౧. విభఙ్గవారో

హేతుపచ్చయో

౨౪౫. రూపావచరో ధమ్మో రూపావచరస్స ధమ్మస్స హేతుపచ్చయేన పచ్చయో – రూపావచరా హేతూ సమ్పయుత్తకానం ఖన్ధానం హేతుపచ్చయేన పచ్చయో; పటిసన్ధిక్ఖణే…పే…. (మూలం కాతబ్బం.) రూపావచరా హేతూ చిత్తసముట్ఠానానం రూపానం హేతుపచ్చయేన పచ్చయో; పటిసన్ధిక్ఖణే…పే…. (మూలం కాతబ్బం.) రూపావచరా హేతూ సమ్పయుత్తకానం ఖన్ధానం చిత్తసముట్ఠానానఞ్చ రూపానం హేతుపచ్చయేన పచ్చయో; పటిసన్ధిక్ఖణే…పే…. (౩)

నరూపావచరో ధమ్మో నరూపావచరస్స ధమ్మస్స హేతుపచ్చయేన పచ్చయో – నరూపావచరా హేతూ సమ్పయుత్తకానం ఖన్ధానం చిత్తసముట్ఠానానఞ్చ రూపానం హేతుపచ్చయేన పచ్చయో; పటిసన్ధిక్ఖణే…పే…. (౧)

ఆరమ్మణపచ్చయో

౨౪౬. రూపావచరో ధమ్మో రూపావచరస్స ధమ్మస్స ఆరమ్మణపచ్చయేన పచ్చయో – చేతోపరియఞాణేన రూపావచరచిత్తసమఙ్గిస్స చిత్తం జానాతి, రూపావచరా ఖన్ధా ఇద్ధివిధఞాణస్స, చేతోపరియఞాణస్స, పుబ్బేనివాసానుస్సతిఞాణస్స, యథాకమ్మూపగఞాణస్స, అనాగతంసఞాణస్స ఆరమ్మణపచ్చయేన పచ్చయో. రూపావచరో ధమ్మో నరూపావచరస్స ధమ్మస్స ఆరమ్మణపచ్చయేన పచ్చయో – పఠమం ఝానం పచ్చవేక్ఖతి…పే… చతుత్థం ఝానం పచ్చవేక్ఖతి, దిబ్బం చక్ఖుం పచ్చవేక్ఖతి, దిబ్బం సోతధాతుం…పే… ఇద్ధివిధఞాణం…పే… చేతోపరియఞాణం…పే… పుబ్బేనివాసానుస్సతిఞాణం…పే… యథాకమ్మూపగఞాణం…పే… అనాగతంసఞాణం పచ్చవేక్ఖతి, రూపావచరే ఖన్ధే అనిచ్చతో…పే… దోమనస్సం ఉప్పజ్జతి. (౨)

౨౪౭. నరూపావచరో ధమ్మో నరూపావచరస్స ధమ్మస్స ఆరమ్మణపచ్చయేన పచ్చయో – దానం దత్వా సీలం…పే… ఉపోసథకమ్మం…పే… పుబ్బే సుచిణ్ణాని పచ్చవేక్ఖతి అస్సాదేతి అభినన్దతి, తం ఆరబ్భ రాగో…పే… దోమనస్సం ఉప్పజ్జతి; అరియా మగ్గా వుట్ఠహిత్వా మగ్గం పచ్చవేక్ఖన్తి, ఫలం పచ్చవేక్ఖన్తి, నిబ్బానం పచ్చవేక్ఖన్తి, నిబ్బానం గోత్రభుస్స, వోదానస్స, మగ్గస్స, ఫలస్స, ఆవజ్జనాయ ఆరమ్మణపచ్చయేన పచ్చయో; అరియా పహీనే కిలేసే…పే… విక్ఖమ్భితే కిలేసే…పే… పుబ్బే…పే… చక్ఖుం…పే… వత్థుం నరూపావచరే ఖన్ధే అనిచ్చతో…పే… దోమనస్సం ఉప్పజ్జతి; ఆకాసానఞ్చాయతనం విఞ్ఞాణఞ్చాయతనస్స…పే… ఆకిఞ్చఞ్ఞాయతనం నేవసఞ్ఞానాసఞ్ఞాయతనస్స…పే… రూపాయతనం చక్ఖువిఞ్ఞాణస్స…పే… ఫోట్ఠబ్బాయతనం కాయవిఞ్ఞాణస్స ఆరమ్మణపచ్చయేన పచ్చయో. (౧)

