౧. విభఙ్గవారో

హేతుపచ్చయో

౨౭౯. అరూపావచరో ధమ్మో అరూపావచరస్స ధమ్మస్స హేతుపచ్చయేన పచ్చయో – అరూపావచరా హేతూ సమ్పయుత్తకానం ఖన్ధానం హేతుపచ్చయేన పచ్చయో; పటిసన్ధిక్ఖణే…పే…. (మూలం కాతబ్బం.) అరూపావచరా హేతూ చిత్తసముట్ఠానానం రూపానం హేతుపచ్చయేన పచ్చయో. (మూలం కాతబ్బం.) అరూపావచరా హేతూ సమ్పయుత్తకానం ఖన్ధానం చిత్తసముట్ఠానానఞ్చ రూపానం హేతుపచ్చయేన పచ్చయో. (౩)

నఅరూపావచరో ధమ్మో నఅరూపావచరస్స ధమ్మస్స హేతుపచ్చయేన పచ్చయో – నఅరూపావచరా హేతూ సమ్పయుత్తకానం ఖన్ధానం చిత్తసముట్ఠానానఞ్చ రూపానం హేతుపచ్చయేన పచ్చయో; పటిసన్ధిక్ఖణే…పే…. (౧)

ఆరమ్మణపచ్చయో

౨౮౦. అరూపావచరో ధమ్మో అరూపావచరస్స ధమ్మస్స ఆరమ్మణపచ్చయేన పచ్చయో – ఆకాసానఞ్చాయతనం విఞ్ఞాణఞ్చాయతనస్స ఆరమ్మణపచ్చయేన పచ్చయో; ఆకిఞ్చఞ్ఞాయతనం నేవసఞ్ఞానాసఞ్ఞాయతనస్స ఆరమ్మణపచ్చయేన పచ్చయో. అరూపావచరో ధమ్మో నఅరూపావచరస్స ధమ్మస్స ఆరమ్మణపచ్చయేన పచ్చయో – ఆకాసానఞ్చాయతనం పచ్చవేక్ఖతి, విఞ్ఞాణఞ్చాయతనం…పే… ఆకిఞ్చఞ్ఞాయతనం…పే… నేవసఞ్ఞానాసఞ్ఞాయతనం పచ్చవేక్ఖతి, అరూపావచరే ఖన్ధే అనిచ్చతో…పే… దోమనస్సం ఉప్పజ్జతి; చేతోపరియఞాణేన అరూపావచరచిత్తసమఙ్గిస్స చిత్తం జానాతి, అరూపావచరా ఖన్ధా చేతోపరియఞాణస్స, పుబ్బేనివాసానుస్సతిఞాణస్స, యథాకమ్మూపగఞాణస్స, అనాగతంసఞాణస్స, ఆవజ్జనాయ ఆరమ్మణపచ్చయేన పచ్చయో. (౨)

నఅరూపావచరో ధమ్మో నఅరూపావచరస్స ధమ్మస్స ఆరమ్మణపచ్చయేన పచ్చయో – దానం…పే… సీలం…పే… ఉపోసథకమ్మం కత్వా తం పచ్చవేక్ఖతి అస్సాదేతి అభినన్దతి, తం ఆరబ్భ రాగో…పే… దోమనస్సం ఉప్పజ్జతి; పుబ్బే సుచిణ్ణాని…పే… ఝానా…పే… అరియా మగ్గా వుట్ఠహిత్వా మగ్గం పచ్చవేక్ఖన్తి, ఫలం పచ్చవేక్ఖన్తి, నిబ్బానం పచ్చవేక్ఖన్తి, నిబ్బానం గోత్రభుస్స, వోదానస్స, మగ్గస్స, ఫలస్స, ఆవజ్జనాయ ఆరమ్మణపచ్చయేన పచ్చయో; అరియా పహీనే కిలేసే పచ్చవేక్ఖన్తి, విక్ఖమ్భితే కిలేసే…పే… పుబ్బే…పే… చక్ఖుం…పే… వత్థుం నఅరూపావచరే ఖన్ధే అనిచ్చతో…పే… దోమనస్సం ఉప్పజ్జతి, దిబ్బేన చక్ఖునా రూపం పస్సతి, దిబ్బాయ సోతధాతుయా సద్దం సుణాతి, చేతోపరియఞాణేన నఅరూపావచరచిత్తసమఙ్గిస్స చిత్తం జానాతి, రూపాయతనం చక్ఖువిఞ్ఞాణస్స…పే… ఫోట్ఠబ్బాయతనం కాయవిఞ్ఞాణస్స…పే… నఅరూపావచరా ఖన్ధా ఇద్ధివిధఞాణస్స, చేతోపరియఞాణస్స, పుబ్బేనివాసానుస్సతిఞాణస్స, యథాకమ్మూపగఞాణస్స, అనాగతంసఞాణస్స, ఆవజ్జనాయ ఆరమ్మణపచ్చయేన పచ్చయో. (౧)

