౧. విభఙ్గవారో

హేతుపచ్చయో

౨౩౭. రూపావచరం ధమ్మం పచ్చయా రూపావచరో ధమ్మో ఉప్పజ్జతి హేతుపచ్చయా… తీణి (పటిచ్చసదిసం).

నరూపావచరం ధమ్మం పచ్చయా నరూపావచరో ధమ్మో ఉప్పజ్జతి హేతుపచ్చయా – నరూపావచరం ఏకం ఖన్ధం పచ్చయా తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే…పే… (యావ అజ్ఝత్తికం మహాభూతం) వత్థుం పచ్చయా నరూపావచరా ఖన్ధా. నరూపావచరం ధమ్మం పచ్చయా రూపావచరో ధమ్మో ఉప్పజ్జతి హేతుపచ్చయా – వత్థుం పచ్చయా రూపావచరా ఖన్ధా; పటిసన్ధిక్ఖణే…పే…. నరూపావచరం ధమ్మం పచ్చయా రూపావచరో చ నరూపావచరో చ ధమ్మా ఉప్పజ్జన్తి హేతుపచ్చయా – వత్థుం పచ్చయా రూపావచరా ఖన్ధా, మహాభూతే పచ్చయా చిత్తసముట్ఠానం రూపం; పటిసన్ధిక్ఖణే…పే…. (౩)

౨౩౮. రూపావచరఞ్చ నరూపావచరఞ్చ ధమ్మం పచ్చయా రూపావచరో ధమ్మో ఉప్పజ్జతి హేతుపచ్చయా – రూపావచరం ఏకం ఖన్ధఞ్చ వత్థుఞ్చ పచ్చయా తయో ఖన్ధా…పే… ద్వే ఖన్ధే చ…పే… పటిసన్ధిక్ఖణే…పే…. రూపావచరఞ్చ నరూపావచరఞ్చ ధమ్మం పచ్చయా నరూపావచరో ధమ్మో ఉప్పజ్జతి హేతుపచ్చయా – రూపావచరే ఖన్ధే చ మహాభూతే చ పచ్చయా చిత్తసముట్ఠానం రూపం; పటిసన్ధిక్ఖణే…పే…. రూపావచరఞ్చ నరూపావచరఞ్చ ధమ్మం పచ్చయా రూపావచరో చ నరూపావచరో చ ధమ్మా ఉప్పజ్జన్తి హేతుపచ్చయా – రూపావచరం ఏకం ఖన్ధఞ్చ వత్థుఞ్చ పచ్చయా తయో ఖన్ధా…పే… ద్వే ఖన్ధే చ…పే… రూపావచరే ఖన్ధే చ మహాభూతే చ పచ్చయా చిత్తసముట్ఠానం రూపం; పటిసన్ధిక్ఖణే…పే…. (౩) (సంఖిత్తం.)