నరూపావచరో ధమ్మో రూపావచరస్స ధమ్మస్స ఆరమ్మణపచ్చయేన పచ్చయో – దిబ్బేన చక్ఖునా రూపం పస్సతి, దిబ్బాయ సోతధాతుయా సద్దం సుణాతి, చేతోపరియఞాణేన నరూపావచరచిత్తసమఙ్గిస్స చిత్తం జానాతి, నరూపావచరా ఖన్ధా ఇద్ధివిధఞాణస్స, చేతోపరియఞాణస్స, పుబ్బేనివాసానుస్సతిఞాణస్స, యథాకమ్మూపగఞాణస్స, అనాగతంసఞాణస్స ఆరమ్మణపచ్చయేన పచ్చయో. (౨)

అధిపతిపచ్చయో

౨౪౮. రూపావచరో ధమ్మో రూపావచరస్స ధమ్మస్స అధిపతిపచ్చయేన పచ్చయో. సహజాతాధిపతి – రూపావచరాధిపతి సమ్పయుత్తకానం ఖన్ధానం అధిపతిపచ్చయేన పచ్చయో. రూపావచరో ధమ్మో నరూపావచరస్స ధమ్మస్స అధిపతిపచ్చయేన పచ్చయో – ఆరమ్మణాధిపతి, సహజాతాధిపతి. ఆరమ్మణాధిపతి – పఠమం ఝానం గరుం కత్వా పచ్చవేక్ఖతి, అస్సాదేతి అభినన్దతి, తం గరుం కత్వా రాగో ఉప్పజ్జతి, దిట్ఠి ఉప్పజ్జతి…పే… చతుత్థం ఝానం…పే… దిబ్బం చక్ఖుం…పే… దిబ్బం సోతధాతుం…పే… ఇద్ధివిధఞాణం…పే… చేతోపరియఞాణం…పే… పుబ్బేనివాసానుస్సతిఞాణం…పే… యథాకమ్మూపగఞాణం…పే… అనాగతంసఞాణం గరుం కత్వా పచ్చవేక్ఖతి అస్సాదేతి అభినన్దతి, తం గరుం కత్వా రాగో ఉప్పజ్జతి, దిట్ఠి ఉప్పజ్జతి, రూపావచరే ఖన్ధే గరుం కత్వా అస్సాదేతి అభినన్దతి, తం గరుం కత్వా రాగో ఉప్పజ్జతి, దిట్ఠి ఉప్పజ్జతి. సహజాతాధిపతి – రూపావచరాధిపతి చిత్తసముట్ఠానానం రూపానం అధిపతిపచ్చయేన పచ్చయో. రూపావచరో ధమ్మో రూపావచరస్స చ నరూపావచరస్స చ ధమ్మస్స అధిపతిపచ్చయేన పచ్చయో. సహజాతాధిపతి – రూపావచరాధిపతి సమ్పయుత్తకానం ఖన్ధానం చిత్తసముట్ఠానానఞ్చ రూపానం అధిపతిపచ్చయేన పచ్చయో. (౩)

౨౪౯. నరూపావచరో ధమ్మో నరూపావచరస్స ధమ్మస్స అధిపతిపచ్చయేన పచ్చయో – ఆరమ్మణాధిపతి, సహజాతాధిపతి. ఆరమ్మణాధిపతి – దానం…పే… సీలం…పే… ఉపోసథకమ్మం…పే… పుబ్బే సుచిణ్ణాని గరుం కత్వా పచ్చవేక్ఖతి అస్సాదేతి అభినన్దతి, తం గరుం కత్వా రాగో ఉప్పజ్జతి, దిట్ఠి ఉప్పజ్జతి; అరియా మగ్గా వుట్ఠహిత్వా మగ్గం గరుం కత్వా…పే… ఫలం…పే… నిబ్బానం గరుం కత్వా పచ్చవేక్ఖన్తి, నిబ్బానం గోత్రభుస్స, వోదానస్స, మగ్గస్స, ఫలస్స అధిపతిపచ్చయేన పచ్చయో; చక్ఖుం…పే… వత్థుం నరూపావచరే ఖన్ధే గరుం కత్వా అస్సాదేతి అభినన్దతి, తం గరుం కత్వా రాగో ఉప్పజ్జతి, దిట్ఠి ఉప్పజ్జతి; ఆకాసానఞ్చాయతనం గరుం కత్వా పచ్చవేక్ఖతి…పే… నేవసఞ్ఞానాసఞ్ఞాయతనం గరుం కత్వా పచ్చవేక్ఖతి. సహజాతాధిపతి – నరూపావచరాధిపతి సమ్పయుత్తకానం ఖన్ధానం చిత్తసముట్ఠానానఞ్చ రూపానం అధిపతిపచ్చయేన పచ్చయో. (౧)

