౪. అరూపధాతు

౧౦౧౮. అరూపధాతుయా ఉపపత్తిక్ఖణే కతి ఖన్ధా పాతుభవన్తి…పే… కతి చిత్తాని పాతుభవన్తి?

అరూపధాతుయా ఉపపత్తిక్ఖణే చత్తారో ఖన్ధా పాతుభవన్తి, ద్వే ఆయతనాని పాతుభవన్తి, ద్వే ధాతుయో పాతుభవన్తి, ఏకం సచ్చం పాతుభవతి, అట్ఠిన్ద్రియాని పాతుభవన్తి, తయో హేతూ పాతుభవన్తి, తయో ఆహారా పాతుభవన్తి, ఏకో ఫస్సో పాతుభవతి, ఏకా వేదనా… ఏకా సఞ్ఞా… ఏకా చేతనా… ఏకం చిత్తం పాతుభవతి.

౧౦౧౯. అరూపధాతుయా ఉపపత్తిక్ఖణే కతమే చత్తారో ఖన్ధా పాతుభవన్తి? వేదనాక్ఖన్ధో, సఞ్ఞాక్ఖన్ధో, సఙ్ఖారక్ఖన్ధో, విఞ్ఞాణక్ఖన్ధో – అరూపధాతుయా ఉపపత్తిక్ఖణే ఇమే చత్తారో ఖన్ధా పాతుభవన్తి.

అరూపధాతుయా ఉపపత్తిక్ఖణే కతమాని ద్వే ఆయతనాని పాతుభవన్తి? మనాయతనం, ధమ్మాయతనం – అరూపధాతుయా ఉపపత్తిక్ఖణే ఇమాని ద్వే ఆయతనాని పాతుభవన్తి.

అరూపధాతుయా ఉపపత్తిక్ఖణే కతమా ద్వే ధాతుయో పాతుభవన్తి? మనోవిఞ్ఞాణధాతు, ధమ్మధాతు – అరూపధాతుయా ఉపపత్తిక్ఖణే ఇమా ద్వే ధాతుయో పాతుభవన్తి.

అరూపధాతుయా ఉపపత్తిక్ఖణే కతమం ఏకం సచ్చం పాతుభవతి? దుక్ఖసచ్చం – అరూపధాతుయా ఉపపత్తిక్ఖణే ఇదం ఏకం సచ్చం పాతుభవతి.

అరూపధాతుయా ఉపపత్తిక్ఖణే కతమాని అట్ఠిన్ద్రియాని పాతుభవన్తి? మనిన్ద్రియం, జీవితిన్ద్రియం, ఉపేక్ఖిన్ద్రియం, సద్ధిన్ద్రియం, వీరియిన్ద్రియం, సతిన్ద్రియం, సమాధిన్ద్రియం, పఞ్ఞిన్ద్రియం – అరూపధాతుయా ఉపపత్తిక్ఖణే ఇమాని అట్ఠిన్ద్రియాని పాతుభవన్తి.

అరూపధాతుయా ఉపపత్తిక్ఖణే కతమే తయో హేతూ పాతుభవన్తి? అలోభో విపాకహేతు, అదోసో విపాకహేతు, అమోహో విపాకహేతు – అరూపధాతుయా ఉపపత్తిక్ఖణే ఇమే తయో హేతూ పాతుభవన్తి.

అరూపధాతుయా ఉపపత్తిక్ఖణే కతమే తయో ఆహారా పాతుభవన్తి? ఫస్సాహారో, మనోసఞ్చేతనాహారో, విఞ్ఞాణాహారో – అరూపధాతుయా ఉపపత్తిక్ఖణే ఇమే తయో ఆహారా పాతుభవన్తి.

అరూపధాతుయా ఉపపత్తిక్ఖణే కతమో ఏకో ఫస్సో పాతుభవతి? మనోవిఞ్ఞాణధాతుసమ్ఫస్సో – అరూపధాతుయా ఉపపత్తిక్ఖణే అయం ఏకో ఫస్సో పాతుభవతి.

అరూపధాతుయా ఉపపత్తిక్ఖణే కతమా ఏకా వేదనా…పే… ఏకా సఞ్ఞా… ఏకా చేతనా… ఏకం చిత్తం పాతుభవతి? మనోవిఞ్ఞాణధాతు – అరూపధాతుయా ఉపపత్తిక్ఖణే ఇదం ఏకం చిత్తం పాతుభవతి.