౨. రూపధాతు

౧౦౧౫. రూపధాతుయా ఉపపత్తిక్ఖణే కతి ఖన్ధా పాతుభవన్తి…పే… కతి చిత్తాని పాతుభవన్తి?

రూపధాతుయా ఉపపత్తిక్ఖణే, ఠపేత్వా అసఞ్ఞసత్తానం దేవానం, పఞ్చక్ఖన్ధా పాతుభవన్తి, పఞ్చాయతనాని పాతుభవన్తి, పఞ్చ ధాతుయో పాతుభవన్తి, ఏకం సచ్చం పాతుభవతి, దసిన్ద్రియాని పాతుభవన్తి, తయో హేతూ పాతుభవన్తి, తయో ఆహారా పాతుభవన్తి, ఏకో ఫస్సో పాతుభవతి, ఏకా వేదనా… ఏకా సఞ్ఞా… ఏకా చేతనా… ఏకం చిత్తం పాతుభవతి.

౧౦౧౬. రూపధాతుయా ఉపపత్తిక్ఖణే కతమే పఞ్చక్ఖన్ధా పాతుభవన్తి? రూపక్ఖన్ధో, వేదనాక్ఖన్ధో, సఞ్ఞాక్ఖన్ధో, సఙ్ఖారక్ఖన్ధో, విఞ్ఞాణక్ఖన్ధో – రూపధాతుయా ఉపపత్తిక్ఖణే ఇమే పఞ్చక్ఖన్ధా పాతుభవన్తి.

రూపధాతుయా ఉపపత్తిక్ఖణే కతమాని పఞ్చాయతనాని పాతుభవన్తి? చక్ఖాయతనం, రూపాయతనం, సోతాయతనం, మనాయతనం, ధమ్మాయతనం – రూపధాతుయా ఉపపత్తిక్ఖణే ఇమాని పఞ్చాయతనాని పాతుభవన్తి.

రూపధాతుయా ఉపపత్తిక్ఖణే కతమా పఞ్చ ధాతుయో పాతుభవన్తి? చక్ఖుధాతు, రూపధాతు, సోతధాతు, మనోవిఞ్ఞాణధాతు, ధమ్మధాతు – రూపధాతుయా ఉపపత్తిక్ఖణే ఇమా పఞ్చ ధాతుయో పాతుభవన్తి.

రూపధాతుయా ఉపపత్తిక్ఖణే కతమం ఏకం సచ్చం పాతుభవతి? దుక్ఖసచ్చం – రూపధాతుయా ఉపపత్తిక్ఖణే ఇదం ఏకం సచ్చం పాతుభవతి.

రూపధాతుయా ఉపపత్తిక్ఖణే కతమాని దసిన్ద్రియాని పాతుభవన్తి? చక్ఖున్ద్రియం, సోతిన్ద్రియం, మనిన్ద్రియం, జీవితిన్ద్రియం, సోమనస్సిన్ద్రియం వా ఉపేక్ఖిన్ద్రియం వా, సద్ధిన్ద్రియం, వీరియిన్ద్రియం, సతిన్ద్రియం, సమాధిన్ద్రియం, పఞ్ఞిన్ద్రియం – రూపధాతుయా ఉపపత్తిక్ఖణే ఇమాని దసిన్ద్రియాని పాతుభవన్తి.

రూపధాతుయా ఉపపత్తిక్ఖణే కతమే తయో హేతూ పాతుభవన్తి? అలోభో విపాకహేతు, అదోసో విపాకహేతు, అమోహో విపాకహేతు – రూపధాతుయా ఉపపత్తిక్ఖణే ఇమే తయో హేతూ పాతుభవన్తి.

రూపధాతుయా ఉపపత్తిక్ఖణే కతమే తయో ఆహారా పాతుభవన్తి? ఫస్సాహారో, మనోసఞ్చేతనాహారో, విఞ్ఞాణాహారో – రూపధాతుయా ఉపపత్తిక్ఖణే ఇమే తయో ఆహారా పాతుభవన్తి.

రూపధాతుయా ఉపపత్తిక్ఖణే కతమో ఏకో ఫస్సో పాతుభవతి? మనోవిఞ్ఞాణధాతుసమ్ఫస్సో – రూపధాతుయా ఉపపత్తిక్ఖణే అయం ఏకో ఫస్సో పాతుభవతి.

రూపధాతుయా ఉపపత్తిక్ఖణే కతమా ఏకా వేదనా… ఏకా సఞ్ఞా… ఏకా చేతనా… ఏకం చిత్తం పాతుభవతి? మనోవిఞ్ఞాణధాతు – రూపధాతుయా ఉపపత్తిక్ఖణే ఇదం ఏకం చిత్తం పాతుభవతి.