౧-౭. పటిచ్చవారాది

పచ్చయచతుక్కం

హేతుపచ్చయో

౩౧. పరామాసవిప్పయుత్తం పరామట్ఠం కుసలం ధమ్మం పటిచ్చ పరామాసవిప్పయుత్తో పరామట్ఠో కుసలో ధమ్మో ఉప్పజ్జతి హేతుపచ్చయా. (౧)

పరామాసవిప్పయుత్తం అపరామట్ఠం కుసలం ధమ్మం పటిచ్చ పరామాసవిప్పయుత్తో అపరామట్ఠో కుసలో ధమ్మో ఉప్పజ్జతి హేతుపచ్చయా. (౧) (సంఖిత్తం.)

౩౨. హేతుయా ద్వే, ఆరమ్మణే ద్వే…పే… అవిగతే ద్వే (సంఖిత్తం. లోకియలోకుత్తరదుకసదిసం. సహజాతవారోపి…పే… పఞ్హావారోపి విత్థారేతబ్బా.)

౩౩. పరామాసవిప్పయుత్తం పరామట్ఠం అకుసలం ధమ్మం పటిచ్చ పరామాసవిప్పయుత్తో పరామట్ఠో అకుసలో ధమ్మో ఉప్పజ్జతి హేతుపచ్చయా (సబ్బత్థ ఏకం).

౩౪. పరామాసవిప్పయుత్తం పరామట్ఠం అబ్యాకతం ధమ్మం పటిచ్చ పరామాసవిప్పయుత్తో పరామట్ఠో అబ్యాకతో ధమ్మో ఉప్పజ్జతి హేతుపచ్చయా. (౧)

పరామాసవిప్పయుత్తం అపరామట్ఠం అబ్యాకతం ధమ్మం పటిచ్చ పరామాసవిప్పయుత్తో అపరామట్ఠో అబ్యాకతో ధమ్మో ఉప్పజ్జతి హేతుపచ్చయా… తీణి.

పరామాసవిప్పయుత్తం పరామట్ఠం అబ్యాకతఞ్చ పరామాసవిప్పయుత్తం అపరామట్ఠం అబ్యాకతఞ్చ ధమ్మం పటిచ్చ పరామాసవిప్పయుత్తో పరామట్ఠో అబ్యాకతో ధమ్మో ఉప్పజ్జతి హేతుపచ్చయా. (౧) (సంఖిత్తం.)

౩౫. హేతుయా పఞ్చ, ఆరమ్మణే ద్వే…పే… అవిగతే పఞ్చ (సంఖిత్తం. లోకియదుకసదిసం. సహజాతవారమ్పి…పే… పఞ్హావారమ్పి విత్థారేతబ్బం.)

పరామాసగోచ్ఛకకుసలత్తికం నిట్ఠితం.