అనన్తరపచ్చయాది

౨౫౦. రూపావచరో ధమ్మో రూపావచరస్స ధమ్మస్స అనన్తరపచ్చయేన పచ్చయో – పురిమా పురిమా రూపావచరా ఖన్ధా పచ్ఛిమానం పచ్ఛిమానం రూపావచరానం ఖన్ధానం అనన్తరపచ్చయేన పచ్చయో. రూపావచరో ధమ్మో నరూపావచరస్స ధమ్మస్స అనన్తరపచ్చయేన పచ్చయో – రూపావచరం చుతిచిత్తం నరూపావచరస్స ఉపపత్తిచిత్తస్స అనన్తరపచ్చయేన పచ్చయో; రూపావచరం భవఙ్గం ఆవజ్జనాయ… రూపావచరా ఖన్ధా నరూపావచరస్స వుట్ఠానస్స అనన్తరపచ్చయేన పచ్చయో. (౨)

౨౫౧. నరూపావచరో ధమ్మో నరూపావచరస్స ధమ్మస్స అనన్తరపచ్చయేన పచ్చయో – పురిమా పురిమా నరూపావచరా ఖన్ధా పచ్ఛిమానం పచ్ఛిమానం నరూపావచరానం ఖన్ధానం అనన్తరపచ్చయేన పచ్చయో; అనులోమం గోత్రభుస్స…పే… నేవసఞ్ఞానాసఞ్ఞాయతనం ఫలసమాపత్తియా అనన్తరపచ్చయేన పచ్చయో. నరూపావచరో ధమ్మో రూపావచరస్స ధమ్మస్స అనన్తరపచ్చయేన పచ్చయో – నరూపావచరం చుతిచిత్తం రూపావచరస్స ఉపపత్తిచిత్తస్స అనన్తరపచ్చయేన పచ్చయో; నరూపావచరా ఖన్ధా రూపావచరస్స వుట్ఠానస్స అనన్తరపచ్చయేన పచ్చయో; పఠమస్స ఝానస్స పరికమ్మం పఠమస్స ఝానస్స అనన్తరపచ్చయేన పచ్చయో…పే… చతుత్థస్స ఝానస్స…పే… దిబ్బస్స చక్ఖుస్స…పే… దిబ్బాయ సోతధాతుయా…పే… ఇద్ధివిధఞాణస్స…పే… చేతోపరియఞాణస్స…పే… పుబ్బేనివాసానుస్సతిఞాణస్స…పే… యథాకమ్మూపగఞాణస్స…పే… అనాగతంసఞాణస్స, పరికమ్మం అనాగతంసఞాణస్స అనన్తరపచ్చయేన పచ్చయో. (౨)

సమనన్తరపచ్చయేన పచ్చయో… సహజాతపచ్చయేన పచ్చయో… సత్త… అఞ్ఞమఞ్ఞపచ్చయేన పచ్చయో… ఛ… నిస్సయపచ్చయేన పచ్చయో… సత్త.

ఉపనిస్సయపచ్చయో

౨౫౨. రూపావచరో ధమ్మో రూపావచరస్స ధమ్మస్స ఉపనిస్సయపచ్చయేన పచ్చయో – అనన్తరూపనిస్సయో, పకతూపనిస్సయో…పే…. పకతూపనిస్సయో – రూపావచరం సద్ధం ఉపనిస్సాయ రూపావచరం ఝానం ఉప్పాదేతి, అభిఞ్ఞం…పే… సమాపత్తిం ఉప్పాదేతి; రూపావచరం సీలం…పే… పఞ్ఞం ఉపనిస్సాయ రూపావచరం ఝానం…పే… అభిఞ్ఞం…పే… సమాపత్తిం ఉప్పాదేతి; రూపావచరా సద్ధా…పే… పఞ్ఞా రూపావచరాయ సద్ధాయ…పే… పఞ్ఞాయ ఉపనిస్సయపచ్చయేన పచ్చయో, పఠమం ఝానం దుతియస్స ఝానస్స ఉపనిస్సయపచ్చయేన పచ్చయో, దుతియం ఝానం తతియస్స ఝానస్స…పే… తతియం ఝానం చతుత్థస్స ఝానస్స ఉపనిస్సయపచ్చయేన పచ్చయో. (౧)

