౫౫-౬౮. మహన్తరదుకాది

౨౨. నసారమ్మణం ధమ్మం పటిచ్చ సారమ్మణో ధమ్మో ఉప్పజ్జతి హేతుపచ్చయా. నసారమ్మణం ధమ్మం పటిచ్చ అనారమ్మణో ధమ్మో ఉప్పజ్జతి హేతుపచ్చయా. నసారమ్మణం ధమ్మం పటిచ్చ సారమ్మణో చ అనారమ్మణో చ ధమ్మా ఉప్పజ్జన్తి హేతుపచ్చయా. తీణి.

నఅనారమ్మణం ధమ్మం పటిచ్చ అనారమ్మణో ధమ్మో ఉప్పజ్జతి హేతుపచ్చయా… తీణి.

నసారమ్మణఞ్చ నఅనారమ్మణఞ్చ ధమ్మం పటిచ్చ సారమ్మణో ధమ్మో ఉప్పజ్జతి హేతుపచ్చయా… తీణి. హేతుయా నవ.

౨౩. నచిత్తం ధమ్మం పటిచ్చ చిత్తో ధమ్మో ఉప్పజ్జతి హేతుపచ్చయా. నచిత్తం ధమ్మం పటిచ్చ నోచిత్తో ధమ్మో ఉప్పజ్జతి హేతుపచ్చయా. నచిత్తం ధమ్మం పటిచ్చ చిత్తో చ నోచిత్తో చ ధమ్మా ఉప్పజ్జన్తి హేతుపచ్చయా. తీణి.

ననోచిత్తం ధమ్మం పటిచ్చ నోచిత్తో ధమ్మో ఉప్పజ్జతి హేతుపచ్చయా. ఏకం.

నచిత్తఞ్చ ననోచిత్తఞ్చ ధమ్మం పటిచ్చ నోచిత్తో ధమ్మో ఉప్పజ్జతి హేతుపచ్చయా. ఏకం. హేతుయా పఞ్చ.

౨౪. నచేతసికం ధమ్మం పటిచ్చ చేతసికో ధమ్మో ఉప్పజ్జతి హేతుపచ్చయా. నచేతసికం ధమ్మం పటిచ్చ అచేతసికో ధమ్మో ఉప్పజ్జతి హేతుపచ్చయా. నచేతసికం ధమ్మం పటిచ్చ చేతసికో చ అచేతసికో చ ధమ్మా ఉప్పజ్జన్తి హేతుపచ్చయా. హేతుయా నవ.

౨౫. నచిత్తసమ్పయుత్తం ధమ్మం పటిచ్చ చిత్తసమ్పయుత్తో ధమ్మో ఉప్పజ్జతి హేతుపచ్చయా. నచిత్తసమ్పయుత్తం ధమ్మం పటిచ్చ చిత్తవిప్పయుత్తో ధమ్మో ఉప్పజ్జతి హేతుపచ్చయా. నచిత్తసమ్పయుత్తం ధమ్మం పటిచ్చ చిత్తసమ్పయుత్తో చ చిత్తవిప్పయుత్తో చ ధమ్మా ఉప్పజ్జన్తి హేతుపచ్చయా. (౩)

నచిత్తవిప్పయుత్తం ధమ్మం పటిచ్చ చిత్తవిప్పయుత్తో ధమ్మో ఉప్పజ్జతి హేతుపచ్చయా. నచిత్తవిప్పయుత్తం ధమ్మం పటిచ్చ చిత్తసమ్పయుత్తో ధమ్మో ఉప్పజ్జతి హేతుపచ్చయా. నచిత్తవిప్పయుత్తం ధమ్మం పటిచ్చ చిత్తసమ్పయుత్తో చ చిత్తవిప్పయుత్తో చ ధమ్మా ఉప్పజ్జన్తి హేతుపచ్చయా. (౩)

నచిత్తసమ్పయుత్తఞ్చ నచిత్తవిప్పయుత్తఞ్చ ధమ్మం పటిచ్చ చిత్తసమ్పయుత్తో ధమ్మో ఉప్పజ్జతి హేతుపచ్చయా… తీణి. హేతుయా నవ.