అధిపతిపచ్చయో

౨౮౧. అరూపావచరో ధమ్మో అరూపావచరస్స ధమ్మస్స అధిపతిపచ్చయేన పచ్చయో. సహజాతాధిపతి – అరూపావచరాధిపతి సమ్పయుత్తకానం ఖన్ధానం అధిపతిపచ్చయేన పచ్చయో. అరూపావచరో ధమ్మో నఅరూపావచరస్స ధమ్మస్స అధిపతిపచ్చయేన పచ్చయో – ఆరమ్మణాధిపతి, సహజాతాధిపతి. ఆరమ్మణాధిపతి – ఆకాసానఞ్చాయతనం గరుం కత్వా పచ్చవేక్ఖతి…పే… నేవసఞ్ఞానాసఞ్ఞాయతనం గరుం కత్వా పచ్చవేక్ఖతి, అరూపావచరే ఖన్ధే గరుం కత్వా అస్సాదేతి అభినన్దతి, తం గరుం కత్వా రాగో ఉప్పజ్జతి, దిట్ఠి ఉప్పజ్జతి. సహజాతాధిపతి – అరూపావచరాధిపతి చిత్తసముట్ఠానానం రూపానం అధిపతిపచ్చయేన పచ్చయో. (మూలం కాతబ్బం.) అరూపావచరాధిపతి సమ్పయుత్తకానం ఖన్ధానం చిత్తసముట్ఠానానఞ్చ రూపానం అధిపతిపచ్చయేన పచ్చయో. (౩)

౨౮౨. నఅరూపావచరో ధమ్మో నఅరూపావచరస్స ధమ్మస్స అధిపతిపచ్చయేన పచ్చయో – ఆరమ్మణాధిపతి, సహజాతాధిపతి. ఆరమ్మణాధిపతి – దానం…పే… సీలం…పే… ఉపోసథకమ్మం కత్వా తం గరుం కత్వా పచ్చవేక్ఖతి అస్సాదేతి అభినన్దతి, తం గరుం కత్వా రాగో ఉప్పజ్జతి, దిట్ఠి ఉప్పజ్జతి; పుబ్బే సుచిణ్ణాని…పే… ఝానా…పే… అరియా మగ్గా వుట్ఠహిత్వా మగ్గం గరుం కత్వా పచ్చవేక్ఖన్తి, ఫలం…పే… నిబ్బానం గరుం కత్వా పచ్చవేక్ఖన్తి, నిబ్బానం గోత్రభుస్స, వోదానస్స, మగ్గస్స, ఫలస్స అధిపతిపచ్చయేన పచ్చయో; చక్ఖుం…పే… వత్థుం నఅరూపావచరే ఖన్ధే గరుం కత్వా అస్సాదేతి అభినన్దతి, తం గరుం కత్వా రాగో ఉప్పజ్జతి, దిట్ఠి ఉప్పజ్జతి. సహజాతాధిపతి – నఅరూపావచరాధిపతి సమ్పయుత్తకానం ఖన్ధానం చిత్తసముట్ఠానానఞ్చ రూపానం అధిపతిపచ్చయేన పచ్చయో. (౧)

అనన్తరపచ్చయాది

౨౮౩. అరూపావచరో ధమ్మో అరూపావచరస్స ధమ్మస్స అనన్తరపచ్చయేన పచ్చయో – పురిమా పురిమా అరూపావచరా ఖన్ధా పచ్ఛిమానం పచ్ఛిమానం అరూపావచరానం ఖన్ధానం అనన్తరపచ్చయేన పచ్చయో. అరూపావచరో ధమ్మో నఅరూపావచరస్స ధమ్మస్స అనన్తరపచ్చయేన పచ్చయో – అరూపావచరం చుతిచిత్తం నఅరూపావచరస్స ఉపపత్తిచిత్తస్స, అరూపావచరం భవఙ్గం ఆవజ్జనాయ, అరూపావచరా ఖన్ధా నఅరూపావచరస్స వుట్ఠానస్స, నిరోధా వుట్ఠహన్తస్స నేవసఞ్ఞానాసఞ్ఞాయతనం ఫలసమాపత్తియా అనన్తరపచ్చయేన పచ్చయో. (౨)