రూపావచరో ధమ్మో నరూపావచరస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – రూపావచరం సద్ధం ఉపనిస్సాయ దానం దేతి, సీలం…పే… ఉపోసథకమ్మం కరోతి; రూపావచరం ఝానం…పే… విపస్సనం…పే… మగ్గం…పే… సమాపత్తిం ఉప్పాదేతి, మానం జప్పేతి, దిట్ఠిం గణ్హాతి; రూపావచరం సీలం…పే… పఞ్ఞం ఉపనిస్సాయ దానం దేతి…పే… మానం జప్పేతి, దిట్ఠిం గణ్హాతి; రూపావచరా సద్ధా…పే… పఞ్ఞా నరూపావచరాయ సద్ధాయ…పే… పఞ్ఞాయ… రాగస్స…పే… పత్థనాయ… కాయికస్స సుఖస్స… కాయికస్స దుక్ఖస్స… మగ్గస్స, ఫలసమాపత్తియా ఉపనిస్సయపచ్చయేన పచ్చయో. (౨)

౨౫౩. నరూపావచరో ధమ్మో నరూపావచరస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – నరూపావచరం సద్ధం ఉపనిస్సాయ దానం…పే… సీలం…పే… ఉపోసథకమ్మం కరోతి; నరూపావచరం ఝానం…పే… విపస్సనం…పే… మగ్గం…పే… సమాపత్తిం ఉప్పాదేతి, మానం జప్పేతి, దిట్ఠిం గణ్హాతి; నరూపావచరం సీలం…పే… పఞ్ఞం, రాగం…పే… భోజనం, సేనాసనం ఉపనిస్సాయ దానం దేతి…పే… పాణం హనతి…పే… సఙ్ఘం భిన్దతి; నరూపావచరా సద్ధా…పే… పఞ్ఞా… రాగో…పే… సేనాసనం నరూపావచరాయ సద్ధాయ…పే… పఞ్ఞాయ… రాగస్స…పే… పత్థనాయ… కాయికస్స సుఖస్స… కాయికస్స దుక్ఖస్స… మగ్గస్స, ఫలసమాపత్తియా ఉపనిస్సయపచ్చయేన పచ్చయో. (౧)

నరూపావచరో ధమ్మో రూపావచరస్స ధమ్మస్స ఉపనిస్సయపచ్చయేన పచ్చయో – అనన్తరూపనిస్సయో, పకతూపనిస్సయో…పే…. పకతూపనిస్సయో – నరూపావచరం సద్ధం ఉపనిస్సాయ రూపావచరం ఝానం…పే… అభిఞ్ఞం …పే… సమాపత్తిం ఉప్పాదేతి; నరూపావచరం సీలం…పే… సేనాసనం ఉపనిస్సాయ రూపావచరం ఝానం…పే… అభిఞ్ఞం…పే… సమాపత్తిం ఉప్పాదేతి; నరూపావచరా సద్ధా…పే… సేనాసనం రూపావచరాయ సద్ధాయ…పే… పఞ్ఞాయ ఉపనిస్సయపచ్చయేన పచ్చయో, పఠమస్స ఝానస్స పరికమ్మం పఠమస్స ఝానస్స ఉపనిస్సయపచ్చయేన పచ్చయో…పే… చతుత్థస్స ఝానస్స…పే… దిబ్బస్స చక్ఖుస్స పరికమ్మం…పే… దిబ్బాయ సోతధాతుయా…పే… ఇద్ధివిధఞాణస్స…పే… చేతోపరియఞాణస్స…పే… పుబ్బేనివాసానుస్సతిఞాణస్స…పే… యథాకమ్మూపగఞాణస్స…పే… అనాగతంసఞాణస్స పరికమ్మం అనాగతంసఞాణస్స ఉపనిస్సయపచ్చయేన పచ్చయో. (౨)

