౧. విభఙ్గవారో

నహేతు-నఆరమ్మణపచ్చయా

౨౩౦. నరూపావచరం ధమ్మం పటిచ్చ నరూపావచరో ధమ్మో ఉప్పజ్జతి నహేతుపచ్చయా – అహేతుకం నరూపావచరం ఏకం ఖన్ధం పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే…పే… అహేతుకపటిసన్ధిక్ఖణే…పే… ఖన్ధే పటిచ్చ వత్థు, వత్థుం పటిచ్చ ఖన్ధా, ఏకం మహాభూతం…పే… (యావ అసఞ్ఞసత్తా) విచికిచ్ఛాసహగతే ఉద్ధచ్చసహగతే ఖన్ధే పటిచ్చ విచికిచ్ఛాసహగతో ఉద్ధచ్చసహగతో మోహో. (౧)

నఆరమ్మణపచ్చయా… తీణి.

నఅధిపతిపచ్చయాది

౨౩౧. రూపావచరం ధమ్మం పటిచ్చ రూపావచరో ధమ్మో ఉప్పజ్జతి నఅధిపతిపచ్చయా – రూపావచరే ఖన్ధే పటిచ్చ రూపావచరాధిపతి విపాకం, రూపావచరం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే… పటిసన్ధిక్ఖణే…పే…. రూపావచరం ధమ్మం పటిచ్చ నరూపావచరో ధమ్మో ఉప్పజ్జతి నఅధిపతిపచ్చయా – విపాకే రూపావచరే ఖన్ధే పటిచ్చ చిత్తసముట్ఠానం రూపం; పటిసన్ధిక్ఖణే…పే…. రూపావచరం ధమ్మం పటిచ్చ రూపావచరో చ నరూపావచరో చ ధమ్మా ఉప్పజ్జన్తి నఅధిపతిపచ్చయా – విపాకం రూపావచరం ఏకం ఖన్ధం పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే…పే… పటిసన్ధిక్ఖణే…పే…. (౩)

నరూపావచరం ధమ్మం పటిచ్చ నరూపావచరో ధమ్మో ఉప్పజ్జతి నఅధిపతిపచ్చయా – నరూపావచరం ఏకం ఖన్ధం పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే…పే… తీణి. (నకామావచరం పటిచ్చవారసదిసం నిన్నానం, ఇధ సబ్బే మహాభూతా కాతబ్బా.) (౩)

౨౩౨. రూపావచరఞ్చ నరూపావచరఞ్చ ధమ్మం పటిచ్చ రూపావచరో ధమ్మో ఉప్పజ్జతి నఅధిపతిపచ్చయా – పటిసన్ధిక్ఖణే రూపావచరం ఏకం ఖన్ధఞ్చ వత్థుఞ్చ పటిచ్చ తయో ఖన్ధా…పే… ద్వే ఖన్ధే చ…పే…. రూపావచరఞ్చ నరూపావచరఞ్చ ధమ్మం పటిచ్చ నరూపావచరో ధమ్మో ఉప్పజ్జతి నఅధిపతిపచ్చయా – విపాకే రూపావచరే ఖన్ధే చ మహాభూతే చ పటిచ్చ చిత్తసముట్ఠానం రూపం; పటిసన్ధిక్ఖణే…పే…. రూపావచరఞ్చ నరూపావచరఞ్చ ధమ్మం పటిచ్చ రూపావచరో చ నరూపావచరో చ ధమ్మా ఉప్పజ్జన్తి నఅధిపతిపచ్చయా – పటిసన్ధిక్ఖణే రూపావచరం ఏకం ఖన్ధఞ్చ వత్థుఞ్చ పటిచ్చ తయో ఖన్ధా…పే… ద్వే ఖన్ధే చ…పే… రూపావచరే ఖన్ధే చ మహాభూతే చ పటిచ్చ కటత్తారూపం. (౩) నఅనన్తరపచ్చయా…పే… నఉపనిస్సయపచ్చయా.

నపురేజాతపచ్చయాది

౨౩౩. రూపావచరం ధమ్మం పటిచ్చ రూపావచరో ధమ్మో ఉప్పజ్జతి నపురేజాతపచ్చయా – పటిసన్ధిక్ఖణే రూపావచరం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే…. రూపావచరం ధమ్మం పటిచ్చ నరూపావచరో ధమ్మో ఉప్పజ్జతి నపురేజాతపచ్చయా – రూపావచరే ఖన్ధే పటిచ్చ చిత్తసముట్ఠానం రూపం; పటిసన్ధిక్ఖణే…పే…. రూపావచరం ధమ్మం పటిచ్చ రూపావచరో చ నరూపావచరో చ ధమ్మా ఉప్పజ్జన్తి నపురేజాతపచ్చయా – పటిసన్ధిక్ఖణే రూపావచరం ఏకం ఖన్ధం పటిచ్చ తయో ఖన్ధా కటత్తా చ రూపం…పే… ద్వే ఖన్ధే…పే…. (౩)

నరూపావచరం ధమ్మం పటిచ్చ నరూపావచరో ధమ్మో ఉప్పజ్జతి నపురేజాతపచ్చయా – అరూపే నరూపావచరం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే… నరూపావచరే ఖన్ధే పటిచ్చ చిత్తసముట్ఠానం రూపం; పటిసన్ధిక్ఖణే…పే… (యావ అసఞ్ఞసత్తా, ఇతరే పఞ్చపి పఞ్హా, అనులోమం కాతబ్బం) నపచ్ఛాజాతపచ్చయా… నవ.

నఆసేవనపచ్చయాది

౨౩౪. రూపావచరం ధమ్మం పటిచ్చ రూపావచరో ధమ్మో ఉప్పజ్జతి నఆసేవనపచ్చయా – విపాకం రూపావచరం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే… పటిసన్ధిక్ఖణే…పే…. రూపావచరం ధమ్మం పటిచ్చ నరూపావచరో ధమ్మో ఉప్పజ్జతి నఆసేవనపచ్చయా – రూపావచరే ఖన్ధే పటిచ్చ చిత్తసముట్ఠానం రూపం; పటిసన్ధిక్ఖణే…పే…. రూపావచరం ధమ్మం పటిచ్చ రూపావచరో చ నరూపావచరో చ ధమ్మా ఉప్పజ్జన్తి నఆసేవనపచ్చయా – విపాకం రూపావచరం ఏకం ఖన్ధం పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే…పే… పటిసన్ధిక్ఖణే …పే…. (౩)

నరూపావచరం ధమ్మం పటిచ్చ నరూపావచరో ధమ్మో ఉప్పజ్జతి నఆసేవనపచ్చయా… తీణి.

రూపావచరఞ్చ నరూపావచరఞ్చ ధమ్మం పటిచ్చ రూపావచరో ధమ్మో ఉప్పజ్జతి నఆసేవనపచ్చయా (సంఖిత్తం. మూలం. ఇతరేపి పఞ్హా కాతబ్బా)… నకమ్మపచ్చయా… ద్వే…పే… నసమ్పయుత్తపచ్చయా.

౨౩౫. నరూపావచరం ధమ్మం పటిచ్చ నరూపావచరో ధమ్మో ఉప్పజ్జతి నవిప్పయుత్తపచ్చయా – అరూపే నరూపావచరం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే… బాహిరం… ఆహారసముట్ఠానం… ఉతుసముట్ఠానం… అసఞ్ఞసత్తానం…పే… (సంఖిత్తం).