౨౬. నచిత్తసంసట్ఠం ధమ్మం పటిచ్చ చిత్తసంసట్ఠో ధమ్మో ఉప్పజ్జతి హేతుపచ్చయా. నచిత్తసంసట్ఠం ధమ్మం పటిచ్చ చిత్తవిసంసట్ఠో ధమ్మో ఉప్పజ్జతి హేతుపచ్చయా. నచిత్తసంసట్ఠం ధమ్మం పటిచ్చ చిత్తసంసట్ఠో చ చిత్తవిసంసట్ఠో చ ధమ్మా ఉప్పజ్జన్తి హేతుపచ్చయా… హేతుయా నవ.

౨౭. నచిత్తసముట్ఠానం ధమ్మం పటిచ్చ చిత్తసముట్ఠానో ధమ్మో ఉప్పజ్జతి హేతుపచ్చయా. నచిత్తసముట్ఠానం ధమ్మం పటిచ్చ నోచిత్తసముట్ఠానో ధమ్మో ఉప్పజ్జతి హేతుపచ్చయా. నచిత్తసముట్ఠానం ధమ్మం పటిచ్చ చిత్తసముట్ఠానో చ నోచిత్తసముట్ఠానో చ ధమ్మా ఉప్పజ్జన్తి హేతుపచ్చయా… హేతుయా నవ.

౨౮. నచిత్తసహభుం ధమ్మం పటిచ్చ చిత్తసహభూ ధమ్మో ఉప్పజ్జతి హేతుపచ్చయా. నచిత్తసహభుం ధమ్మం పటిచ్చ నోచిత్తసహభూ ధమ్మో ఉప్పజ్జతి హేతుపచ్చయా. నచిత్తసహభుం ధమ్మం పటిచ్చ చిత్తసహభూ చ నోచిత్తసహభూ చ ధమ్మా ఉప్పజ్జన్తి హేతుపచ్చయా… హేతుయా నవ.

౨౯. నచిత్తానుపరివత్తిం ధమ్మం పటిచ్చ చిత్తానుపరివత్తీ ధమ్మో ఉప్పజ్జతి హేతుపచ్చయా. నచిత్తానుపరివత్తిం ధమ్మం పటిచ్చ నోచిత్తానుపరివత్తీ ధమ్మో ఉప్పజ్జతి హేతుపచ్చయా. నచిత్తానుపరివత్తిం ధమ్మం పటిచ్చ చిత్తానుపరివత్తీ చ నోచిత్తానుపరివత్తీ చ ధమ్మా ఉప్పజ్జన్తి హేతుపచ్చయా… హేతుయా నవ.

౩౦. నచిత్తసంసట్ఠసముట్ఠానం ధమ్మం పటిచ్చ చిత్తసంసట్ఠసముట్ఠానో ధమ్మో ఉప్పజ్జతి హేతుపచ్చయా… హేతుయా నవ.

౩౧. నచిత్తసంసట్ఠసముట్ఠానసహభుం ధమ్మం పటిచ్చ చిత్తసంసట్ఠసముట్ఠానసహభూ ధమ్మో ఉప్పజ్జతి హేతుపచ్చయా… హేతుయా నవ.

౩౨. నచిత్తసంసట్ఠసముట్ఠానానుపరివత్తిం ధమ్మం పటిచ్చ చిత్తసంసట్ఠసముట్ఠానానుపరివత్తీ ధమ్మో ఉప్పజ్జతి హేతుపచ్చయా… హేతుయా నవ.

౩౩. నఅజ్ఝత్తికం ధమ్మం పటిచ్చ అజ్ఝత్తికో ధమ్మో ఉప్పజ్జతి హేతుపచ్చయా… తీణి.

నబాహిరం ధమ్మం పటిచ్చ బాహిరో ధమ్మో ఉప్పజ్జతి హేతుపచ్చయా… తీణి.

నఅజ్ఝత్తికఞ్చ నబాహిరఞ్చ ధమ్మం పటిచ్చ అజ్ఝత్తికో ధమ్మో ఉప్పజ్జతి హేతుపచ్చయా… తీణి. హేతుయా నవ.

౩౪. నఉపాదా ధమ్మం పటిచ్చ ఉపాదా ధమ్మో ఉప్పజ్జతి హేతుపచ్చయా… హేతుయా పఞ్చ.

౩౫. నఉపాదిన్నం ధమ్మం పటిచ్చ అనుపాదిన్నో ధమ్మో ఉప్పజ్జతి హేతుపచ్చయా… హేతుయా పఞ్చ.