౧-౭. పటిచ్చవారాది

పచ్చయచతుక్కం

హేతుపచ్చయో

౫. నసహేతుకం ధమ్మం పటిచ్చ నసహేతుకో ధమ్మో ఉప్పజ్జతి హేతుపచ్చయా – విచికిచ్ఛాసహగతం ఉద్ధచ్చసహగతం మోహం పటిచ్చ చిత్తసముట్ఠానం రూపం, ఏకం మహాభూతం పటిచ్చ తయో మహాభూతా…పే… ద్వే మహాభూతే పటిచ్చ ద్వే మహాభూతా, మహాభూతే పటిచ్చ చిత్తసముట్ఠానం రూపం కటత్తారూపం ఉపాదారూపం. నసహేతుకం ధమ్మం పటిచ్చ నఅహేతుకో ధమ్మో ఉప్పజ్జతి హేతుపచ్చయా – విచికిచ్ఛాసహగతం ఉద్ధచ్చసహగతం మోహం పటిచ్చ సమ్పయుత్తకా ఖన్ధా; పటిసన్ధిక్ఖణే వత్థుం పటిచ్చ సహేతుకా ఖన్ధా. నసహేతుకం ధమ్మం పటిచ్చ నసహేతుకో చ నఅహేతుకో చ ధమ్మా ఉప్పజ్జన్తి హేతుపచ్చయా. (౩)

నఅహేతుకం ధమ్మం పటిచ్చ నఅహేతుకో ధమ్మో ఉప్పజ్జతి హేతుపచ్చయా… తీణి.

నసహేతుకఞ్చ నఅహేతుకఞ్చ ధమ్మం పటిచ్చ నసహేతుకో ధమ్మో ఉప్పజ్జతి హేతుపచ్చయా. నసహేతుకఞ్చ నఅహేతుకఞ్చ ధమ్మం పటిచ్చ నఅహేతుకో ధమ్మో ఉప్పజ్జతి హేతుపచ్చయా. నసహేతుకఞ్చ నఅహేతుకఞ్చ ధమ్మం పటిచ్చ నసహేతుకో చ నఅహేతుకో చ ధమ్మా ఉప్పజ్జన్తి హేతుపచ్చయా. (౩) (సంఖిత్తం.)

౬. హేతుయా నవ, ఆరమ్మణే ఛ…పే… అవిగతే నవ.

(సహజాతవారమ్పి…పే… సమ్పయుత్తవారమ్పి పటిచ్చవారసదిసం ఏవం విత్థారేతబ్బం.)

హేతు-ఆరమ్మణపచ్చయా

౭. నసహేతుకో ధమ్మో నసహేతుకస్స ధమ్మస్స హేతుపచ్చయేన పచ్చయో. నసహేతుకో ధమ్మో నఅహేతుకస్స ధమ్మస్స హేతుపచ్చయేన పచ్చయో. నసహేతుకో ధమ్మో నసహేతుకస్స చ నఅహేతుకస్స చ ధమ్మస్స హేతుపచ్చయేన పచ్చయో. (౩)

నఅహేతుకో ధమ్మో నఅహేతుకస్స ధమ్మస్స హేతుపచ్చయేన పచ్చయో… తీణి.

నసహేతుకో ధమ్మో నసహేతుకస్స ధమ్మస్స ఆరమ్మణపచ్చయేన పచ్చయో (సంఖిత్తం.)

౮. హేతుయా ఛ, ఆరమ్మణే నవ…పే… అవిగతే నవ.

(యథా కుసలత్తికే పఞ్హావారం, ఏవం విత్థారేతబ్బం.)