౧-౭. పటిచ్చవారాది

పచ్చయచతుక్కం

హేతుపచ్చయో

౧. నోనీవరణం కుసలం ధమ్మం పటిచ్చ నోనీవరణో కుసలో ధమ్మో ఉప్పజ్జతి హేతుపచ్చయా (సంఖిత్తం).

౨. హేతుయా ఏకం, ఆరమ్మణే ఏకం…పే… అవిగతే ఏకం (సంఖిత్తం).

(సహజాతవారేపి…పే… పఞ్హావారేపి సబ్బత్థ ఏకం).

౩. నీవరణం అకుసలం ధమ్మం పటిచ్చ నీవరణో అకుసలో ధమ్మో ఉప్పజ్జతి హేతుపచ్చయా. నీవరణం అకుసలం ధమ్మం పటిచ్చ నోనీవరణో అకుసలో ధమ్మో ఉప్పజ్జతి హేతుపచ్చయా. నీవరణం అకుసలం ధమ్మం పటిచ్చ నీవరణో అకుసలో చ నోనీవరణో అకుసలో చ ధమ్మా ఉప్పజ్జన్తి హేతుపచ్చయా. (౩) (సంఖిత్తం.)

౪. హేతుయా నవ, ఆరమ్మణే నవ…పే… అవిగతే నవ (సంఖిత్తం).

పచ్చనీయం

నహేతుపచ్చయో

౫. నీవరణం అకుసలం ధమ్మం పటిచ్చ నీవరణో అకుసలో ధమ్మో ఉప్పజ్జతి నహేతుపచ్చయా – విచికిచ్ఛానీవరణం ఉద్ధచ్చనీవరణం పటిచ్చ అవిజ్జానీవరణం. (౧)

నోనీవరణం అకుసలం ధమ్మం పటిచ్చ నీవరణో అకుసలో ధమ్మో ఉప్పజ్జతి నహేతుపచ్చయా – విచికిచ్ఛాసహగతే ఉద్ధచ్చసహగతే ఖన్ధే పటిచ్చ అవిజ్జానీవరణం. (౧)

నీవరణఞ్చ నోనీవరణఞ్చ అకుసలం ధమ్మం పటిచ్చ నీవరణో అకుసలో ధమ్మో ఉప్పజ్జతి నహేతుపచ్చయా – విచికిచ్ఛానీవరణఞ్చ ఉద్ధచ్చనీవరణఞ్చ సమ్పయుత్తకే చ ఖన్ధే పటిచ్చ అవిజ్జానీవరణం. (౧) (సంఖిత్తం.)

౬. నహేతుయా తీణి, నఅధిపతియా నవ, నపురేజాతే నవ…పే… నకమ్మే తీణి…పే… నవిప్పయుత్తే నవ (సంఖిత్తం).

(సహజాతవారేపి… సమ్పయుత్తవారేపి సబ్బత్థ నవ.)

౭. నీవరణో అకుసలో ధమ్మో నీవరణస్స అకుసలస్స ధమ్మస్స హేతుపచ్చయేన పచ్చయో (సంఖిత్తం).

౮. హేతుయా తీణి, ఆరమ్మణే నవ, అధిపతియా నవ…పే… ఆసేవనే నవ, కమ్మే ఆహారే ఇన్ద్రియే ఝానే మగ్గే తీణి, సమ్పయుత్తే నవ…పే… అవిగతే నవ (సంఖిత్తం).

నహేతుయా నవ, నఆరమ్మణే నవ (సంఖిత్తం).

హేతుపచ్చయా నఆరమ్మణే తీణి (సంఖిత్తం).

నహేతుపచ్చయా ఆరమ్మణే నవ (సంఖిత్తం).

(యథా కుసలత్తికే పఞ్హావారస్స అనులోమమ్పి పచ్చనీయమ్పి అనులోమపచ్చనీయమ్పి పచ్చనీయానులోమమ్పి గణితం, ఏవం గణేతబ్బం).

౯. నోనీవరణం అబ్యాకతం ధమ్మం పటిచ్చ నోనీవరణో అబ్యాకతో ధమ్మో ఉప్పజ్జతి హేతుపచ్చయా (సంఖిత్తం).

౧౦. హేతుయా ఏకం, ఆరమ్మణే ఏకం…పే… అవిగతే ఏకం (సంఖిత్తం).

(సహజాతవారేపి…పే… పఞ్హావారేపి సబ్బత్థ ఏకం.)