౧. విభఙ్గవారో

హేతుపచ్చయో

౫౧. సంకిలిట్ఠో ధమ్మో సంకిలిట్ఠస్స ధమ్మస్స హేతుపచ్చయేన పచ్చయో – సంకిలిట్ఠా హేతూ సమ్పయుత్తకానం ఖన్ధానం హేతుపచ్చయేన పచ్చయో. (౧)

సంకిలిట్ఠో ధమ్మో అసంకిలిట్ఠస్స ధమ్మస్స హేతుపచ్చయేన పచ్చయో – సంకిలిట్ఠా హేతూ చిత్తసముట్ఠానానం రూపానం హేతుపచ్చయేన పచ్చయో. (౨)

సంకిలిట్ఠో ధమ్మో సంకిలిట్ఠస్స చ అసంకిలిట్ఠస్స చ ధమ్మస్స హేతుపచ్చయేన పచ్చయో – సంకిలిట్ఠా హేతూ సమ్పయుత్తకానం ఖన్ధానం చిత్తసముట్ఠానానఞ్చ రూపానం హేతుపచ్చయేన పచ్చయో. (౩)

అసంకిలిట్ఠో ధమ్మో అసంకిలిట్ఠస్స ధమ్మస్స హేతుపచ్చయేన పచ్చయో – అసంకిలిట్ఠా హేతూ సమ్పయుత్తకానం ఖన్ధానం చిత్తసముట్ఠానానఞ్చ రూపానం హేతుపచ్చయేన పచ్చయో; పటిసన్ధిక్ఖణే…పే…. (౧)

ఆరమ్మణపచ్చయో

౫౨. సంకిలిట్ఠో ధమ్మో సంకిలిట్ఠస్స ధమ్మస్స ఆరమ్మణపచ్చయేన పచ్చయో – రాగం అస్సాదేతి అభినన్దతి, తం ఆరబ్భ రాగో ఉప్పజ్జతి, దిట్ఠి ఉప్పజ్జతి; విచికిచ్ఛా…పే… ఉద్ధచ్చ…పే… దోమనస్సం ఉప్పజ్జతి; దిట్ఠిం అస్సాదేతి…పే… (కుసలత్తికసదిసం); విచికిచ్ఛం ఆరబ్భ…పే… ఉద్ధచ్చం ఆరబ్భ…పే… దోమనస్సం ఉప్పజ్జతి; దిట్ఠి…పే… విచికిచ్ఛా…పే… ఉద్ధచ్చం ఉప్పజ్జతి. (౧)

సంకిలిట్ఠో ధమ్మో అసంకిలిట్ఠస్స ధమ్మస్స ఆరమ్మణపచ్చయేన పచ్చయో – అరియా పహీనే కిలేసే పచ్చవేక్ఖన్తి, విక్ఖమ్భితే కిలేసే…పే… పుబ్బే సముదాచిణ్ణే…పే… సంకిలిట్ఠే ఖన్ధే అనిచ్చతో…పే… విపస్సతి, చేతోపరియఞాణేన సంకిలిట్ఠచిత్తసమఙ్గిస్స చిత్తం జానాతి; సంకిలిట్ఠా ఖన్ధా చేతోపరియఞాణస్స, పుబ్బేనివాసానుస్సతిఞాణస్స, యథాకమ్మూపగఞాణస్స, అనాగతంసఞాణస్స, ఆవజ్జనాయ ఆరమ్మణపచ్చయేన పచ్చయో. (౨)

౫౩. అసంకిలిట్ఠో ధమ్మో అసంకిలిట్ఠస్స ధమ్మస్స ఆరమ్మణపచ్చయేన పచ్చయో – దానం…పే… సీలం…పే… ఉపోసథకమ్మం…పే… పుబ్బే…పే… ఝానా వుట్ఠహిత్వా ఝానం పచ్చవేక్ఖతి, అరియా మగ్గా వుట్ఠహిత్వా మగ్గం పచ్చవేక్ఖన్తి…పే… ఆవజ్జనాయ ఆరమ్మణపచ్చయేన పచ్చయో; చక్ఖుం…పే… వత్థుం అసంకిలిట్ఠే ఖన్ధే అనిచ్చతో…పే… విపస్సతి, దిబ్బేన చక్ఖునా రూపం పస్సతి…పే… అనాగతంసఞాణస్స, ఆవజ్జనాయ ఆరమ్మణపచ్చయేన పచ్చయో. (౧)

