౧-౭. పటిచ్చవారాది

పచ్చయచతుక్కం

హేతుపచ్చయో

౧. నహేతుం నకుసలం ధమ్మం పటిచ్చ నహేతు నకుసలో ధమ్మో ఉప్పజ్జతి హేతుపచ్చయా – నహేతుం అకుసలం అబ్యాకతం ఏకం ఖన్ధం పటిచ్చ తయో ఖన్ధా చిత్తసముట్ఠానఞ్చ రూపం. నహేతుం నకుసలం ధమ్మం పటిచ్చ ననహేతుం నకుసలో ధమ్మో ఉప్పజ్జతి హేతుపచ్చయా – నహేతూ అకుసలే అబ్యాకతే ఖన్ధే పటిచ్చ హేతూ. నహేతుం నకుసలం ధమ్మం పటిచ్చ నహేతు నకుసలో చ ననహేతు నకుసలో చ ధమ్మా ఉప్పజ్జన్తి హేతుపచ్చయా. (౩)

ననహేతుం నకుసలం ధమ్మం పటిచ్చ ననహేతు నకుసలో ధమ్మో ఉప్పజ్జతి హేతుపచ్చయా. ననహేతుం నకుసలం ధమ్మం పటిచ్చ నహేతు నకుసలో ధమ్మో ఉప్పజ్జతి హేతుపచ్చయా. ననహేతుం నకుసలం ధమ్మం పటిచ్చ నహేతు నకుసలో చ ననహేతు నకుసలో చ ధమ్మా ఉప్పజ్జన్తి హేతుపచ్చయా. (౩)

నహేతుం నకుసలఞ్చ ననహేతుం నకుసలఞ్చ ధమ్మం పటిచ్చ నహేతు నకుసలో ధమ్మో ఉప్పజ్జతి హేతుపచ్చయా. నహేతుం నకుసలఞ్చ ననహేతుం నకుసలఞ్చ ధమ్మం పటిచ్చ ననహేతు నకుసలో ధమ్మో ఉప్పజ్జతి హేతుపచ్చయా. నహేతుం నకుసలఞ్చ ననహేతుం నకుసలఞ్చ ధమ్మం పటిచ్చ నహేతు నకుసలో చ ననహేతు నకుసలో చ ధమ్మా ఉప్పజ్జన్తి హేతుపచ్చయా. (౩) (సంఖిత్తం.)

౨. హేతుయా నవ…పే… అవిగతే నవ.

నహేతుయా ద్వే.

(సహజాతవారేపి…పే… సమ్పయుత్తవారేపి సబ్బత్థ విత్థారో.)

హేతు-ఆరమ్మణపచ్చయా

౩. ననహేతు నకుసలో ధమ్మో ననహేతుస్స నకుసలస్స ధమ్మస్స హేతుపచ్చయేన పచ్చయో. ననహేతు నకుసలో ధమ్మో నహేతుస్స నకుసలస్స ధమ్మస్స హేతుపచ్చయేన పచ్చయో. ననహేతు నకుసలో ధమ్మో నహేతుస్స నకుసలస్స చ ననహేతుస్స నకుసలస్స చ ధమ్మస్స హేతుపచ్చయేన పచ్చయో. (౩)

నహేతు నకుసలో ధమ్మో నహేతుస్స నకుసలస్స ధమ్మస్స ఆరమ్మణపచ్చయేన పచ్చయో. (సంఖిత్తం.)

౪. హేతుయా తీణి, ఆరమ్మణే నవ…పే… అవిగతే నవ. (పఞ్హావారం ఏవం విత్థారేతబ్బం).

౫. నహేతుం నఅకుసలం ధమ్మం పటిచ్చ నహేతు నఅకుసలో ధమ్మో ఉప్పజ్జతి హేతుపచ్చయా – నహేతుం కుసలం అబ్యాకతం ఏకం ఖన్ధం పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే…పే… నహేతుం నఅకుసలం ధమ్మం పటిచ్చ ననహేతు నఅకుసలో ధమ్మో ఉప్పజ్జతి హేతుపచ్చయా – నహేతూ కుసలే అబ్యాకతే ఖన్ధే పటిచ్చ హేతూ. నహేతుం నఅకుసలం ధమ్మం పటిచ్చ నహేతు నఅకుసలో చ ననహేతు నఅకుసలో చ ధమ్మా ఉప్పజ్జన్తి హేతుపచ్చయా. (౩)

ననహేతుం నఅకుసలం ధమ్మం పటిచ్చ ననహేతు నఅకుసలో ధమ్మో ఉప్పజ్జతి హేతుపచ్చయా. ననహేతుం నఅకుసలం ధమ్మం పటిచ్చ నహేతు నఅకుసలో ధమ్మో ఉప్పజ్జతి హేతుపచ్చయా. ననహేతుం నఅకుసలం ధమ్మం పటిచ్చ నహేతు నఅకుసలో చ ననహేతు నఅకుసలో చ ధమ్మా ఉప్పజ్జన్తి హేతుపచ్చయా. (౩)

