౭. పఞ్హావారో

పచ్చయచతుక్కం

హేతుపచ్చయాది

౧౨౮. హేతు విపాకధమ్మధమ్మో హేతుస్స విపాకధమ్మధమ్మస్స హేతుపచ్చయేన పచ్చయో… తీణి.

౧౨౯. హేతు విపాకధమ్మధమ్మో హేతుస్స విపాకధమ్మధమ్మస్స ఆరమ్మణపచ్చయేన పచ్చయో… నవ.

౧౩౦. హేతు విపాకధమ్మధమ్మో హేతుస్స విపాకధమ్మధమ్మస్స అధిపతిపచ్చయేన పచ్చయో – ఆరమ్మణాధిపతి, సహజాతాధిపతి… నవ.

౧౩౧. హేతు విపాకధమ్మధమ్మో హేతుస్స విపాకధమ్మధమ్మస్స అనన్తరపచ్చయేన పచ్చయో…పే… ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో… నవ …ఆసేవనపచ్చయేన పచ్చయో… నవ.

౧౩౨. నహేతు విపాకధమ్మధమ్మో నహేతుస్స విపాకధమ్మధమ్మస్స కమ్మపచ్చయేన పచ్చయో… తీణి.

నహేతు విపాకధమ్మధమ్మో నహేతుస్స విపాకధమ్మధమ్మస్స ఆహారపచ్చయేన పచ్చయో (సంఖిత్తం).

౧౩౩. హేతుయా తీణి, ఆరమ్మణే నవ, అధిపతియా నవ, అనన్తరే నవ, సమనన్తరే నవ, సహజాతే నవ, అఞ్ఞమఞ్ఞే నవ, నిస్సయే నవ, ఉపనిస్సయే నవ, ఆసేవనే నవ, కమ్మే తీణి, ఆహారే తీణి, ఇన్ద్రియే నవ, ఝానే తీణి, మగ్గే నవ, సమ్పయుత్తే నవ, అత్థియా నవ, నత్థియా నవ, విగతే నవ, అవిగతే నవ (సంఖిత్తం, అనులోమం).

పచ్చనీయుద్ధారో

౧౩౪. హేతు విపాకధమ్మధమ్మో హేతుస్స విపాకధమ్మధమ్మస్స ఆరమ్మణపచ్చయేన పచ్చయో… సహజాతపచ్చయేన పచ్చయో… ఉపనిస్సయపచ్చయేన పచ్చయో (సంఖిత్తం).

౧౩౫. నహేతుయా నవ, నఆరమ్మణే నవ (సంఖిత్తం, పచ్చనీయం).

హేతుపచ్చయా నఆరమ్మణే తీణి (సంఖిత్తం, అనులోమపచ్చనీయం).

నహేతుపచ్చయా ఆరమ్మణే నవ (సంఖిత్తం, పచ్చనీయానులోమం).

(యథా కుసలత్తికే పఞ్హావారస్స అనులోమమ్పి పచ్చనీయమ్పి అనులోమపచ్చనీయమ్పి పచ్చనీయానులోమమ్పి గణితం, ఏవం గణేతబ్బం.)