అసంకిలిట్ఠో ధమ్మో సంకిలిట్ఠస్స ధమ్మస్స ఆరమ్మణపచ్చయేన పచ్చయో – దానం…పే… సీలం…పే… ఝానా వుట్ఠహిత్వా…పే… చక్ఖుం…పే… వత్థుం అసంకిలిట్ఠే ఖన్ధే అస్సాదేతి అభినన్దతి, తం ఆరబ్భ రాగో…పే… దోమనస్సం ఉప్పజ్జతి. (౨)

అధిపతిపచ్చయో

౫౪. సంకిలిట్ఠో ధమ్మో సంకిలిట్ఠస్స ధమ్మస్స అధిపతిపచ్చయేన పచ్చయో – ఆరమ్మణాధిపతి, సహజాతాధిపతి. ఆరమ్మణాధిపతి – రాగం గరుం కత్వా అస్సాదేతి అభినన్దతి, తం గరుం కత్వా రాగో ఉప్పజ్జతి, దిట్ఠి ఉప్పజ్జతి; దిట్ఠిం గరుం కత్వా అస్సాదేతి అభినన్దతి, తం గరుం కత్వా రాగో ఉప్పజ్జతి, దిట్ఠి ఉప్పజ్జతి. సహజాతాధిపతి – సంకిలిట్ఠాధిపతి సమ్పయుత్తకానం ఖన్ధానం అధిపతిపచ్చయేన పచ్చయో. (౧)

సంకిలిట్ఠో ధమ్మో అసంకిలిట్ఠస్స ధమ్మస్స అధిపతిపచ్చయేన పచ్చయో. సహజాతాధిపతి – సంకిలిట్ఠాధిపతి చిత్తసముట్ఠానానం రూపానం అధిపతిపచ్చయేన పచ్చయో. (౨)

సంకిలిట్ఠో ధమ్మో సంకిలిట్ఠస్స చ అసంకిలిట్ఠస్స చ ధమ్మస్స అధిపతిపచ్చయేన పచ్చయో. సహజాతాధిపతి – సంకిలిట్ఠాధిపతి సమ్పయుత్తకానం ఖన్ధానం చిత్తసముట్ఠానానఞ్చ రూపానం అధిపతిపచ్చయేన పచ్చయో. (౩)

౫౫. అసంకిలిట్ఠో ధమ్మో అసంకిలిట్ఠస్స ధమ్మస్స అధిపతిపచ్చయేన పచ్చయో – ఆరమ్మణాధిపతి, సహజాతాధిపతి. ఆరమ్మణాధిపతి – దానం…పే… సీలం…పే… ఉపోసథకమ్మం…పే… పుబ్బే…పే… ఝానా వుట్ఠహిత్వా ఝానం గరుం కత్వా పచ్చవేక్ఖతి, అరియా మగ్గా వుట్ఠహిత్వా మగ్గం గరుం కత్వా పచ్చవేక్ఖన్తి…పే… నిబ్బానం ఫలస్స అధిపతిపచ్చయేన పచ్చయో. సహజాతాధిపతి – అసంకిలిట్ఠాధిపతి సమ్పయుత్తకానం ఖన్ధానం చిత్తసముట్ఠానానఞ్చ రూపానం అధిపతిపచ్చయేన పచ్చయో. (౧)

అసంకిలిట్ఠో ధమ్మో సంకిలిట్ఠస్స ధమ్మస్స అధిపతిపచ్చయేన పచ్చయో. ఆరమ్మణాధిపతి – దానం…పే… సీలం…పే… ఉపోసథకమ్మం…పే… పుబ్బే…పే… ఝానా వుట్ఠహిత్వా…పే… చక్ఖుం…పే… వత్థుం అసంకిలిట్ఠే ఖన్ధే గరుం కత్వా అస్సాదేతి అభినన్దతి, తం గరుం కత్వా రాగో ఉప్పజ్జతి, దిట్ఠి ఉప్పజ్జతి. (౨)

