౧. విభఙ్గవారో

హేతుపచ్చయో

౩౧౩. నియ్యానికో ధమ్మో నియ్యానికస్స ధమ్మస్స హేతుపచ్చయేన పచ్చయో – నియ్యానికా హేతూ సమ్పయుత్తకానం ఖన్ధానం హేతుపచ్చయేన పచ్చయో. (మూలం కాతబ్బం.) నియ్యానికా హేతూ చిత్తసముట్ఠానానం రూపానం హేతుపచ్చయేన పచ్చయో. (మూలం కాతబ్బం.) నియ్యానికా హేతూ సమ్పయుత్తకానం ఖన్ధానం చిత్తసముట్ఠానానఞ్చ రూపానం హేతుపచ్చయేన పచ్చయో. (౩)

అనియ్యానికో ధమ్మో అనియ్యానికస్స ధమ్మస్స హేతుపచ్చయేన పచ్చయో – అనియ్యానికా హేతూ సమ్పయుత్తకానం ఖన్ధానం చిత్తసముట్ఠానానఞ్చ రూపానం హేతుపచ్చయేన పచ్చయో; పటిసన్ధిక్ఖణే…పే…. (౧)

ఆరమ్మణపచ్చయో

౩౧౪. నియ్యానికో ధమ్మో అనియ్యానికస్స ధమ్మస్స ఆరమ్మణపచ్చయేన పచ్చయో – అరియా మగ్గా వుట్ఠహిత్వా మగ్గం పచ్చవేక్ఖన్తి, చేతోపరియఞాణేన నియ్యానికచిత్తసమఙ్గిస్స చిత్తం జానాతి, నియ్యానికా ఖన్ధా చేతోపరియఞాణస్స, పుబ్బేనివాసానుస్సతిఞాణస్స, అనాగతంసఞాణస్స, ఆవజ్జనాయ ఆరమ్మణపచ్చయేన పచ్చయో. (౧)

అనియ్యానికో ధమ్మో అనియ్యానికస్స ధమ్మస్స ఆరమ్మణపచ్చయేన పచ్చయో – దానం…పే… సీలం…పే… ఉపోసథకమ్మం కత్వా తం పచ్చవేక్ఖతి అస్సాదేతి అభినన్దతి, తం ఆరబ్భ రాగో ఉప్పజ్జతి…పే… దోమనస్సం ఉప్పజ్జతి; పుబ్బే సుచిణ్ణాని…పే… ఝానా…పే… అరియా ఫలం పచ్చవేక్ఖన్తి, నిబ్బానం పచ్చవేక్ఖన్తి, నిబ్బానం గోత్రభుస్స, వోదానస్స, ఫలస్స, ఆవజ్జనాయ ఆరమ్మణపచ్చయేన పచ్చయో; అరియా పహీనే కిలేసే…పే… విక్ఖమ్భితే…పే… పుబ్బే సముదాచిణ్ణే…పే… చక్ఖుం…పే… వత్థుం అనియ్యానికే ఖన్ధే అనిచ్చతో…పే… దోమనస్సం ఉప్పజ్జతి; దిబ్బేన చక్ఖునా రూపం పస్సతి, దిబ్బాయ సోతధాతుయా సద్దం సుణాతి, చేతోపరియఞాణేన అనియ్యానికచిత్తసమఙ్గిస్స చిత్తం జానాతి, ఆకాసానఞ్చాయతనం విఞ్ఞాణఞ్చాయతనస్స…పే… ఆకిఞ్చఞ్ఞాయతనం నేవసఞ్ఞానాసఞ్ఞాయతనస్స…పే… రూపాయతనం చక్ఖువిఞ్ఞాణస్స…పే… ఫోట్ఠబ్బాయతనం కాయవిఞ్ఞాణస్స…పే… అనియ్యానికా ఖన్ధా ఇద్ధివిధఞాణస్స, చేతోపరియఞాణస్స, పుబ్బేనివాసానుస్సతిఞాణస్స, యథాకమ్మూపగఞాణస్స, అనాగతంసఞాణస్స, ఆవజ్జనాయ ఆరమ్మణపచ్చయేన పచ్చయో.

అనియ్యానికో ధమ్మో నియ్యానికస్స ధమ్మస్స ఆరమ్మణపచ్చయేన పచ్చయో – నిబ్బానం మగ్గస్స ఆరమ్మణపచ్చయేన పచ్చయో. (౨)