౨౮౪. నఅరూపావచరో ధమ్మో నఅరూపావచరస్స ధమ్మస్స అనన్తరపచ్చయేన పచ్చయో – పురిమా పురిమా నఅరూపావచరా ఖన్ధా పచ్ఛిమానం పచ్ఛిమానం నఅరూపావచరానం ఖన్ధానం అనన్తరపచ్చయేన పచ్చయో; అనులోమం గోత్రభుస్స…పే… అనులోమం ఫలసమాపత్తియా అనన్తరపచ్చయేన పచ్చయో. నఅరూపావచరో ధమ్మో అరూపావచరస్స ధమ్మస్స అనన్తరపచ్చయేన పచ్చయో – నఅరూపావచరం చుతిచిత్తం అరూపావచరస్స ఉపపత్తిచిత్తస్స అనన్తరపచ్చయేన పచ్చయో; నఅరూపావచరా ఖన్ధా అరూపావచరస్స వుట్ఠానస్స అనన్తరపచ్చయేన పచ్చయో; ఆకాసానఞ్చాయతనస్స పరికమ్మం ఆకాసానఞ్చాయతనస్స అనన్తరపచ్చయేన పచ్చయో; విఞ్ఞాణఞ్చాయతనస్స…పే… ఆకిఞ్చఞ్ఞాయతనస్స…పే… నేవసఞ్ఞానాసఞ్ఞాయతనస్స పరికమ్మం నేవసఞ్ఞానాసఞ్ఞాయతనస్స అనన్తరపచ్చయేన పచ్చయో. (౨)

సమనన్తరపచ్చయేన పచ్చయో… సహజాతపచ్చయేన పచ్చయో… పఞ్చ… అఞ్ఞమఞ్ఞపచ్చయేన పచ్చయో… ద్వే… నిస్సయపచ్చయేన పచ్చయో… సత్త.

ఉపనిస్సయపచ్చయో

౨౮౫. అరూపావచరో ధమ్మో అరూపావచరస్స ధమ్మస్స ఉపనిస్సయపచ్చయేన పచ్చయో – అనన్తరూపనిస్సయో, పకతూపనిస్సయో…పే…. పకతూపనిస్సయో – ఆకాసానఞ్చాయతనం విఞ్ఞాణఞ్చాయతనస్స ఉపనిస్సయపచ్చయేన పచ్చయో; విఞ్ఞాణఞ్చాయతనం ఆకిఞ్చఞ్ఞాయతనస్స…పే… ఆకిఞ్చఞ్ఞాయతనం నేవసఞ్ఞానాసఞ్ఞాయతనస్స ఉపనిస్సయపచ్చయేన పచ్చయో. అరూపావచరో ధమ్మో నఅరూపావచరస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – అరూపావచరం సద్ధం ఉపనిస్సాయ దానం దేతి, సీలం…పే… ఉపోసథకమ్మం కరోతి, నఅరూపావచరం ఝానం ఉప్పాదేతి, విపస్సనం…పే… మగ్గం…పే… అభిఞ్ఞం…పే… సమాపత్తిం ఉప్పాదేతి, మానం జప్పేతి, దిట్ఠిం గణ్హాతి; అరూపావచరం సీలం…పే… పఞ్ఞం ఉపనిస్సాయ దానం దేతి…పే… సమాపత్తిం ఉప్పాదేతి… మానం జప్పేతి… దిట్ఠిం గణ్హాతి; అరూపావచరా సద్ధా…పే… పఞ్ఞా నఅరూపావచరాయ సద్ధాయ…పే… పఞ్ఞాయ… రాగస్స…పే… పత్థనాయ… కాయికస్స సుఖస్స… కాయికస్స దుక్ఖస్స… మగ్గస్స ఫలసమాపత్తియా ఉపనిస్సయపచ్చయేన పచ్చయో. (౨)

