౧-౭. పటిచ్చవారాది

పచ్చయచతుక్కం

హేతుపచ్చయో

౭౭. అనుపాదిన్నుపాదానియం సరణం ధమ్మం పటిచ్చ అనుపాదిన్నుపాదానియో సరణో ధమ్మో ఉప్పజ్జతి హేతుపచ్చయా (సంఖిత్తం).

హేతుయా ఏకం…పే… అవిగతే ఏకం (సంఖిత్తం).

(సహజాతవారేపి…పే… పఞ్హావారేపి సబ్బత్థ ఏకం).

౭౮. ఉపాదిన్నుపాదానియం అరణం ధమ్మం పటిచ్చ ఉపాదిన్నుపాదానియో అరణో ధమ్మో ఉప్పజ్జతి హేతుపచ్చయా… తీణి.

అనుపాదిన్నుపాదానియం అరణం ధమ్మం పటిచ్చ అనుపాదిన్నుపాదానియో అరణో ధమ్మో ఉప్పజ్జతి హేతుపచ్చయా. (౧)

అనుపాదిన్నఅనుపాదానియం అరణం ధమ్మం పటిచ్చ అనుపాదిన్నఅనుపాదానియో అరణో ధమ్మో ఉప్పజ్జతి హేతుపచ్చయా… తీణి.

ఉపాదిన్నుపాదానియం అరణఞ్చ అనుపాదిన్నుపాదానియం అరణఞ్చ ధమ్మం పటిచ్చ అనుపాదిన్నుపాదానియో అరణో ధమ్మో ఉప్పజ్జతి హేతుపచ్చయా. (౧)

అనుపాదిన్నుపాదానియం అరణఞ్చ అనుపాదిన్నఅనుపాదానియం అరణఞ్చ ధమ్మం పటిచ్చ అనుపాదిన్నుపాదానియో అరణో ధమ్మో ఉప్పజ్జతి హేతుపచ్చయా. (౧) (సంఖిత్తం.)

౭౯. హేతుయా నవ, ఆరమ్మణే తీణి…పే… అవిగతే నవ (సంఖిత్తం). (సహజాతవారమ్పి…పే… సమ్పయుత్తవారమ్పి పటిచ్చవారసదిసం).

౮౦. ఉపాదిన్నుపాదానియో అరణో ధమ్మో ఉపాదిన్నుపాదానియస్స అరణస్స ధమ్మస్స హేతుపచ్చయేన పచ్చయో… తీణి.

అనుపాదిన్నుపాదానియో అరణో ధమ్మో అనుపాదిన్నుపాదానియస్స అరణస్స ధమ్మస్స హేతుపచ్చయేన పచ్చయో. (౧)

అనుపాదిన్నఅనుపాదానియో అరణో ధమ్మో అనుపాదిన్నఅనుపాదానియస్స అరణస్స ధమ్మస్స హేతుపచ్చయేన పచ్చయో… తీణి (సంఖిత్తం).

౮౧. హేతుయా సత్త, ఆరమ్మణే ఛ…పే… అవిగతే తేవీస.

(సంఖిత్తం. యథా కుసలత్తికే పఞ్హావారం, ఏవం విత్థారేతబ్బం.)