అధిపతిపచ్చయో

౩౧౫. నియ్యానికో ధమ్మో నియ్యానికస్స ధమ్మస్స అధిపతిపచ్చయేన పచ్చయో. సహజాతాధిపతి – నియ్యానికాధిపతి సమ్పయుత్తకానం ఖన్ధానం అధిపతిపచ్చయేన పచ్చయో. నియ్యానికో ధమ్మో అనియ్యానికస్స ధమ్మస్స అధిపతిపచ్చయేన పచ్చయో – ఆరమ్మణాధిపతి, సహజాతాధిపతి. ఆరమ్మణాధిపతి – అరియా మగ్గా వుట్ఠహిత్వా మగ్గం గరుం కత్వా పచ్చవేక్ఖన్తి. సహజాతాధిపతి – నియ్యానికాధిపతి చిత్తసముట్ఠానానం రూపానం అధిపతిపచ్చయేన పచ్చయో. (మూలం కాతబ్బం.) నియ్యానికాధిపతి సమ్పయుత్తకానం ఖన్ధానం చిత్తసముట్ఠానానఞ్చ రూపానం అధిపతిపచ్చయేన పచ్చయో. (౩)

౩౧౬. అనియ్యానికో ధమ్మో అనియ్యానికస్స ధమ్మస్స అధిపతిపచ్చయేన పచ్చయో – ఆరమ్మణాధిపతి, సహజాతాధిపతి. ఆరమ్మణాధిపతి – దానం…పే… సీలం…పే… ఉపోసథకమ్మం కత్వా తం గరుం కత్వా పచ్చవేక్ఖతి అస్సాదేతి అభినన్దతి, తం గరుం కత్వా రాగో ఉప్పజ్జతి, దిట్ఠి ఉప్పజ్జతి, పుబ్బే సుచిణ్ణాని…పే… ఝానా వుట్ఠహిత్వా…పే… అరియా ఫలం గరుం కత్వా పచ్చవేక్ఖన్తి, నిబ్బానం గరుం కత్వా పచ్చవేక్ఖన్తి, నిబ్బానం గోత్రభుస్స, వోదానస్స, ఫలస్స అధిపతిపచ్చయేన పచ్చయో; చక్ఖుం…పే… వత్థుం అనియ్యానికే ఖన్ధే గరుం కత్వా అస్సాదేతి అభినన్దతి, తం గరుం కత్వా రాగో ఉప్పజ్జతి, దిట్ఠి ఉప్పజ్జతి. సహజాతాధిపతి – అనియ్యానికాధిపతి సమ్పయుత్తకానం ఖన్ధానం చిత్తసముట్ఠానానఞ్చ రూపానం అధిపతిపచ్చయేన పచ్చయో. అనియ్యానికో ధమ్మో నియ్యానికస్స ధమ్మస్స అధిపతిపచ్చయేన పచ్చయో. ఆరమ్మణాధిపతి – నిబ్బానం మగ్గస్స అధిపతిపచ్చయేన పచ్చయో. (౨)

అనన్తరపచ్చయాది

౩౧౭. నియ్యానికో ధమ్మో అనియ్యానికస్స ధమ్మస్స అనన్తరపచ్చయేన పచ్చయో – మగ్గో ఫలస్స అనన్తరపచ్చయేన పచ్చయో. (౧)

అనియ్యానికో ధమ్మో అనియ్యానికస్స ధమ్మస్స అనన్తరపచ్చయేన పచ్చయో – పురిమా పురిమా అనియ్యానికా ఖన్ధా పచ్ఛిమానం పచ్ఛిమానం అనియ్యానికానం ఖన్ధానం అనన్తరపచ్చయేన పచ్చయో; అనులోమం గోత్రభుస్స… అనులోమం వోదానస్స… ఫలం ఫలస్స… అనులోమం ఫలసమాపత్తియా … నిరోధా వుట్ఠహన్తస్స నేవసఞ్ఞానాసఞ్ఞాయతనం ఫలసమాపత్తియా అనన్తరపచ్చయేన పచ్చయో. అనియ్యానికో ధమ్మో నియ్యానికస్స ధమ్మస్స అనన్తరపచ్చయేన పచ్చయో… గోత్రభు మగ్గస్స; వోదానం మగ్గస్స అనన్తరపచ్చయేన పచ్చయో. (౨)

సమనన్తరపచ్చయేన పచ్చయో… సహజాతపచ్చయేన పచ్చయో… పఞ్చ… అఞ్ఞమఞ్ఞపచ్చయేన పచ్చయో… ద్వే… నిస్సయపచ్చయేన పచ్చయో… సత్త.

ఉపనిస్సయపచ్చయో

౩౧౮. నియ్యానికో ధమ్మో నియ్యానికస్స ధమ్మస్స ఉపనిస్సయపచ్చయేన పచ్చయో. పకతూపనిస్సయో – పఠమో మగ్గో దుతియస్స మగ్గస్స ఉపనిస్సయపచ్చయేన పచ్చయో…పే… తతియో మగ్గో చతుత్థస్స మగ్గస్స ఉపనిస్సయపచ్చయేన పచ్చయో. నియ్యానికో ధమ్మో అనియ్యానికస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – అరియా మగ్గం ఉపనిస్సాయ అనుప్పన్నం సమాపత్తిం ఉప్పాదేన్తి, ఉప్పన్నం సమాపజ్జన్తి, సఙ్ఖారే అనిచ్చతో…పే… విపస్సన్తి, మగ్గో అరియానం అత్థపటిసమ్భిదాయ…పే… పటిభానపటిసమ్భిదాయ ఠానాఠానకోసల్లస్స ఉపనిస్సయపచ్చయేన పచ్చయో, మగ్గో ఫలసమాపత్తియా ఉపనిస్సయపచ్చయేన పచ్చయో. (౨)

