౭. పఞ్హావారో

పచ్చయచతుక్కం

హేతు-ఆరమ్మణపచ్చయా

౨౩. విపాకో ధమ్మో నవిపాకస్స ధమ్మస్స హేతుపచ్చయేన పచ్చయో. విపాకో ధమ్మో నవిపాకధమ్మధమ్మస్స హేతుపచ్చయేన పచ్చయో. విపాకో ధమ్మో ననేవవిపాకనవిపాకధమ్మధమ్మస్స హేతుపచ్చయేన పచ్చయో. విపాకో ధమ్మో నవిపాకధమ్మధమ్మస్స చ ననేవవిపాకనవిపాకధమ్మధమ్మస్స చ ధమ్మస్స హేతుపచ్చయేన పచ్చయో. విపాకో ధమ్మో నవిపాకస్స చ నవిపాకధమ్మధమ్మస్స చ ధమ్మస్స హేతుపచ్చయేన పచ్చయో. (౫)

౨౪. విపాకో ధమ్మో నవిపాకస్స ధమ్మస్స ఆరమ్మణపచ్చయేన పచ్చయో. విపాకో ధమ్మో నవిపాకధమ్మధమ్మస్స ఆరమ్మణపచ్చయేన పచ్చయో. విపాకో ధమ్మో ననేవవిపాకనవిపాకధమ్మధమ్మస్స ఆరమ్మణపచ్చయేన పచ్చయో. విపాకో ధమ్మో నవిపాకస్స చ ననేవవిపాకనవిపాకధమ్మధమ్మస్స చ ధమ్మస్స ఆరమ్మణపచ్చయేన పచ్చయో. విపాకో ధమ్మో నవిపాకధమ్మధమ్మస్స చ ననేవవిపాకనవిపాకధమ్మధమ్మస్స చ ధమ్మస్స ఆరమ్మణపచ్చయేన పచ్చయో. విపాకో ధమ్మో నవిపాకస్స చ నవిపాకధమ్మధమ్మస్స చ ధమ్మస్స ఆరమ్మణపచ్చయేన పచ్చయో. (౬)

విపాకధమ్మధమ్మో నవిపాకధమ్మధమ్మస్స ఆరమ్మణపచ్చయేన పచ్చయో. విపాకధమ్మధమ్మో నవిపాకస్స ధమ్మస్స ఆరమ్మణపచ్చయేన పచ్చయో. విపాకధమ్మధమ్మో ననేవవిపాకనవిపాకధమ్మధమ్మస్స ఆరమ్మణపచ్చయేన పచ్చయో. విపాకధమ్మధమ్మో నవిపాకస్స చ ననేవవిపాకనవిపాకధమ్మధమ్మస్స చ ధమ్మస్స ఆరమ్మణపచ్చయేన పచ్చయో. విపాకధమ్మధమ్మో నవిపాకధమ్మధమ్మస్స చ ననేవవిపాకనవిపాకధమ్మధమ్మస్స చ ధమ్మస్స ఆరమ్మణపచ్చయేన పచ్చయో. విపాకధమ్మధమ్మో నవిపాకస్స చ నవిపాకధమ్మధమ్మస్స చ ధమ్మస్స ఆరమ్మణపచ్చయేన పచ్చయో. (౬)

నేవవిపాకనవిపాకధమ్మధమ్మో ననేవవిపాకనవిపాకధమ్మధమ్మస్స ఆరమ్మణపచ్చయేన పచ్చయో…పే… ఛ. (సంఖిత్తం.)

౨౫. హేతుయా తేరస, ఆరమ్మణే అట్ఠారస, అధిపతియా సత్తరస, అనన్తరే సోళస…పే… పురేజాతే ఛ, పచ్ఛాజాతే నవ, ఆసేవనే ఛ, కమ్మే చుద్దస, విపాకే పఞ్చ, ఇన్ద్రియే అట్ఠారస…పే… విప్పయుత్తే ద్వాదస…పే… అవిగతే ఛబ్బీస. (పఞ్హావారం విత్థారేతబ్బం.)