౧-౧. హేతుదుక-సహేతుకదుకం

౧. హేతుం సహేతుకం ధమ్మం పటిచ్చ నహేతు నసహేతుకో ధమ్మో ఉప్పజ్జతి హేతుపచ్చయా. నహేతుం సహేతుకం ధమ్మం పటిచ్చ నహేతు నసహేతుకో ధమ్మో ఉప్పజ్జతి హేతుపచ్చయా. హేతుం సహేతుకఞ్చ నహేతుం సహేతుకఞ్చ ధమ్మం పటిచ్చ నహేతు నసహేతుకో ధమ్మో ఉప్పజ్జతి హేతుపచ్చయా. (సంఖిత్తం.) హేతుయా తీణి, ఆరమ్మణే ఏకం…పే… అవిగతే పఞ్చ.

౨. నహేతుం సహేతుకం ధమ్మం పటిచ్చ ననహేతు నసహేతుకో ధమ్మో ఉప్పజ్జతి నహేతుపచ్చయా… (సంఖిత్తం.) నహేతుయా ఏకం, నఆరమ్మణే తీణి…పే… నోవిగతే తీణి.

(సహజాతవారమ్పి…పే… సమ్పయుత్తవారమ్పి పటిచ్చవారసదిసం.)

హేతు-ఆరమ్మణపచ్చయా

౩. హేతు సహేతుకో ధమ్మో నహేతుస్స నసహేతుకస్స ధమ్మస్స హేతుపచ్చయేన పచ్చయో. (౧)

హేతు సహేతుకో ధమ్మో నహేతుస్స నసహేతుకస్స ధమ్మస్స ఆరమ్మణపచ్చయేన పచ్చయో. హేతు సహేతుకో ధమ్మో ననహేతుస్స నసహేతుకస్స ధమ్మస్స ఆరమ్మణపచ్చయేన పచ్చయో. హేతు సహేతుకో ధమ్మో నహేతుస్స నసహేతుకస్స చ ననహేతుస్స నసహేతుకస్స చ ధమ్మస్స ఆరమ్మణపచ్చయేన పచ్చయో. (౩)

నహేతు సహేతుకో ధమ్మో ననహేతుస్స నసహేతుకస్స ధమ్మస్స ఆరమ్మణపచ్చయేన పచ్చయో. నహేతు సహేతుకో ధమ్మో నహేతుస్స నసహేతుకస్స ధమ్మస్స ఆరమ్మణపచ్చయేన పచ్చయో. నహేతు సహేతుకో ధమ్మో నహేతుస్స నసహేతుకస్స చ ననహేతుస్స నసహేతుకస్స చ ధమ్మస్స ఆరమ్మణపచ్చయేన పచ్చయో. (౩) (సంఖిత్తం.)

హేతుయా ఏకం, ఆరమ్మణే ఛ, అధిపతియా ద్వే…పే… అవిగతే పఞ్చ. (పఞ్హావారం విత్థారేతబ్బం.)

౪. హేతుం అహేతుకం ధమ్మం పటిచ్చ నహేతు నఅహేతుకో ధమ్మో ఉప్పజ్జతి హేతుపచ్చయా. (౧)

నహేతుం అహేతుకం ధమ్మం పటిచ్చ ననహేతు నఅహేతుకో ధమ్మో ఉప్పజ్జతి హేతుపచ్చయా… తీణి. (సంఖిత్తం.) హేతుయా చత్తారి.