పురేజాతపచ్చయాది

౨౫౪. నరూపావచరో ధమ్మో నరూపావచరస్స ధమ్మస్స పురేజాతపచ్చయేన పచ్చయో – ఆరమ్మణపురేజాతం, వత్థుపురేజాతం. ఆరమ్మణపురేజాతం – చక్ఖుం …పే… వత్థుం అనిచ్చతో…పే… దోమనస్సం ఉప్పజ్జతి, రూపాయతనం చక్ఖువిఞ్ఞాణస్స…పే… ఫోట్ఠబ్బాయతనం కాయవిఞ్ఞాణస్స పురేజాతపచ్చయేన పచ్చయో. వత్థుపురేజాతం – చక్ఖాయతనం చక్ఖువిఞ్ఞాణస్స…పే… కాయాయతనం కాయవిఞ్ఞాణస్స పురేజాతపచ్చయేన పచ్చయో; వత్థు నరూపావచరానం ఖన్ధానం పురేజాతపచ్చయేన పచ్చయో. నరూపావచరో ధమ్మో రూపావచరస్స ధమ్మస్స పురేజాతపచ్చయేన పచ్చయో – ఆరమ్మణపురేజాతం, వత్థుపురేజాతం. ఆరమ్మణపురేజాతం – దిబ్బేన చక్ఖునా రూపం పస్సతి, దిబ్బాయ సోతధాతుయా సద్దం సుణాతి. వత్థుపురేజాతం – వత్థు రూపావచరానం ఖన్ధానం పురేజాతపచ్చయేన పచ్చయో. (౨)

పచ్ఛాజాతపచ్చయేన పచ్చయో… ద్వే… ఆసేవనపచ్చయేన పచ్చయో… తీణి.

కమ్మపచ్చయాది

౨౫౫. రూపావచరో ధమ్మో రూపావచరస్స ధమ్మస్స కమ్మపచ్చయేన పచ్చయో – సహజాతా, నానాక్ఖణికా. సహజాతా – రూపావచరా చేతనా సమ్పయుత్తకానం ఖన్ధానం కమ్మపచ్చయేన పచ్చయో; పటిసన్ధిక్ఖణే…పే…. నానాక్ఖణికా – రూపావచరా చేతనా విపాకానం రూపావచరానం ఖన్ధానం కమ్మపచ్చయేన పచ్చయో. రూపావచరో ధమ్మో నరూపావచరస్స ధమ్మస్స కమ్మపచ్చయేన పచ్చయో – సహజాతా, నానాక్ఖణికా. సహజాతా – రూపావచరా చేతనా చిత్తసముట్ఠానానం రూపానం కమ్మపచ్చయేన పచ్చయో; పటిసన్ధిక్ఖణే…పే…. నానాక్ఖణికా – రూపావచరా చేతనా కటత్తారూపానం కమ్మపచ్చయేన పచ్చయో. రూపావచరో ధమ్మో రూపావచరస్స చ నరూపావచరస్స చ ధమ్మస్స కమ్మపచ్చయేన పచ్చయో – సహజాతా, నానాక్ఖణికా. సహజాతా – రూపావచరా చేతనా సమ్పయుత్తకానం ఖన్ధానం చిత్తసముట్ఠానానఞ్చ రూపానం కమ్మపచ్చయేన పచ్చయో; పటిసన్ధిక్ఖణే…పే…. నానాక్ఖణికా – రూపావచరా చేతనా విపాకానం రూపావచరానం ఖన్ధానం కటత్తా చ రూపానం కమ్మపచ్చయేన పచ్చయో. (౩)

నరూపావచరో ధమ్మో నరూపావచరస్స ధమ్మస్స కమ్మపచ్చయేన పచ్చయో – సహజాతా, నానాక్ఖణికా. సహజాతా – నరూపావచరా చేతనా సమ్పయుత్తకానం ఖన్ధానం చిత్తసముట్ఠానానఞ్చ రూపానం కమ్మపచ్చయేన పచ్చయో; పటిసన్ధిక్ఖణే…పే…. నానాక్ఖణికా – నరూపావచరా చేతనా విపాకానం నరూపావచరానం ఖన్ధానం కటత్తా చ రూపానం కమ్మపచ్చయేన పచ్చయో…. (౧)

విపాకపచ్చయేన పచ్చయో… చత్తారి… ఆహారపచ్చయేన పచ్చయో… చత్తారి… ఇన్ద్రియపచ్చయేన పచ్చయో… చత్తారి… ఝానపచ్చయేన పచ్చయో… చత్తారి… మగ్గపచ్చయేన పచ్చయో… చత్తారి… సమ్పయుత్తపచ్చయేన పచ్చయో… ద్వే.

