౩-౧. విపాకత్తిక-హేతుదుకం

౬౭. విపాకం హేతుం ధమ్మం పటిచ్చ నవిపాకో నహేతు ధమ్మో ఉప్పజ్జతి హేతుపచ్చయా. విపాకం హేతుం ధమ్మం పటిచ్చ నవిపాకధమ్మధమ్మో నహేతు ధమ్మో ఉప్పజ్జతి హేతుపచ్చయా. విపాకం హేతుం ధమ్మం పటిచ్చ ననేవవిపాకనవిపాకధమ్మధమ్మో నహేతు ధమ్మో ఉప్పజ్జతి హేతుపచ్చయా. విపాకం హేతుం ధమ్మం పటిచ్చ నవిపాకధమ్మధమ్మో నహేతు చ ననేవవిపాకనవిపాకధమ్మధమ్మో నహేతు చ ధమ్మా ఉప్పజ్జన్తి హేతుపచ్చయా. విపాకం హేతుం ధమ్మం పటిచ్చ నవిపాకో నహేతు చ నవిపాకధమ్మధమ్మో నహేతు చ ధమ్మా ఉప్పజ్జన్తి హేతుపచ్చయా. పఞ్చ.

విపాకధమ్మధమ్మం హేతుం ధమ్మం పటిచ్చ నవిపాకధమ్మధమ్మో నహేతు ధమ్మో ఉప్పజ్జతి హేతుపచ్చయా. విపాకధమ్మధమ్మం హేతుం ధమ్మం పటిచ్చ నవిపాకో నహేతు ధమ్మో ఉప్పజ్జతి హేతుపచ్చయా. విపాకధమ్మధమ్మం హేతుం ధమ్మం పటిచ్చ ననేవవిపాకనవిపాకధమ్మధమ్మో నహేతు ధమ్మో ఉప్పజ్జతి హేతుపచ్చయా. విపాకధమ్మధమ్మం హేతుం ధమ్మం పటిచ్చ నవిపాకో నహేతు చ ననేవవిపాకనవిపాకధమ్మధమ్మో నహేతు చ ధమ్మా ఉప్పజ్జన్తి హేతుపచ్చయా. విపాకధమ్మధమ్మం హేతుం ధమ్మం పటిచ్చ నవిపాకో నహేతు చ నవిపాకధమ్మధమ్మో నహేతు చ ధమ్మా ఉప్పజ్జన్తి హేతుపచ్చయా. పఞ్చ.

నేవవిపాకనవిపాకధమ్మధమ్మం హేతుం ధమ్మం పటిచ్చ నవిపాకో నహేతు ధమ్మో ఉప్పజ్జతి హేతుపచ్చయా. నేవవిపాకనవిపాకధమ్మధమ్మం హేతుం ధమ్మం పటిచ్చ నవిపాకధమ్మధమ్మో నహేతు ధమ్మో ఉప్పజ్జతి హేతుపచ్చయా. నేవవిపాకనవిపాకధమ్మధమ్మం హేతుం ధమ్మం పటిచ్చ నవిపాకో నహేతు చ నవిపాకధమ్మధమ్మో నహేతు చ ధమ్మా ఉప్పజ్జన్తి హేతుపచ్చయా. తీణి… హేతుయా తేరస.

౬౮. విపాకం నహేతుం ధమ్మం పటిచ్చ నవిపాకధమ్మధమ్మో ననహేతు ధమ్మో ఉప్పజ్జతి హేతుపచ్చయా. విపాకం నహేతుం ధమ్మం పటిచ్చ ననేవవిపాకనవిపాకధమ్మధమ్మో ననహేతు ధమ్మో ఉప్పజ్జతి హేతుపచ్చయా. విపాకం నహేతుం ధమ్మం పటిచ్చ నవిపాకధమ్మధమ్మో ననహేతు చ ననేవవిపాకనవిపాకధమ్మధమ్మో ననహేతు చ ధమ్మా ఉప్పజ్జన్తి హేతుపచ్చయా. తీణి.

విపాకధమ్మధమ్మం నహేతుం ధమ్మం పటిచ్చ నవిపాకో ననహేతు ధమ్మో ఉప్పజ్జతి హేతుపచ్చయా. విపాకధమ్మధమ్మం నహేతుం ధమ్మం పటిచ్చ ననేవవిపాకనవిపాకధమ్మధమ్మో ననహేతు ధమ్మో ఉప్పజ్జతి హేతుపచ్చయా. విపాకధమ్మధమ్మం నహేతుం ధమ్మం పటిచ్చ నవిపాకో ననహేతు చ ననేవవిపాకనవిపాకధమ్మధమ్మో ననహేతు చ ధమ్మా ఉప్పజ్జన్తి హేతుపచ్చయా. తీణి.

నేవవిపాకనవిపాకధమ్మధమ్మం నహేతుం ధమ్మం పటిచ్చ ననేవవిపాకనవిపాకధమ్మధమ్మో ననహేతు ధమ్మో ఉప్పజ్జతి హేతుపచ్చయా. నేవవిపాకనవిపాకధమ్మధమ్మం నహేతుం ధమ్మం పటిచ్చ నవిపాకో ననహేతు ధమ్మో ఉప్పజ్జతి హేతుపచ్చయా…పే…. నేవవిపాకనవిపాకధమ్మధమ్మం నహేతుఞ్చ ధమ్మం పటిచ్చ నవిపాకో ననహేతు చ నవిపాకధమ్మధమ్మో ననహేతు చ ధమ్మా ఉప్పజ్జన్తి హేతుపచ్చయా… పఞ్చ.

విపాకం నహేతుఞ్చ నేవవిపాకనవిపాకధమ్మధమ్మం నహేతుఞ్చ ధమ్మం పటిచ్చ నవిపాకధమ్మధమ్మో ననహేతు ధమ్మో ఉప్పజ్జతి హేతుపచ్చయా… తీణి… హేతుయా చుద్దస.