ అకుసలఞ్చ.

౭౦. (క) యే కేచి అకుసలమూలేన ఏకమూలకా ధమ్మా, సబ్బే తే అకుసలమూలేన అఞ్ఞమఞ్ఞమూలకాతి?

మూలాని యాని ఏకతో ఉప్పజ్జన్తి అకుసలమూలాని ఏకమూలకాని చేవ అఞ్ఞమఞ్ఞమూలకాని చ. అవసేసా అకుసలమూలసహజాతా ధమ్మా అకుసలమూలేన ఏకమూలకా న చ అఞ్ఞమఞ్ఞమూలకా.

(ఖ) యే వా పన అకుసలమూలేన అఞ్ఞమఞ్ఞమూలకా, సబ్బే తే ధమ్మా అకుసలాతి? ఆమన్తా.