విప్పయుత్తపచ్చయో

౨౫౬. రూపావచరో ధమ్మో నరూపావచరస్స ధమ్మస్స విప్పయుత్తపచ్చయేన పచ్చయో – సహజాతం, పచ్ఛాజాతం (సంఖిత్తం). (౧)

నరూపావచరో ధమ్మో నరూపావచరస్స ధమ్మస్స విప్పయుత్తపచ్చయేన పచ్చయో – సహజాతం, పురేజాతం, పచ్ఛాజాతం (సంఖిత్తం). నరూపావచరో ధమ్మో రూపావచరస్స ధమ్మస్స విప్పయుత్తపచ్చయేన పచ్చయో – సహజాతం, పురేజాతం. సహజాతం – పటిసన్ధిక్ఖణే వత్థు రూపావచరానం ఖన్ధానం విప్పయుత్తపచ్చయేన పచ్చయో. పురేజాతం – వత్థు రూపావచరానం ఖన్ధానం విప్పయుత్తపచ్చయేన పచ్చయో. (౨)

అత్థిపచ్చయాది

౨౫౭. రూపావచరో ధమ్మో రూపావచరస్స ధమ్మస్స అత్థిపచ్చయేన పచ్చయో (పటిచ్చసదిసం). రూపావచరో ధమ్మో నరూపావచరస్స ధమ్మస్స అత్థిపచ్చయేన పచ్చయో – సహజాతం, పురేజాతం, పచ్ఛాజాతం. రూపావచరో ధమ్మో రూపావచరస్స చ నరూపావచరస్స చ ధమ్మస్స అత్థిపచ్చయేన పచ్చయో (పటిచ్చసదిసం). (౩)

నరూపావచరో ధమ్మో నరూపావచరస్స ధమ్మస్స అత్థిపచ్చయేన పచ్చయో – సహజాతం, పురేజాతం, పచ్ఛాజాతం, ఆహారం, ఇన్ద్రియం (సంఖిత్తం). నరూపావచరో ధమ్మో రూపావచరస్స ధమ్మస్స అత్థిపచ్చయేన పచ్చయో – సహజాతం, పురేజాతం. సహజాతం – పటిసన్ధిక్ఖణే వత్థు రూపావచరానం ఖన్ధానం అత్థిపచ్చయేన పచ్చయో. పురేజాతం – దిబ్బేన చక్ఖునా రూపం పస్సతి, దిబ్బాయ సోతధాతుయా సద్దం సుణాతి, వత్థు రూపావచరానం ఖన్ధానం అత్థిపచ్చయేన పచ్చయో. (౨)

౨౫౮. రూపావచరో చ నరూపావచరో చ ధమ్మా రూపావచరస్స ధమ్మస్స అత్థిపచ్చయేన పచ్చయో – సహజాతం, పురేజాతం. సహజాతో – రూపావచరో ఏకో ఖన్ధో చ వత్థు చ తిణ్ణన్నం ఖన్ధానం అత్థిపచ్చయేన పచ్చయో…పే… ద్వే ఖన్ధా చ…పే… పటిసన్ధిక్ఖణే…పే…. రూపావచరో చ నరూపావచరో చ ధమ్మా నరూపావచరస్స ధమ్మస్స అత్థిపచ్చయేన పచ్చయో – సహజాతం, పచ్ఛాజాతం, ఆహారం, ఇన్ద్రియం. సహజాతా – రూపావచరా ఖన్ధా చ మహాభూతా చ చిత్తసముట్ఠానానం రూపానం అత్థిపచ్చయేన పచ్చయో; పటిసన్ధిక్ఖణే…పే…. పచ్ఛాజాతా – రూపావచరా ఖన్ధా చ కబళీకారో ఆహారో చ పురేజాతస్స ఇమస్స కాయస్స అత్థిపచ్చయేన పచ్చయో. పచ్ఛాజాతా – రూపావచరా ఖన్ధా చ రూపజీవితిన్ద్రియఞ్చ కటత్తారూపానం అత్థిపచ్చయేన పచ్చయో. (౨)

నత్థిపచ్చయేన పచ్చయో… విగతపచ్చయేన పచ్చయో… అవిగతపచ్చయేన పచ్చయో.