౧-౬. పటిచ్చవారాది

పచ్చయచతుక్కం

హేతుపచ్చయో

౪౭. హేతుఞ్చేవ సహేతుకఞ్చ కుసలం ధమ్మం పటిచ్చ హేతు చేవ సహేతుకో చ కుసలో ధమ్మో ఉప్పజ్జతి హేతుపచ్చయా… తీణి.

సహేతుకఞ్చేవ న చ హేతుం కుసలం ధమ్మం పటిచ్చ సహేతుకో చేవ న చ హేతు కుసలో ధమ్మో ఉప్పజ్జతి హేతుపచ్చయా… తీణి.

హేతుఞ్చేవ సహేతుకఞ్చ కుసలఞ్చ సహేతుకఞ్చేవ న చ హేతుం కుసలఞ్చ ధమ్మం పటిచ్చ హేతు చేవ సహేతుకో చ కుసలో ధమ్మో ఉప్పజ్జతి హేతుపచ్చయా… తీణి (సంఖిత్తం).

౪౮. హేతుయా నవ, ఆరమ్మణే నవ…పే… కమ్మే నవ, ఆహారే నవ…పే… అవిగతే నవ (సంఖిత్తం).

నఅధిపతిపచ్చయో

౪౯. హేతుఞ్చేవ సహేతుకఞ్చ కుసలం ధమ్మం పటిచ్చ హేతు చేవ సహేతుకో చ కుసలో ధమ్మో ఉప్పజ్జతి నఅధిపతిపచ్చయా (సంఖిత్తం).

౫౦. నఅధిపతియా నవ, నపురేజాతే నవ, నపచ్ఛాజాతే నవ, నఆసేవనే నవ, నకమ్మే తీణి, నవిపాకే నవ, నవిప్పయుత్తే నవ (సంఖిత్తం).

హేతుపచ్చయా నఅధిపతియా నవ (సంఖిత్తం).

నఅధిపతిపచ్చయా హేతుయా నవ (సంఖిత్తం).

(సహజాతవారోపి పచ్చయవారోపి నిస్సయవారోపి సంసట్ఠవారోపి సమ్పయుత్తవారోపి పటిచ్చవారసదిసా విత్థారేతబ్బా.)