నహేతుం నఅకుసలఞ్చ ననహేతుం నఅకుసలఞ్చ ధమ్మం పటిచ్చ నహేతు నఅకుసలో ధమ్మో ఉప్పజ్జతి హేతుపచ్చయా. నహేతుం నఅకుసలఞ్చ ననహేతుం నఅకుసలఞ్చ ధమ్మం పటిచ్చ ననహేతు నఅకుసలో ధమ్మో ఉప్పజ్జతి హేతుపచ్చయా. నహేతుం నఅకుసలఞ్చ ననహేతుం నఅకుసలఞ్చ ధమ్మం పటిచ్చ నహేతు నఅకుసలో చ ననహేతు నఅకుసలో చ ధమ్మా ఉప్పజ్జన్తి హేతుపచ్చయా. (౩) (సంఖిత్తం).

హేతుయా నవ…పే… అవిగతే నవ. (సబ్బత్థ నవ.)

౬. నహేతుం నఅబ్యాకతం ధమ్మం పటిచ్చ నహేతు నఅబ్యాకతో ధమ్మో ఉప్పజ్జతి హేతుపచ్చయా – కుసలాకుసలం నహేతుం ఏకం ఖన్ధం పటిచ్చ తయో ఖన్ధా, తయో ఖన్ధే పటిచ్చ ఏకో ఖన్ధో. నహేతుం నఅబ్యాకతం ధమ్మం పటిచ్చ ననహేతు నఅబ్యాకతో ధమ్మో ఉప్పజ్జతి హేతుపచ్చయా. నహేతుం నఅబ్యాకతం ధమ్మం పటిచ్చ నహేతు నఅబ్యాకతో చ ననహేతు నఅబ్యాకతో చ ధమ్మా ఉప్పజ్జన్తి హేతుపచ్చయా. (౩)

ననహేతుం నఅబ్యాకతం ధమ్మం పటిచ్చ ననహేతు నఅబ్యాకతో ధమ్మో ఉప్పజ్జతి హేతుపచ్చయా… తీణి.

నహేతుం నఅబ్యాకతఞ్చ ననహేతుం నఅబ్యాకతఞ్చ ధమ్మం పటిచ్చ నహేతు నఅబ్యాకతో ధమ్మో ఉప్పజ్జతి హేతుపచ్చయా. నహేతుం నఅబ్యాకతఞ్చ ననహేతుం నఅబ్యాకతఞ్చ ధమ్మం పటిచ్చ ననహేతు నఅబ్యాకతో ధమ్మో ఉప్పజ్జతి హేతుపచ్చయా. నహేతుం నఅబ్యాకతఞ్చ ననహేతుం నఅబ్యాకతఞ్చ ధమ్మం పటిచ్చ నహేతు నఅబ్యాకతో చ ననహేతు నఅబ్యాకతో చ ధమ్మా ఉప్పజ్జన్తి హేతుపచ్చయా. (౩) (సంఖిత్తం.)

హేతుయా నవ…పే… అవిగతే నవ. (సబ్బత్థ నవ.)

౧-౨ హేతుదుక-వేదనాత్తికం

౭. నహేతుం నసుఖాయ వేదనాయ సమ్పయుత్తం ధమ్మం పటిచ్చ నహేతు నసుఖాయ వేదనాయ సమ్పయుత్తో ధమ్మో ఉప్పజ్జతి హేతుపచ్చయా. నహేతుం నసుఖాయ వేదనాయ సమ్పయుత్తం ధమ్మం పటిచ్చ ననహేతు నసుఖాయ వేదనాయ సమ్పయుత్తో ధమ్మో ఉప్పజ్జతి హేతుపచ్చయా. (సంఖిత్తం.)

హేతుయా నవ. (సబ్బత్థ నవ.)

౮. నహేతుం నదుక్ఖాయ వేదనాయ సమ్పయుత్తం ధమ్మం పటిచ్చ నహేతు నదుక్ఖాయ వేదనాయ సమ్పయుత్తో ధమ్మో ఉప్పజ్జతి హేతుపచ్చయా. (సంఖిత్తం.)

హేతుయా నవ. (సబ్బత్థ నవ.)

౯. నహేతుం నఅదుక్ఖమసుఖాయ వేదనాయ సమ్పయుత్తం ధమ్మం పటిచ్చ నహేతు నఅదుక్ఖమసుఖాయ వేదనాయ సమ్పయుత్తో ధమ్మో ఉప్పజ్జతి హేతుపచ్చయా. (సంఖిత్తం.)

హేతుయా నవ. (సబ్బత్థ నవ.)