౨. అకుసలా ధమ్మా (౧) మూలనయో
౬౨. (క) యే కేచి అకుసలా ధమ్మా, సబ్బే తే అకుసలమూలాతి?
తీణేవ అకుసలమూలాని. అవసేసా అకుసలా ధమ్మా న అకుసలమూలా.
(ఖ) యే వా పన అకుసలమూలా, సబ్బే తే ధమ్మా అకుసలాతి? ఆమన్తా.
౬౩. (క) యే కేచి అకుసలా ధమ్మా, సబ్బే తే అకుసలమూలేన ఏకమూలాతి?
అహేతుకం అకుసలం అకుసలమూలేన న ఏకమూలం. సహేతుకం అకుసలం అకుసలమూలేన ఏకమూలం.
(ఖ) యే వా పన అకుసలమూలేన ఏకమూలా, సబ్బే తే ధమ్మా అకుసలాతి?
అకుసలసముట్ఠానం రూపం అకుసలమూలేన ఏకమూలం, న అకుసలం. అకుసలం అకుసలమూలేన ఏకమూలఞ్చేవ అకుసలఞ్చ.
౬౪. (క) యే కేచి అకుసలమూలేన ఏకమూలా ధమ్మా, సబ్బే తే అకుసలమూలేన అఞ్ఞమఞ్ఞమూలాతి?
మూలాని యాని ఏకతో ఉప్పజ్జన్తి అకుసలమూలాని ఏకమూలాని చేవ అఞ్ఞమఞ్ఞమూలాని చ. అవసేసా అకుసలమూలసహజాతా ధమ్మా అకుసలమూలేన ఏకమూలా, న చ అఞ్ఞమఞ్ఞమూలా.
(ఖ) యే వా పన అకుసలమూలేన అఞ్ఞమఞ్ఞమూలా, సబ్బే తే ధమ్మా అకుసలాతి? ఆమన్తా.
(౨) మూలమూలనయో
౬౫. (క) యే కేచి అకుసలా ధమ్మా, సబ్బే తే అకుసలమూలమూలాతి?
తీణేవ అకుసలమూలమూలాని. అవసేసా అకుసలా ధమ్మా న అకుసలమూలమూలా.
(ఖ) యే వా పన అకుసలమూలమూలా, సబ్బే తే ధమ్మా అకుసలాతి? ఆమన్తా.
౬౬. (క) యే కేచి అకుసలా ధమ్మా, సబ్బే తే అకుసలమూలేన ఏకమూలమూలాతి?
అహేతుకం అకుసలం అకుసలమూలేన న ఏకమూలమూలం. సహేతుకం అకుసలం అకుసలమూలేన ఏకమూలమూలం.
(ఖ) యే వా పన అకుసలమూలేన ఏకమూలమూలా, సబ్బే తే ధమ్మా అకుసలాతి?
అకుసలసముట్ఠానం రూపం అకుసలమూలేన ఏకమూలమూలం, న అకుసలం. అకుసలం అకుసలమూలేన ఏకమూలమూలఞ్చేవ అకుసలఞ్చ.
౬౭. (క) యే కేచి అకుసలమూలేన ఏకమూలమూలా ధమ్మా, సబ్బే తే అకుసలమూలేన అఞ్ఞమఞ్ఞమూలమూలాతి?
మూలాని యాని ఏకతో ఉప్పజ్జన్తి అకుసలమూలాని ఏకమూలమూలాని చేవ అఞ్ఞమఞ్ఞమూలమూలాని చ. అవసేసా అకుసలమూలసహజాతా ధమ్మా అకుసలమూలేన ఏకమూలమూలా, న చ అఞ్ఞమఞ్ఞమూలమూలా.
(ఖ) యే వా పన అకుసలమూలేన అఞ్ఞమఞ్ఞమూలమూలా, సబ్బే తే ధమ్మా అకుసలాతి? ఆమన్తా.
(౩) మూలకనయో
౬౮. (క) యే కేచి అకుసలా ధమ్మా, సబ్బే తే అకుసలమూలకాతి?
