౧. కుసలా ధమ్మా (౧) మూలనయో
౫౦. (క) యే కేచి కుసలా ధమ్మా, సబ్బే తే కుసలమూలాతి? తీణేవ కుసలమూలాని. అవసేసా కుసలా ధమ్మా న కుసలమూలా.
(ఖ) యే వా పన కుసలమూలా, సబ్బే తే ధమ్మా కుసలాతి? ఆమన్తా.
౫౧. (క) యే కేచి కుసలా ధమ్మా, సబ్బే తే కుసలమూలేన ఏకమూలాతి? ఆమన్తా.
(ఖ) యే వా పన కుసలమూలేన ఏకమూలా, సబ్బే తే ధమ్మా కుసలాతి?
కుసలసముట్ఠానం రూపం కుసలమూలేన ఏకమూలం, న కుసలం. కుసలం కుసలమూలేన ఏకమూలఞ్చేవ కుసలఞ్చ.
౫౨. (క) యే కేచి కుసలమూలేన ఏకమూలా ధమ్మా, సబ్బే తే కుసలమూలేన అఞ్ఞమఞ్ఞమూలాతి?
మూలాని యాని ఏకతో ఉప్పజ్జన్తి కుసలమూలాని ఏకమూలాని చేవ అఞ్ఞమఞ్ఞమూలాని చ. అవసేసా కుసలమూలసహజాతా ధమ్మా కుసలమూలేన ఏకమూలా, న చ అఞ్ఞమఞ్ఞమూలా.
(ఖ) యే వా పన కుసలమూలేన అఞ్ఞమఞ్ఞమూలా, సబ్బే తే ధమ్మా కుసలాతి? ఆమన్తా.
(౨) మూలమూలనయో
౫౩. (క) యే కేచి కుసలా ధమ్మా, సబ్బే తే కుసలమూలమూలాతి? తీణేవ కుసలమూలమూలాని. అవసేసా కుసలా ధమ్మా న కుసలమూలమూలా.
(ఖ) యే వా పన కుసలమూలమూలా, సబ్బే తే ధమ్మా కుసలాతి? ఆమన్తా.
౫౪. (క) యే కేచి కుసలా ధమ్మా, సబ్బే తే కుసలమూలేన ఏకమూలమూలాతి? ఆమన్తా.
(ఖ) యే వా పన కుసలమూలేన ఏకమూలమూలా, సబ్బే తే ధమ్మా కుసలాతి?
కుసలసముట్ఠానం రూపం కుసలమూలేన ఏకమూలమూలం, న కుసలం. కుసలం కుసలమూలేన ఏకమూలమూలఞ్చేవ కుసలఞ్చ.
౫౫. (క) యే కేచి కుసలమూలేన ఏకమూలమూలా ధమ్మా, సబ్బే తే కుసలమూలేన అఞ్ఞమఞ్ఞమూలమూలాతి?
మూలాని యాని ఏకతో ఉప్పజ్జన్తి కుసలమూలాని ఏకమూలమూలాని చేవ అఞ్ఞమఞ్ఞమూలమూలాని చ. అవసేసా కుసలమూలసహజాతా ధమ్మా కుసలమూలేన ఏకమూలమూలా, న చ అఞ్ఞమఞ్ఞమూలమూలా.
(ఖ) యే వా పన కుసలమూలేన అఞ్ఞమఞ్ఞమూలమూలా, సబ్బే తే ధమ్మా కుసలాతి? ఆమన్తా.
(౩) మూలకనయో
౫౬. (క) యే కేచి కుసలా ధమ్మా, సబ్బే తే కుసలమూలకాతి? ఆమన్తా.
(ఖ) యే వా పన కుసలమూలకా, సబ్బే తే ధమ్మా కుసలాతి?
కుసలసముట్ఠానం రూపం కుసలమూలకం న కుసలం. కుసలం కుసలమూలకఞ్చేవ కుసలఞ్చ.
౫౭. (క) యే కేచి కుసలా ధమ్మా, సబ్బే తే కుసలమూలేన ఏకమూలకాతి? ఆమన్తా.
(ఖ) యే వా పన కుసలమూలేన ఏకమూలకా, సబ్బే తే ధమ్మా కుసలాతి?
కుసలసముట్ఠానం రూపం కుసలమూలేన ఏకమూలకం, న కుసలం. కుసలం కుసలమూలేన ఏకమూలకఞ్చేవ కుసలఞ్చ.
౫౮. (క) యే కేచి కుసలమూలేన ఏకమూలకా ధమ్మా, సబ్బే తే కుసలమూలేన అఞ్ఞమఞ్ఞమూలకాతి?
మూలాని యాని ఏకతో ఉప్పజ్జన్తి కుసలమూలాని ఏకమూలకాని చేవ అఞ్ఞమఞ్ఞమూలకాని చ. అవసేసా కుసలమూలసహజాతా ధమ్మా కుసలమూలేన ఏకమూలకా, న చ అఞ్ఞమఞ్ఞమూలకా.
(ఖ) యే వా పన కుసలమూలేన అఞ్ఞమఞ్ఞమూలకా, సబ్బే తే ధమ్మా కుసలాతి? ఆమన్తా.
(౪) మూలమూలకనయో
౫౯. (క) యే కేచి కుసలా ధమ్మా, సబ్బే తే కుసలమూలమూలకాతి? ఆమన్తా.
(ఖ) యే వా పన కుసలమూలమూలకా, సబ్బే తే ధమ్మా కుసలాతి?
కుసలసముట్ఠానం రూపం కుసలమూలమూలకం న కుసలం. కుసలం కుసలమూలమూలకఞ్చేవ కుసలఞ్చ.
౬౦. (క) యే కేచి కుసలా ధమ్మా, సబ్బే తే కుసలమూలేన ఏకమూలమూలకాతి? ఆమన్తా.
(ఖ) యే వా పన కుసలమూలేన ఏకమూలమూలకా, సబ్బే తే ధమ్మా కుసలాతి?
కుసలసముట్ఠానం రూపం కుసలమూలేన ఏకమూలమూలకం, న కుసలం. కుసలం కుసలమూలేన ఏకమూలమూలకఞ్చేవ కుసలఞ్చ.
౬౧. (క) యే కేచి కుసలమూలేన ఏకమూలమూలకా ధమ్మా, సబ్బే తే కుసలమూలేన అఞ్ఞమఞ్ఞమూలమూలకాతి?
మూలాని యాని ఏకతో ఉప్పజ్జన్తి కుసలమూలాని ఏకమూలమూలకాని చేవ అఞ్ఞమఞ్ఞమూలమూలకాని చ. అవసేసా కుసలమూలసహజాతా ధమ్మా కుసలమూలేన ఏకమూలమూలకా, న చ అఞ్ఞమఞ్ఞమూలమూలకా.
(ఖ) యే వా పన కుసలమూలేన అఞ్ఞమఞ్ఞమూలమూలకా, సబ్బే తే ధమ్మా కుసలాతి? ఆమన్తా.