౧-౭. పటిచ్చవారాది

పచ్చయచతుక్కం

హేతుపచ్చయో

౪౨. సఞ్ఞోజనవిప్పయుత్తం సఞ్ఞోజనియం కుసలం ధమ్మం పటిచ్చ సఞ్ఞోజనవిప్పయుత్తో సఞ్ఞోజనియో కుసలో ధమ్మో ఉప్పజ్జతి హేతుపచ్చయా. (౧)

సఞ్ఞోజనవిప్పయుత్తం అసఞ్ఞోజనియం కుసలం ధమ్మం పటిచ్చ సఞ్ఞోజనవిప్పయుత్తో అసఞ్ఞోజనియో కుసలో ధమ్మో ఉప్పజ్జతి హేతుపచ్చయా. (౧)

౪౩. హేతుయా ద్వే, ఆరమ్మణే ద్వే…పే… అవిగతే ద్వే (సంఖిత్తం).

(యథా చూళన్తరదుకే లోకియదుకసదిసం. సహజాతవారోపి…పే… పఞ్హావారోపి సబ్బత్థ విత్థారేతబ్బా.)

౪౪. సఞ్ఞోజనవిప్పయుత్తో సఞ్ఞోజనియో అకుసలో ధమ్మో సఞ్ఞోజనవిప్పయుత్తస్స సఞ్ఞోజనియస్స అకుసలస్స ధమ్మస్స ఆరమ్మణపచ్చయేన పచ్చయో (సంఖిత్తం).

౪౫. ఆరమ్మణే ఏకం (సబ్బత్థ ఏకం, సంఖిత్తం).

౪౬. సఞ్ఞోజనవిప్పయుత్తం సఞ్ఞోజనియం అబ్యాకతం ధమ్మం పటిచ్చ సఞ్ఞోజనవిప్పయుత్తో సఞ్ఞోజనియో అబ్యాకతో ధమ్మో ఉప్పజ్జతి హేతుపచ్చయా. (౧)

సఞ్ఞోజనవిప్పయుత్తం అసఞ్ఞోజనియం అబ్యాకతం ధమ్మం పటిచ్చ సఞ్ఞోజనవిప్పయుత్తో అసఞ్ఞోజనియో అబ్యాకతో ధమ్మో ఉప్పజ్జతి హేతుపచ్చయా. సఞ్ఞోజనవిప్పయుత్తం అసఞ్ఞోజనియం అబ్యాకతం ధమ్మం పటిచ్చ సఞ్ఞోజనవిప్పయుత్తో సఞ్ఞోజనియో అబ్యాకతో ధమ్మో ఉప్పజ్జతి హేతుపచ్చయా. సఞ్ఞోజనవిప్పయుత్తం అసఞ్ఞోజనియం అబ్యాకతం ధమ్మం పటిచ్చ సఞ్ఞోజనవిప్పయుత్తో సఞ్ఞోజనియో అబ్యాకతో చ సఞ్ఞోజనవిప్పయుత్తో అసఞ్ఞోజనియో అబ్యాకతో చ ధమ్మా ఉప్పజ్జన్తి హేతుపచ్చయా. (౩)

సఞ్ఞోజనవిప్పయుత్తం సఞ్ఞోజనియం అబ్యాకతఞ్చ సఞ్ఞోజనవిప్పయుత్తం అసఞ్ఞోజనియం అబ్యాకతఞ్చ ధమ్మం పటిచ్చ సఞ్ఞోజనవిప్పయుత్తో సఞ్ఞోజనియో అబ్యాకతో ధమ్మో ఉప్పజ్జతి హేతుపచ్చయా. (౧) (సంఖిత్తం.)

౪౭. హేతుయా పఞ్చ, ఆరమ్మణే ద్వే, అధిపతియా పఞ్చ…పే… ఆసేవనే ఏకం, కమ్మే పఞ్చ, విపాకే పఞ్చ…పే… అవిగతే పఞ్చ (సంఖిత్తం).

నహేతుయా ఏకం, నఆరమ్మణే తీణి, నఅధిపతియా ద్వే, నపురేజాతే చత్తారి, నపచ్ఛాజాతే పఞ్చ, నఆసేవనే పఞ్చ, నకమ్మే ఏకం, నవిపాకే ఏకం, నవిప్పయుత్తే ద్వే…పే… నోవిగతే తీణి (సంఖిత్తం).

(సహజాతవారోపి…పే… సమ్పయుత్తవారోపి పటిచ్చవారసదిసా.)

౪౮. సఞ్ఞోజనవిప్పయుత్తో సఞ్ఞోజనియో అబ్యాకతో ధమ్మో సఞ్ఞోజనవిప్పయుత్తస్స సఞ్ఞోజనియస్స అబ్యాకతస్స ధమ్మస్స హేతుపచ్చయేన పచ్చయో (సంఖిత్తం).

౪౯. హేతుయా చత్తారి, ఆరమ్మణే తీణి, అధిపతియా చత్తారి, అనన్తరే చత్తారి…పే… అవిగతే సత్త (సంఖిత్తం).

౫౦. నహేతుయా సత్త, నఆరమ్మణే సత్త (సంఖిత్తం).

హేతుపచ్చయా నఆరమ్మణే చత్తారి (సంఖిత్తం).

నహేతుపచ్చయా ఆరమ్మణే తీణి (సంఖిత్తం).

(యథా కుసలత్తికే పఞ్హావారస్స అనులోమమ్పి పచ్చనీయమ్పి అనులోమపచ్చనీయమ్పి పచ్చనీయానులోమమ్పి గణితం, ఏవం గణేతబ్బం.)

సఞ్ఞోజనగోచ్ఛకకుసలత్తికం నిట్ఠితం.