౧. విభఙ్గవారో

హేతుపచ్చయో

౭౫. కిలేసో చేవ సంకిలేసికో చ ధమ్మో కిలేసస్స చేవ సంకిలేసికస్స చ ధమ్మస్స హేతుపచ్చయేన పచ్చయో – కిలేసా చేవ సంకిలేసికా చ హేతూ సమ్పయుత్తకానం కిలేసానం హేతుపచ్చయేన పచ్చయో (ఏవం చత్తారి, కిలేసదుకసదిసం.) (౪)

ఆరమ్మణపచ్చయో

౭౬. కిలేసో చేవ సంకిలేసికో చ ధమ్మో కిలేసస్స చేవ సంకిలేసికస్స చ ధమ్మస్స ఆరమ్మణపచ్చయేన పచ్చయో – కిలేసే ఆరబ్భ కిలేసా ఉప్పజ్జన్తి. (మూలం కాతబ్బం.) కిలేసే ఆరబ్భ సంకిలేసికా చేవ నో చ కిలేసా ఖన్ధా ఉప్పజ్జన్తి. (మూలం కాతబ్బం.) కిలేసే ఆరబ్భ కిలేసా చ సమ్పయుత్తకా చ ఖన్ధా ఉప్పజ్జన్తి. (౩)

౭౭. సంకిలేసికో చేవ నో చ కిలేసో ధమ్మో సంకిలేసికస్స చేవ నో చ కిలేసస్స ధమ్మస్స ఆరమ్మణపచ్చయేన పచ్చయో – దానం…పే… సీలం…పే… ఉపోసథకమ్మం…పే… పుబ్బే సుచిణ్ణాని…పే… ఝానా వుట్ఠహిత్వా ఝానం పచ్చవేక్ఖతి, అస్సాదేతి అభినన్దతి, తం ఆరబ్భ రాగో ఉప్పజ్జతి…పే… ఉద్ధచ్చం ఉప్పజ్జతి, ఝానే పరిహీనే విప్పటిసారిస్స దోమనస్సం ఉప్పజ్జతి; అరియా గోత్రభుం పచ్చవేక్ఖన్తి, వోదానం పచ్చవేక్ఖన్తి, చక్ఖుం…పే… వత్థుం సంకిలేసికే చేవ నో చ కిలేసే ఖన్ధే అనిచ్చతో…పే… దోమనస్సం ఉప్పజ్జతి; దిబ్బేన చక్ఖునా రూపం పస్సతి…పే… ఆవజ్జనాయ ఆరమ్మణపచ్చయేన పచ్చయో (ఇతరే ద్వే కిలేసదుకసదిసా, ఘటనారమ్మణాపి కిలేసదుకసదిసా).

అధిపతిపచ్చయో

౭౮. కిలేసో చేవ సంకిలేసికో చ ధమ్మో కిలేసస్స చేవ సంకిలేసికస్స చ ధమ్మస్స అధిపతిపచ్చయేన పచ్చయో – ఆరమ్మణాధిపతి… తీణి.

సంకిలేసికో చేవ నో చ కిలేసో ధమ్మో సంకిలేసికస్స చేవ నో చ కిలేసస్స ధమ్మస్స అధిపతిపచ్చయేన పచ్చయో – ఆరమ్మణాధిపతి, సహజాతాధిపతి. ఆరమ్మణాధిపతి – దానం…పే… సీలం…పే… ఉపోసథకమ్మం…పే… పుబ్బే సుచిణ్ణాని…పే… ఝానా వుట్ఠహిత్వా ఝానం గరుం కత్వా పచ్చవేక్ఖతి, సేక్ఖా గోత్రభుం గరుం కత్వా పచ్చవేక్ఖన్తి, వోదానం గరుం కత్వా పచ్చవేక్ఖన్తి; చక్ఖుం…పే… వత్థుం సంకిలేసికే చేవ నో చ కిలేసే ఖన్ధే గరుం కత్వా సంకిలేసికా చేవ నో చ కిలేసా ఖన్ధా ఉప్పజ్జన్తి. సహజాతాధిపతి – సంకిలేసికా చేవ నో చ కిలేసాధిపతి సమ్పయుత్తకానం ఖన్ధానం చిత్తసముట్ఠానానఞ్చ రూపానం అధిపతిపచ్చయేన పచ్చయో. (ఇతరే ద్వేపి కిలేసదుకసదిసా. ఘటనాధిపతిపి.)

అనన్తరపచ్చయాది

౭౯. కిలేసో చేవ సంకిలేసికో చ ధమ్మో కిలేసస్స చేవ సంకిలేసికస్స చ ధమ్మస్స అనన్తరపచ్చయేన పచ్చయో… తీణి (కిలేసదుకసదిసా).

సంకిలేసికో చేవ నో చ కిలేసో ధమ్మో సంకిలేసికస్స చేవ నో చ కిలేసస్స ధమ్మస్స అనన్తరపచ్చయేన పచ్చయో – పురిమా పురిమా సంకిలేసికా చేవ నో చ కిలేసా ఖన్ధా పచ్ఛిమానం పచ్ఛిమానం సంకిలేసికానఞ్చేవ నో చ కిలేసానం ఖన్ధానం అనన్తరపచ్చయేన పచ్చయో; అనులోమం గోత్రభుస్స… అనులోమం వోదానస్స… ఆవజ్జనా సంకిలేసికానఞ్చేవ నో చ కిలేసానం ఖన్ధానం అనన్తరపచ్చయేన పచ్చయో.

(ఇతరే ద్వే అనన్తరా కిలేసదుకసదిసా, నిన్నానాకరణా. ఘటనానన్తరమ్పి సబ్బే పచ్చయా కిలేసదుకసదిసా, నిన్నానాకరణా. ఉపనిస్సయే లోకుత్తరం నత్థి, ఇదం దుకం కిలేసదుకసదిసం, నిన్నానాకరణం.)

కిలేససంకిలేసికదుకం నిట్ఠితం.