౧౦. దసకమాతికా

౮౪౧. (౧) దస కిలేసవత్థూని (౨) దస ఆఘాతవత్థూని (౩) దస అకుసలకమ్మపథా (౪) దస సంయోజనాని (౫) దస మిచ్ఛత్తా (౬) దసవత్థుకా మిచ్ఛాదిట్ఠి (౭) దసవత్థుకా అన్తగ్గాహికా దిట్ఠి

దసకం.

౮౪౨. అట్ఠారస తణ్హావిచరితాని అజ్ఝత్తికస్స ఉపాదాయ, అట్ఠారస తణ్హావిచరితాని బాహిరస్స ఉపాదాయ, తదేకజ్ఝం అభిసఞ్ఞూహిత్వా అభిసఙ్ఖిపిత్వా ఛత్తింస తణ్హావిచరితాని హోన్తి. ఇతి అతీతాని ఛత్తింస తణ్హావిచరితాని, అనాగతాని ఛత్తింస తణ్హావిచరితాని, పచ్చుప్పన్నాని ఛత్తింస తణ్హావిచరితాని, తదేకజ్ఝం అభిసఞ్ఞూహిత్వా అభిసఙ్ఖిపిత్వా అట్ఠ తణ్హావిచరితసతం హోతి. యాని చ ద్వాసట్ఠి దిట్ఠిగతాని బ్రహ్మజాలే వేయ్యాకరణే వుత్తాని భగవతా.

మాతికా.