(౨) మూలమూలనయో

౫౩. (క) యే కేచి కుసలా ధమ్మా, సబ్బే తే కుసలమూలమూలాతి? తీణేవ కుసలమూలమూలాని. అవసేసా కుసలా ధమ్మా న కుసలమూలమూలా.

(ఖ) యే వా పన కుసలమూలమూలా, సబ్బే తే ధమ్మా కుసలాతి? ఆమన్తా.

౫౪. (క) యే కేచి కుసలా ధమ్మా, సబ్బే తే కుసలమూలేన ఏకమూలమూలాతి? ఆమన్తా.

(ఖ) యే వా పన కుసలమూలేన ఏకమూలమూలా, సబ్బే తే ధమ్మా కుసలాతి?

కుసలసముట్ఠానం రూపం కుసలమూలేన ఏకమూలమూలం, న కుసలం. కుసలం కుసలమూలేన ఏకమూలమూలఞ్చేవ కుసలఞ్చ.

౫౫. (క) యే కేచి కుసలమూలేన ఏకమూలమూలా ధమ్మా, సబ్బే తే కుసలమూలేన అఞ్ఞమఞ్ఞమూలమూలాతి?

మూలాని యాని ఏకతో ఉప్పజ్జన్తి కుసలమూలాని ఏకమూలమూలాని చేవ అఞ్ఞమఞ్ఞమూలమూలాని చ. అవసేసా కుసలమూలసహజాతా ధమ్మా కుసలమూలేన ఏకమూలమూలా, న చ అఞ్ఞమఞ్ఞమూలమూలా.

(ఖ) యే వా పన కుసలమూలేన అఞ్ఞమఞ్ఞమూలమూలా, సబ్బే తే ధమ్మా కుసలాతి? ఆమన్తా.