(౩౪) పాపిచ్ఛతా

౮౫౧. తత్థ కతమా పాపిచ్ఛతా? ఇధేకచ్చో అస్సద్ధో సమానో ‘‘సద్ధోతి మం జనో జానాతూ’’తి ఇచ్ఛతి, దుస్సీలో సమానో ‘‘సీలవాతి మం జనో జానాతూ’’తి ఇచ్ఛతి, అప్పస్సుతో సమానో ‘‘బహుస్సుతోతి మం జనో జానాతూ’’తి ఇచ్ఛతి, సఙ్గణికారామో సమానో ‘‘పవివిత్తోతి మం జనో జానాతూ’’తి ఇచ్ఛతి, కుసీతో సమానో ‘‘ఆరద్ధవీరియోతి మం జనో జానాతూ’’తి ఇచ్ఛతి, ముట్ఠస్సతీ సమానో ‘‘ఉపట్ఠితస్సతీతి మం జనో జానాతూ’’తి ఇచ్ఛతి, అసమాహితో సమానో ‘‘సమాహితోతి మం జనో జానాతూ’’తి ఇచ్ఛతి, దుప్పఞ్ఞో సమానో ‘‘పఞ్ఞవాతి మం జనో జానాతూ’’తి ఇచ్ఛతి, అఖీణాసవో సమానో ‘‘ఖీణాసవోతి మం జనో జానాతూ’’తి ఇచ్ఛతి – యా ఏవరూపా ఇచ్ఛా ఇచ్ఛాగతా పాపిచ్ఛతా రాగో సారాగో చిత్తస్స సారాగో – అయం వుచ్చతి ‘‘పాపిచ్ఛతా’’.