౭. పఞ్హావారో

పచ్చయచతుక్కం

హేతు-ఆరమ్మణపచ్చయా

౫౪. ఆసవవిప్పయుత్తో సాసవో అబ్యాకతో ధమ్మో ఆసవవిప్పయుత్తస్స సాసవస్స అబ్యాకతస్స ధమ్మస్స హేతుపచ్చయేన పచ్చయో.

ఆసవవిప్పయుత్తో అనాసవో అబ్యాకతో ధమ్మో ఆసవవిప్పయుత్తస్స అనాసవస్స అబ్యాకతస్స ధమ్మస్స హేతుపచ్చయేన పచ్చయో. ఆసవవిప్పయుత్తో అనాసవో అబ్యాకతో ధమ్మో ఆసవవిప్పయుత్తస్స సాసవస్స అబ్యాకతస్స ధమ్మస్స హేతుపచ్చయేన పచ్చయో. ఆసవవిప్పయుత్తో అనాసవో అబ్యాకతో ధమ్మో ఆసవవిప్పయుత్తస్స సాసవస్స అబ్యాకతస్స చ ఆసవవిప్పయుత్తస్స అనాసవస్స అబ్యాకతస్స చ ధమ్మస్స హేతుపచ్చయేన పచ్చయో. (౩)

ఆసవవిప్పయుత్తో సాసవో అబ్యాకతో ధమ్మో ఆసవవిప్పయుత్తస్స సాసవస్స అబ్యాకతస్స ధమ్మస్స ఆరమ్మణపచ్చయేన పచ్చయో. (౧)

ఆసవవిప్పయుత్తో అనాసవో అబ్యాకతో ధమ్మో ఆసవవిప్పయుత్తస్స అనాసవస్స అబ్యాకతస్స ధమ్మస్స ఆరమ్మణపచ్చయేన పచ్చయో. ఆసవవిప్పయుత్తో అనాసవో అబ్యాకతో ధమ్మో ఆసవవిప్పయుత్తస్స సాసవస్స అబ్యాకతస్స ధమ్మస్స ఆరమ్మణపచ్చయేన పచ్చయో. (౨) (సంఖిత్తం.)

౫౫. హేతుయా చత్తారి, ఆరమ్మణే తీణి, అధిపతియా చత్తారి, అనన్తరే చత్తారి, సమనన్తరే చత్తారి, సహజాతే పఞ్చ, అఞ్ఞమఞ్ఞే ద్వే, నిస్సయే సత్త, ఉపనిస్సయే చత్తారి, పురేజాతే ద్వే, ఆసేవనే ఏకం, కమ్మే చత్తారి, విపాకే చత్తారి, ఆహారే చత్తారి…పే… అవిగతే సత్త (సంఖిత్తం).

పచ్చనీయుద్ధారో

౫౬. ఆసవవిప్పయుత్తో సాసవో అబ్యాకతో ధమ్మో ఆసవవిప్పయుత్తస్స సాసవస్స అబ్యాకతస్స ధమ్మస్స ఆరమ్మణపచ్చయేన పచ్చయో… సహజాతపచ్చయేన పచ్చయో… ఉపనిస్సయపచ్చయేన పచ్చయో… పురేజాతపచ్చయేన పచ్చయో… పచ్ఛాజాతపచ్చయేన పచ్చయో… ఆహారపచ్చయేన పచ్చయో… ఇన్ద్రియపచ్చయేన పచ్చయో (సంఖిత్తం).

౫౭. నహేతుయా సత్త, నఆరమ్మణే సత్త (సంఖిత్తం).

హేతుపచ్చయా నఆరమ్మణే చత్తారి (సంఖిత్తం).

నహేతుపచ్చయా ఆరమ్మణే తీణి (సంఖిత్తం).

(యథా కుసలత్తికే పఞ్హావారస్స అనులోమమ్పి పచ్చనీయమ్పి అనులోమపచ్చనీయమ్పి పచ్చనీయానులోమమ్పి గణితం, ఏవం గణేతబ్బం.)

ఆసవవిప్పయుత్తసాసవదుకకుసలత్తికం నిట్ఠితం.

ఆసవగోచ్ఛకం నిట్ఠితం.