అనన్తరపచ్చయాది

౫౬. సంకిలిట్ఠో ధమ్మో సంకిలిట్ఠస్స ధమ్మస్స అనన్తరపచ్చయేన పచ్చయో – పురిమా పురిమా సంకిలిట్ఠా ఖన్ధా పచ్ఛిమానం పచ్ఛిమానం సంకిలిట్ఠానం ఖన్ధానం అనన్తరపచ్చయేన పచ్చయో. (౧)

సంకిలిట్ఠో ధమ్మో అసంకిలిట్ఠస్స ధమ్మస్స అనన్తరపచ్చయేన పచ్చయో – సంకిలిట్ఠా ఖన్ధా వుట్ఠానస్స అనన్తరపచ్చయేన పచ్చయో. (౨)

౫౭. అసంకిలిట్ఠో ధమ్మో అసంకిలిట్ఠస్స ధమ్మస్స అనన్తరపచ్చయేన పచ్చయో – పురిమా పురిమా అసంకిలిట్ఠా ఖన్ధా పచ్ఛిమానం పచ్ఛిమానం అసంకిలిట్ఠానం ఖన్ధానం…పే… ఫలసమాపత్తియా అనన్తరపచ్చయేన పచ్చయో. (౧)

అసంకిలిట్ఠో ధమ్మో సంకిలిట్ఠస్స ధమ్మస్స అనన్తరపచ్చయేన పచ్చయో – ఆవజ్జనా సంకిలిట్ఠానం ఖన్ధానం అనన్తరపచ్చయేన పచ్చయో. (౨)

సమనన్తరపచ్చయేన పచ్చయో… చత్తారి… సహజాతపచ్చయేన పచ్చయో… పఞ్చ… అఞ్ఞమఞ్ఞపచ్చయేన పచ్చయో… ద్వే… నిస్సయపచ్చయేన పచ్చయో… సత్త.

ఉపనిస్సయపచ్చయో

౫౮. సంకిలిట్ఠో ధమ్మో సంకిలిట్ఠస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – రాగం ఉపనిస్సాయ పాణం హనతి…పే… సఙ్ఘం భిన్దతి, దోసం…పే… పత్థనం ఉపనిస్సాయ పాణం హనతి…పే… సఙ్ఘం భిన్దతి, రాగో…పే… పత్థనా రాగస్స…పే… పత్థనాయ ఉపనిస్సయపచ్చయేన పచ్చయో. (౧)

సంకిలిట్ఠో ధమ్మో అసంకిలిట్ఠస్స ధమ్మస్స ఉపనిస్సయపచ్చయేన పచ్చయో – అనన్తరూపనిస్సయో, పకతూపనిస్సయో…పే…. పకతూపనిస్సయో – రాగం ఉపనిస్సాయ దానం దేతి…పే… సమాపత్తిం ఉప్పాదేతి, దోసం…పే… పత్థనం ఉపనిస్సాయ దానం దేతి…పే… సమాపత్తిం ఉప్పాదేతి, రాగో…పే… పత్థనా సద్ధాయ…పే… పఞ్ఞాయ కాయికస్స సుఖస్స… కాయికస్స దుక్ఖస్స… మగ్గస్స, ఫలసమాపత్తియా ఉపనిస్సయపచ్చయేన పచ్చయో. (౨)

౫౯. అసంకిలిట్ఠో ధమ్మో అసంకిలిట్ఠస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – సద్ధం ఉపనిస్సాయ దానం దేతి…పే… సమాపత్తిం ఉప్పాదేతి; సీలం…పే… పఞ్ఞం, కాయికం సుఖం… కాయికం దుక్ఖం… ఉతుం… భోజనం… సేనాసనం ఉపనిస్సాయ దానం దేతి…పే… సమాపత్తిం ఉప్పాదేతి; సద్ధా…పే… సేనాసనం సద్ధాయ…పే… ఫలసమాపత్తియా ఉపనిస్సయపచ్చయేన పచ్చయో. (౧)