౩౧౯. అనియ్యానికో ధమ్మో అనియ్యానికస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – అనియ్యానికం సద్ధం ఉపనిస్సాయ దానం దేతి, సీలం…పే… ఉపోసథకమ్మం కరోతి, ఝానం ఉప్పాదేతి… విపస్సనం… అభిఞ్ఞం… సమాపత్తిం ఉప్పాదేతి… మానం జప్పేతి… దిట్ఠిం గణ్హాతి; అనియ్యానికం సీలం…పే… పఞ్ఞం… రాగం…పే… పత్థనం… ఉతుం… భోజనం… సేనాసనం ఉపనిస్సాయ దానం దేతి…పే… సమాపత్తిం ఉప్పాదేతి, పాణం హనతి…పే… సఙ్ఘం భిన్దతి; అనియ్యానికా సద్ధా…పే… సేనాసనం అనియ్యానికాయ సద్ధాయ…పే… పత్థనాయ… కాయికస్స సుఖస్స… కాయికస్స దుక్ఖస్స… ఫలసమాపత్తియా ఉపనిస్సయపచ్చయేన పచ్చయో. అనియ్యానికో ధమ్మో నియ్యానికస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – పఠమస్స మగ్గస్స పరికమ్మం పఠమస్స మగ్గస్స ఉపనిస్సయపచ్చయేన పచ్చయో…పే… చతుత్థస్స మగ్గస్స పరికమ్మం చతుత్థస్స మగ్గస్స ఉపనిస్సయపచ్చయేన పచ్చయో. (౨)

పురేజాతపచ్చయాది

౩౨౦. అనియ్యానికో ధమ్మో అనియ్యానికస్స ధమ్మస్స పురేజాతపచ్చయేన పచ్చయో… ద్వే (అరూపదుకసదిసా కాతబ్బా)… పచ్ఛాజాతపచ్చయేన పచ్చయో… ద్వే… ఆసేవనపచ్చయేన పచ్చయో… ద్వే.

కమ్మపచ్చయో

౩౨౧. నియ్యానికో ధమ్మో నియ్యానికస్స ధమ్మస్స కమ్మపచ్చయేన పచ్చయో – నియ్యానికా చేతనా సమ్పయుత్తకానం ఖన్ధానం కమ్మపచ్చయేన పచ్చయో. నియ్యానికో ధమ్మో అనియ్యానికస్స ధమ్మస్స కమ్మపచ్చయేన పచ్చయో – సహజాతా, నానాక్ఖణికా. సహజాతా – నియ్యానికా చేతనా చిత్తసముట్ఠానానం రూపానం కమ్మపచ్చయేన పచ్చయో. నానాక్ఖణికా – నియ్యానికా చేతనా ఫలస్స కమ్మపచ్చయేన పచ్చయో. (మూలం కాతబ్బం) నియ్యానికా చేతనా సమ్పయుత్తకానం ఖన్ధానం చిత్తసముట్ఠానానఞ్చ రూపానం కమ్మపచ్చయేన పచ్చయో. (౩)

౩౨౨. అనియ్యానికో ధమ్మో అనియ్యానికస్స ధమ్మస్స కమ్మపచ్చయేన పచ్చయో – సహజాతా, నానాక్ఖణికా. సహజాతా (సంఖిత్తం). నానాక్ఖణికా – అనియ్యానికా చేతనా విపాకానం ఖన్ధానం కటత్తా చ రూపానం కమ్మపచ్చయేన పచ్చయో… విపాకపచ్చయేన పచ్చయో… ఏకంయేవ… ఆహారపచ్చయేన పచ్చయో… చత్తారి… ఇన్ద్రియపచ్చయేన పచ్చయో… చత్తారి… ఝానపచ్చయేన పచ్చయో… చత్తారి… మగ్గపచ్చయేన పచ్చయో… చత్తారి… సమ్పయుత్తపచ్చయేన పచ్చయో… ద్వే… విప్పయుత్తపచ్చయేన పచ్చయో… తీణి (అరూపదుకసదిసా కాతబ్బా)… అత్థిపచ్చయేన పచ్చయో… సత్త (అరూపదుకసదిసా కాతబ్బా, ఆమసనా నానాపదాయేవ)… నత్థిపచ్చయేన పచ్చయో… తీణి… విగతపచ్చయేన పచ్చయో… తీణి… అవిగతపచ్చయేన పచ్చయో… సత్త.