౨౮౬. నఅరూపావచరో ధమ్మో నఅరూపావచరస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – నఅరూపావచరం సద్ధం ఉపనిస్సాయ దానం దేతి, సీలం…పే… ఉపోసథకమ్మం కరోతి, నఅరూపావచరం ఝానం ఉప్పాదేతి, విపస్సనం…పే… మగ్గం…పే… అభిఞ్ఞం…పే… సమాపత్తిం ఉప్పాదేతి, మానం జప్పేతి… దిట్ఠిం గణ్హాతి; నఅరూపావచరం సీలం…పే… పఞ్ఞం…పే… రాగం…పే… పత్థనం…పే… కాయికం సుఖం… కాయికం దుక్ఖం… ఉతుం… భోజనం… సేనాసనం ఉపనిస్సాయ దానం దేతి…పే… సమాపత్తిం ఉప్పాదేతి… పాణం హనతి…పే… సఙ్ఘం భిన్దతి; నఅరూపావచరా సద్ధా…పే… సేనాసనం నఅరూపావచరాయ సద్ధాయ…పే… పత్థనాయ… కాయికస్స సుఖస్స… కాయికస్స దుక్ఖస్స, మగ్గస్స, ఫలసమాపత్తియా ఉపనిస్సయపచ్చయేన పచ్చయో. (౧)

నఅరూపావచరో ధమ్మో అరూపావచరస్స ధమ్మస్స ఉపనిస్సయపచ్చయేన పచ్చయో – అనన్తరూపనిస్సయో, పకతూపనిస్సయో…పే…. పకతూపనిస్సయో – ఆకాసానఞ్చాయతనస్స పరికమ్మం ఆకాసానఞ్చాయతనస్స ఉపనిస్సయపచ్చయేన పచ్చయో…పే… నేవసఞ్ఞానాసఞ్ఞాయతనస్స పరికమ్మం నేవసఞ్ఞానాసఞ్ఞాయతనస్స ఉపనిస్సయపచ్చయేన పచ్చయో. (౨)

పురేజాతపచ్చయాది

౨౮౭. నఅరూపావచరో ధమ్మో నఅరూపావచరస్స ధమ్మస్స పురేజాతపచ్చయేన పచ్చయో – ఆరమ్మణపురేజాతం, వత్థుపురేజాతం. ఆరమ్మణపురేజాతం – చక్ఖుం…పే… వత్థుం అనిచ్చతో…పే… దోమనస్సం ఉప్పజ్జతి; దిబ్బేన చక్ఖునా రూపం పస్సతి, దిబ్బాయ సోతధాతుయా సద్దం సుణాతి, రూపాయతనం చక్ఖువిఞ్ఞాణస్స…పే… ఫోట్ఠబ్బాయతనం కాయవిఞ్ఞాణస్స…పే…. వత్థుపురేజాతం – చక్ఖాయతనం చక్ఖువిఞ్ఞాణస్స…పే… కాయాయతనం కాయవిఞ్ఞాణస్స…పే… వత్థు నఅరూపావచరానం ఖన్ధానం పురేజాతపచ్చయేన పచ్చయో. నఅరూపావచరో ధమ్మో అరూపావచరస్స ధమ్మస్స పురేజాతపచ్చయేన పచ్చయో. వత్థుపురేజాతం – వత్థు అరూపావచరానం ఖన్ధానం పురేజాతపచ్చయేన పచ్చయో. (౨)

పచ్ఛాజాతపచ్చయేన పచ్చయో… ద్వే… ఆసేవనపచ్చయేన పచ్చయో… తీణి.

కమ్మపచ్చయో

౨౮౮. అరూపావచరో ధమ్మో అరూపావచరస్స ధమ్మస్స కమ్మపచ్చయేన పచ్చయో – సహజాతా, నానాక్ఖణికా…పే…. అరూపావచరో ధమ్మో నఅరూపావచరస్స ధమ్మస్స కమ్మపచ్చయేన పచ్చయో – అరూపావచరా చేతనా చిత్తసముట్ఠానానం రూపానం కమ్మపచ్చయేన పచ్చయో. (మూలం కాతబ్బం.) అరూపావచరా చేతనా సమ్పయుత్తకానం ఖన్ధానం చిత్తసముట్ఠానానఞ్చ రూపానం కమ్మపచ్చయేన పచ్చయో. (౩)

నఅరూపావచరో ధమ్మో నఅరూపావచరస్స ధమ్మస్స కమ్మపచ్చయేన పచ్చయో – సహజాతా, నానాక్ఖణికా. సహజాతా – నఅరూపావచరా చేతనా సమ్పయుత్తకానం ఖన్ధానం చిత్తసముట్ఠానానఞ్చ రూపానం కమ్మపచ్చయేన పచ్చయో (సంఖిత్తం). (౧)

విపాకపచ్చయాది

౨౮౯. అరూపావచరో ధమ్మో అరూపావచరస్స ధమ్మస్స విపాకపచ్చయేన పచ్చయో (సంఖిత్తం).