అసంకిలిట్ఠో ధమ్మో సంకిలిట్ఠస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – సద్ధం ఉపనిస్సాయ మానం జప్పేతి, దిట్ఠిం గణ్హాతి; సీలం…పే… పఞ్ఞం… కాయికం సుఖం… కాయికం దుక్ఖం… ఉతుం… భోజనం… సేనాసనం ఉపనిస్సాయ పాణం హనతి…పే… సఙ్ఘం భిన్దతి; సద్ధా…పే… సేనాసనం రాగస్స…పే… పత్థనాయ ఉపనిస్సయపచ్చయేన పచ్చయో. (౨)

పురేజాతపచ్చయో

౬౦. అసంకిలిట్ఠో ధమ్మో అసంకిలిట్ఠస్స ధమ్మస్స పురేజాతపచ్చయేన పచ్చయో – ఆరమ్మణపురేజాతం, వత్థుపురేజాతం (సంఖిత్తం). అసంకిలిట్ఠో ధమ్మో సంకిలిట్ఠస్స ధమ్మస్స పురేజాతపచ్చయేన పచ్చయో – ఆరమ్మణపురేజాతం, వత్థుపురేజాతం (సంఖిత్తం). (౨)

పచ్ఛాజాతాసేవనపచ్చయా

౬౧. సంకిలిట్ఠో ధమ్మో అసంకిలిట్ఠస్స ధమ్మస్స పచ్ఛాజాతపచ్చయేన పచ్చయో (సంఖిత్తం). అసంకిలిట్ఠో ధమ్మో అసంకిలిట్ఠస్స ధమ్మస్స పచ్ఛాజాతపచ్చయేన పచ్చయో (సంఖిత్తం). …ఆసేవనపచ్చయేన పచ్చయో… ద్వే.

కమ్మపచ్చయో

౬౨. సంకిలిట్ఠో ధమ్మో సంకిలిట్ఠస్స ధమ్మస్స కమ్మపచ్చయేన పచ్చయో – సంకిలిట్ఠా చేతనా సమ్పయుత్తకానం ఖన్ధానం కమ్మపచ్చయేన పచ్చయో. (౧)

సంకిలిట్ఠో ధమ్మో అసంకిలిట్ఠస్స ధమ్మస్స కమ్మపచ్చయేన పచ్చయో – సహజాతా, నానాక్ఖణికా. సహజాతా – సంకిలిట్ఠా చేతనా చిత్తసముట్ఠానానం రూపానం కమ్మపచ్చయేన పచ్చయో. నానాక్ఖణికా – సంకిలిట్ఠా చేతనా విపాకానం ఖన్ధానం కటత్తా చ రూపానం కమ్మపచ్చయేన పచ్చయో. (మూలం కాతబ్బం.) సంకిలిట్ఠా చేతనా సమ్పయుత్తకానం ఖన్ధానం చిత్తసముట్ఠానానఞ్చ రూపానం కమ్మపచ్చయేన పచ్చయో. (౩)

అసంకిలిట్ఠో ధమ్మో అసంకిలిట్ఠస్స ధమ్మస్స కమ్మపచ్చయేన పచ్చయో – సహజాతా, నానాక్ఖణికా. సహజాతా – అసంకిలిట్ఠా చేతనా సమ్పయుత్తకానం ఖన్ధానం చిత్తసముట్ఠానానఞ్చ రూపానం కమ్మపచ్చయేన పచ్చయో; పటిసన్ధిక్ఖణే…పే…. నానాక్ఖణికా – అసంకిలిట్ఠా చేతనా విపాకానం ఖన్ధానం కటత్తా చ రూపానం కమ్మపచ్చయేన పచ్చయో. (౧)

విపాకపచ్చయాది

౬౩. అసంకిలిట్ఠో ధమ్మో అసంకిలిట్ఠస్స ధమ్మస్స విపాకపచ్చయేన పచ్చయో… ఏకం.

