౧-౭. పటిచ్చవారాది

పచ్చయచతుక్కం

౫౮. అకుసలం హీనం ధమ్మం పటిచ్చ అకుసలో హీనో ధమ్మో ఉప్పజ్జతి హేతుపచ్చయా. (సంఖిత్తం.)

హేతుయా ఏకం…పే… అవిగతే ఏకం. (సంఖిత్తం. సబ్బత్థ విత్థారో.)

౫౯. కుసలం మజ్ఝిమం ధమ్మం పటిచ్చ కుసలో మజ్ఝిమో ధమ్మో ఉప్పజ్జతి హేతుపచ్చయా. కుసలం మజ్ఝిమం ధమ్మం పటిచ్చ అబ్యాకతో మజ్ఝిమో ధమ్మో ఉప్పజ్జతి హేతుపచ్చయా. కుసలం మజ్ఝిమం ధమ్మం పటిచ్చ కుసలో మజ్ఝిమో చ అబ్యాకతో మజ్ఝిమో చ ధమ్మా ఉప్పజ్జన్తి హేతుపచ్చయా. (౩)

అబ్యాకతం మజ్ఝిమం ధమ్మం పటిచ్చ అబ్యాకతో మజ్ఝిమో ధమ్మో ఉప్పజ్జతి హేతుపచ్చయా. (౧)

కుసలం మజ్ఝిమఞ్చ అబ్యాకతం మజ్ఝిమఞ్చ ధమ్మం పటిచ్చ అబ్యాకతో మజ్ఝిమో ధమ్మో ఉప్పజ్జతి హేతుపచ్చయా. (౧)

కుసలం మజ్ఝిమం ధమ్మం పటిచ్చ కుసలో మజ్ఝిమో ధమ్మో ఉప్పజ్జతి ఆరమ్మణపచ్చయా. (౧)

అబ్యాకతం మజ్ఝిమం ధమ్మం పటిచ్చ అబ్యాకతో మజ్ఝిమో ధమ్మో ఉప్పజ్జతి ఆరమ్మణపచ్చయా. (౧) (సంఖిత్తం.)

హేతుయా పఞ్చ, ఆరమ్మణే ద్వే, అవిగతే పఞ్చ. (సంఖిత్తం. సహజాతవారమ్పి …పే… సమ్పయుత్తవారమ్పి పటిచ్చవారసదిసం.)

౬౦. కుసలో మజ్ఝిమో ధమ్మో కుసలస్స మజ్ఝిమస్స ధమ్మస్స హేతుపచ్చయేన పచ్చయో… తీణి.

అబ్యాకతో మజ్ఝిమో ధమ్మో అబ్యాకతస్స మజ్ఝిమస్స ధమ్మస్స హేతుపచ్చయేన పచ్చయో. (౧)

కుసలో మజ్ఝిమో ధమ్మో కుసలస్స మజ్ఝిమస్స ధమ్మస్స ఆరమ్మణపచ్చయేన పచ్చయో. కుసలో మజ్ఝిమో ధమ్మో అబ్యాకతస్స మజ్ఝిమస్స ధమ్మస్స ఆరమ్మణపచ్చయేన పచ్చయో. (౨)

అబ్యాకతో మజ్ఝిమో ధమ్మో అబ్యాకతస్స మజ్ఝిమస్స ధమ్మస్స ఆరమ్మణపచ్చయేన పచ్చయో. అబ్యాకతో మజ్ఝిమో ధమ్మో కుసలస్స మజ్ఝిమస్స ధమ్మస్స ఆరమ్మణపచ్చయేన పచ్చయో. (౨) (సంఖిత్తం).

౬౧. హేతుయా చత్తారి, ఆరమ్మణే చత్తారి, అవిగతే సత్త.

(సంఖిత్తం. యథా కుసలత్తికే పఞ్హావారం, ఏవం విత్థారేతబ్బం.)

పణీతపదం

హేతుపచ్చయో

౬౨. కుసలం పణీతం ధమ్మం పటిచ్చ కుసలో పణీతో ధమ్మో ఉప్పజ్జతి హేతుపచ్చయా. (౧)

అబ్యాకతం పణీతం ధమ్మం పటిచ్చ అబ్యాకతో పణీతో ధమ్మో ఉప్పజ్జతి హేతుపచ్చయా. (౧) (సంఖిత్తం.)

హేతుయా ద్వే, అవిగతే ద్వే. (సంఖిత్తం. సహజాతవారేపి…పే… పఞ్హావారేపి సబ్బత్థ విత్థారో.)