అహేతుకం అకుసలం న అకుసలమూలకం. సహేతుకం అకుసలం అకుసలమూలకం.
(ఖ) యే వా పన అకుసలమూలకా, సబ్బే తే ధమ్మా అకుసలాతి?
అకుసలసముట్ఠానం రూపం అకుసలమూలకం న అకుసలం. అకుసలం అకుసలమూలకఞ్చేవ అకుసలఞ్చ.
౬౯. (క) యే కేచి అకుసలా ధమ్మా, సబ్బే తే అకుసలమూలేన ఏకమూలకాతి?
అహేతుకం అకుసలం అకుసలమూలేన న ఏకమూలకం. సహేతుకం అకుసలం అకుసలమూలేన ఏకమూలకం.
(ఖ) యే వా పన అకుసలమూలేన ఏకమూలకా, సబ్బే తే ధమ్మా అకుసలాతి?
అకుసలసముట్ఠానం రూపం అకుసలమూలేన ఏకమూలకం, న అకుసలం. అకుసలం అకుసలమూలేన ఏకమూలకఞ్చేవ అకుసలఞ్చ.
౭౦. (క) యే కేచి అకుసలమూలేన ఏకమూలకా ధమ్మా, సబ్బే తే అకుసలమూలేన అఞ్ఞమఞ్ఞమూలకాతి?
మూలాని యాని ఏకతో ఉప్పజ్జన్తి అకుసలమూలాని ఏకమూలకాని చేవ అఞ్ఞమఞ్ఞమూలకాని చ. అవసేసా అకుసలమూలసహజాతా ధమ్మా అకుసలమూలేన ఏకమూలకా న చ అఞ్ఞమఞ్ఞమూలకా.
(ఖ) యే వా పన అకుసలమూలేన అఞ్ఞమఞ్ఞమూలకా, సబ్బే తే ధమ్మా అకుసలాతి? ఆమన్తా.
(౪) మూలమూలకనయో
౭౧. (క) యే కేచి అకుసలా ధమ్మా, సబ్బే తే అకుసలమూలమూలకాతి?
అహేతుకం అకుసలం న అకుసలమూలమూలకం. సహేతుకం అకుసలం అకుసలమూలమూలకం.
(ఖ) యే వా పన అకుసలమూలమూలకా, సబ్బే తే ధమ్మా అకుసలాతి?
అకుసలసముట్ఠానం రూపం అకుసలమూలమూలకం న అకుసలం. అకుసలం అకుసలమూలమూలకఞ్చేవ అకుసలఞ్చ.
౭౨. (క) యే కేచి అకుసలా ధమ్మా, సబ్బే తే అకుసలమూలేన ఏకమూలమూలకాతి?
అహేతుకం అకుసలం అకుసలమూలేన న ఏకమూలమూలకం. సహేతుకం అకుసలం అకుసలమూలేన ఏకమూలమూలకం.
(ఖ) యే వా పన అకుసలమూలేన ఏకమూలమూలకా, సబ్బే తే ధమ్మా అకుసలాతి?
అకుసలసముట్ఠానం రూపం అకుసలమూలేన ఏకమూలమూలకం, న అకుసలం. అకుసలం అకుసలమూలేన ఏకమూలమూలకఞ్చేవ అకుసలఞ్చ.
౭౩. (క) యే కేచి అకుసలమూలేన ఏకమూలమూలకా ధమ్మా, సబ్బే తే అకుసలమూలేన అఞ్ఞమఞ్ఞమూలమూలకాతి?
మూలాని యాని ఏకతో ఉప్పజ్జన్తి అకుసలమూలాని ఏకమూలమూలకాని చేవ అఞ్ఞమఞ్ఞమూలమూలకాని చ. అవసేసా అకుసలమూలసహజాతా ధమ్మా అకుసలమూలేన ఏకమూలమూలకా, న చ అఞ్ఞమఞ్ఞమూలమూలకా.
(ఖ) యే వా పన అకుసలమూలేన అఞ్ఞమఞ్ఞమూలమూలకా, సబ్బే తే ధమ్మా అకుసలాతి? ఆమన్తా.