సంకిలిట్ఠో ధమ్మో సంకిలిట్ఠస్స ధమ్మస్స ఆహారపచ్చయేన పచ్చయో… ఇన్ద్రియపచ్చయేన పచ్చయో… ఝానపచ్చయేన పచ్చయో… మగ్గపచ్చయేన పచ్చయో… సమ్పయుత్తపచ్చయేన పచ్చయో.

విప్పయుత్తపచ్చయో

౬౪. సంకిలిట్ఠో ధమ్మో అసంకిలిట్ఠస్స ధమ్మస్స విప్పయుత్తపచ్చయేన పచ్చయో – సహజాతం, పచ్ఛాజాతం (సంఖిత్తం). (౧)

అసంకిలిట్ఠో ధమ్మో అసంకిలిట్ఠస్స ధమ్మస్స విప్పయుత్తపచ్చయేన పచ్చయో – సహజాతం, పురేజాతం, పచ్ఛాజాతం (సంఖిత్తం). (౧)

అసంకిలిట్ఠో ధమ్మో సంకిలిట్ఠస్స ధమ్మస్స విప్పయుత్తపచ్చయేన పచ్చయో. పురేజాతం – వత్థు సంకిలిట్ఠానం ఖన్ధానం విప్పయుత్తపచ్చయేన పచ్చయో. (౨)

అత్థిపచ్చయాది

౬౫. సంకిలిట్ఠో ధమ్మో సంకిలిట్ఠస్స ధమ్మస్స అత్థిపచ్చయేన పచ్చయో … ఏకం (పటిచ్చవారసదిసం). సంకిలిట్ఠో ధమ్మో అసంకిలిట్ఠస్స ధమ్మస్స అత్థిపచ్చయేన పచ్చయో – సహజాతం, పచ్ఛాజాతం (సంఖిత్తం). సంకిలిట్ఠో ధమ్మో సంకిలిట్ఠస్స చ అసంకిలిట్ఠస్స చ ధమ్మస్స అత్థిపచ్చయేన పచ్చయో (పటిచ్చసదిసం). (౩)

అసంకిలిట్ఠో ధమ్మో అసంకిలిట్ఠస్స ధమ్మస్స అత్థిపచ్చయేన పచ్చయో – సహజాతం, పురేజాతం, పచ్ఛాజాతం, ఆహారం, ఇన్ద్రియం (సంఖిత్తం). అసంకిలిట్ఠో ధమ్మో సంకిలిట్ఠస్స ధమ్మస్స అత్థిపచ్చయేన పచ్చయో – పురేజాతం (సంఖిత్తం). (౨)

౬౬. సంకిలిట్ఠో చ అసంకిలిట్ఠో చ ధమ్మా సంకిలిట్ఠస్స ధమ్మస్స అత్థిపచ్చయేన పచ్చయో – సహజాతం, పురేజాతం. సహజాతో – సంకిలిట్ఠో ఏకో ఖన్ధో చ వత్థు చ తిణ్ణన్నం ఖన్ధానం అత్థిపచ్చయేన పచ్చయో…పే… ద్వే ఖన్ధా చ…పే… (సంఖిత్తం). (౧)

సంకిలిట్ఠో చ అసంకిలిట్ఠో చ ధమ్మా అసంకిలిట్ఠస్స ధమ్మస్స అత్థిపచ్చయేన పచ్చయో – సహజాతం, పచ్ఛాజాతం, ఆహారం, ఇన్ద్రియం. సహజాతా – సంకిలిట్ఠా ఖన్ధా చ మహాభూతా చ చిత్తసముట్ఠానానం రూపానం అత్థిపచ్చయేన పచ్చయో. పచ్ఛాజాతా – సంకిలిట్ఠా ఖన్ధా చ కబళీకారో ఆహారో చ ఇమస్స కాయస్స అత్థిపచ్చయేన పచ్చయో. పచ్ఛాజాతా – సంకిలిట్ఠా ఖన్ధా చ రూపజీవితిన్ద్రియఞ్చ కటత్తారూపానం అత్థిపచ్చయేన పచ్చయో. (౨)

నత్థిపచ్చయేన పచ్చయో… విగతపచ్చయేన పచ్చయో… అవిగతపచ్చయేన పచ్చయో.