౫. పఞ్చకనిద్దేసో

౮౦౪. (౧) తత్థ కతమో పఞ్చఙ్గికో సమ్మాసమాధి? పీతిఫరణతా, సుఖఫరణతా, చేతోఫరణతా, ఆలోకఫరణతా, పచ్చవేక్ఖణానిమిత్తం. ద్వీసు ఝానేసు పఞ్ఞా పీతిఫరణతా. తీసు ఝానేసు పఞ్ఞా సుఖఫరణతా. పరచిత్తే ఞాణం చేతోఫరణతా. దిబ్బచక్ఖు ఆలోకఫరణతా. తమ్హా తమ్హా సమాధిమ్హా వుట్ఠితస్స పచ్చవేక్ఖణాఞాణం పచ్చవేక్ఖణానిమిత్తం. అయం వుచ్చతి పఞ్చఙ్గికో సమ్మాసమాధి.

(౨) తత్థ కతమో పఞ్చఞాణికో సమ్మాసమాధి? ‘‘అయం సమాధి పచ్చుప్పన్నసుఖో చేవ ఆయతిఞ్చ సుఖవిపాకో’’తి పచ్చత్తఞ్ఞేవ ఞాణం ఉప్పజ్జతి. ‘‘అయం సమాధి అరియో నిరామిసో’’తి పచ్చత్తఞ్ఞేవ ఞాణం ఉప్పజ్జతి. ‘‘అయం సమాధి అకాపురిససేవితో’’తి పచ్చత్తఞ్ఞేవ ఞాణం ఉప్పజ్జతి. ‘‘అయం సమాధి సన్తో పణీతో పటిప్పస్సద్ధలద్ధో ఏకోదిభావాధిగతో న ససఙ్ఖారనిగ్గయ్హవారితగతో’’తి పచ్చత్తఞ్ఞేవ ఞాణం ఉప్పజ్జతి. సో ఖో పనాహం ఇమం సమాధిం సతో సమాపజ్జామి సతో వుట్ఠహామీ’’తి పచ్చత్తఞ్ఞేవ ఞాణం ఉప్పజ్జతి. అయం పఞ్చఞాణికో సమ్మాసమాధి. ఏవం పఞ్చవిధేన ఞాణవత్థు.

పఞ్చకం.