నఅరూపావచరో ధమ్మో నఅరూపావచరస్స ధమ్మస్స విపాకపచ్చయేన పచ్చయో (సంఖిత్తం)… ఆహారపచ్చయేన పచ్చయో… చత్తారి… ఇన్ద్రియపచ్చయేన పచ్చయో… చత్తారి… ఝానపచ్చయేన పచ్చయో… చత్తారి… మగ్గపచ్చయేన పచ్చయో… చత్తారి… సమ్పయుత్తపచ్చయేన పచ్చయో… ద్వే.

విప్పయుత్తపచ్చయో

౨౯౦. అరూపావచరో ధమ్మో నఅరూపావచరస్స ధమ్మస్స విప్పయుత్తపచ్చయేన పచ్చయో – సహజాతం, పచ్ఛాజాతం (సంఖిత్తం). (౧)

నఅరూపావచరో ధమ్మో నఅరూపావచరస్స ధమ్మస్స విప్పయుత్తపచ్చయేన పచ్చయో – సహజాతం, పురేజాతం, పచ్ఛాజాతం (సంఖిత్తం). నఅరూపావచరో ధమ్మో అరూపావచరస్స ధమ్మస్స విప్పయుత్తపచ్చయేన పచ్చయో. పురేజాతం – వత్థు అరూపావచరానం ఖన్ధానం విప్పయుత్తపచ్చయేన పచ్చయో. (౨)

అత్థిపచ్చయాది

౨౯౧. అరూపావచరో ధమ్మో అరూపావచరస్స ధమ్మస్స అత్థిపచ్చయేన పచ్చయో – సహజాతం…పే…. అరూపావచరో ధమ్మో నఅరూపావచరస్స ధమ్మస్స అత్థిపచ్చయేన పచ్చయో – సహజాతం, పచ్ఛాజాతం…పే…. అరూపావచరో ధమ్మో అరూపావచరస్స చ నఅరూపావచరస్స చ ధమ్మస్స అత్థిపచ్చయేన పచ్చయో – సహజాతం (సంఖిత్తం). (౩)

నఅరూపావచరో ధమ్మో నఅరూపావచరస్స ధమ్మస్స అత్థిపచ్చయేన పచ్చయో – సహజాతం, పురేజాతం, పచ్ఛాజాతం, ఆహారం, ఇన్ద్రియం (సంఖిత్తం). నఅరూపావచరో ధమ్మో అరూపావచరస్స ధమ్మస్స అత్థిపచ్చయేన పచ్చయో. పురేజాతం – వత్థు అరూపావచరానం ఖన్ధానం అత్థిపచ్చయేన పచ్చయో. (౨)

౨౯౨. అరూపావచరో చ నఅరూపావచరో చ ధమ్మా అరూపావచరస్స ధమ్మస్స అత్థిపచ్చయేన పచ్చయో – సహజాతం, పురేజాతం. సహజాతో – అరూపావచరో ఏకో ఖన్ధో చ వత్థు చ తిణ్ణన్నం ఖన్ధానం అత్థిపచ్చయేన పచ్చయో…పే… ద్వే ఖన్ధా చ…పే…. అరూపావచరో చ నఅరూపావచరో చ ధమ్మా నఅరూపావచరస్స ధమ్మస్స అత్థిపచ్చయేన పచ్చయో – సహజాతం, పచ్ఛాజాతం, ఆహారం, ఇన్ద్రియం. సహజాతా – అరూపావచరా ఖన్ధా చ మహాభూతా చ చిత్తసముట్ఠానానం రూపానం అత్థిపచ్చయేన పచ్చయో. పచ్ఛాజాతా – అరూపావచరా ఖన్ధా చ కబళీకారో ఆహారో చ ఇమస్స కాయస్స అత్థిపచ్చయేన పచ్చయో. పచ్ఛాజాతా – అరూపావచరా ఖన్ధా చ రూపజీవితిన్ద్రియఞ్చ కటత్తారూపానం అత్థిపచ్చయేన పచ్చయో. (౨)

నత్థిపచ్చయేన పచ్చయో… విగతపచ్చయేన పచ్చయో… అవిగతపచ్చయేన పచ్చయో.