౧. విభఙ్గవారో

హేతుపచ్చయో

౧౯౪. కామావచరం ధమ్మం పటిచ్చ కామావచరో ధమ్మో ఉప్పజ్జతి హేతుపచ్చయా – కామావచరం ఏకం ఖన్ధం పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే…పే… పటిసన్ధిక్ఖణే…పే… ఏకం మహాభూతం…పే… (సంఖిత్తం). కామావచరం ధమ్మం పటిచ్చ నకామావచరో ధమ్మో ఉప్పజ్జతి హేతుపచ్చయా – పటిసన్ధిక్ఖణే వత్థుం పటిచ్చ నకామావచరా ఖన్ధా. కామావచరం ధమ్మం పటిచ్చ కామావచరో చ నకామావచరో చ ధమ్మా ఉప్పజ్జన్తి హేతుపచ్చయా – పటిసన్ధిక్ఖణే వత్థుం పటిచ్చ నకామావచరా ఖన్ధా, మహాభూతే పటిచ్చ కటత్తారూపం. (౩)

౧౯౫. నకామావచరం ధమ్మం పటిచ్చ నకామావచరో ధమ్మో ఉప్పజ్జతి హేతుపచ్చయా – నకామావచరం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే… పటిసన్ధిక్ఖణే…పే…. నకామావచరం ధమ్మం పటిచ్చ కామావచరో ధమ్మో ఉప్పజ్జతి హేతుపచ్చయా – నకామావచరే ఖన్ధే పటిచ్చ చిత్తసముట్ఠానం రూపం; పటిసన్ధిక్ఖణే నకామావచరే ఖన్ధే పటిచ్చ కటత్తారూపం. నకామావచరం ధమ్మం పటిచ్చ కామావచరో చ నకామావచరో చ ధమ్మా ఉప్పజ్జన్తి హేతుపచ్చయా – నకామావచరం ఏకం ఖన్ధం పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే…పే… పటిసన్ధిక్ఖణే…పే…. (౩)

౧౯౬. కామావచరఞ్చ నకామావచరఞ్చ ధమ్మం పటిచ్చ కామావచరో ధమ్మో ఉప్పజ్జతి హేతుపచ్చయా – నకామావచరే ఖన్ధే చ మహాభూతే చ పటిచ్చ చిత్తసముట్ఠానం రూపం; పటిసన్ధిక్ఖణే నకామావచరే ఖన్ధే చ మహాభూతే చ పటిచ్చ కటత్తారూపం. కామావచరఞ్చ నకామావచరఞ్చ ధమ్మం పటిచ్చ నకామావచరో ధమ్మో ఉప్పజ్జతి హేతుపచ్చయా – పటిసన్ధిక్ఖణే నకామావచరం ఏకం ఖన్ధఞ్చ వత్థుఞ్చ పటిచ్చ తయో ఖన్ధా…పే… ద్వే ఖన్ధే చ…పే…. కామావచరఞ్చ నకామావచరఞ్చ ధమ్మం పటిచ్చ కామావచరో చ నకామావచరో చ ధమ్మా ఉప్పజ్జన్తి హేతుపచ్చయా – పటిసన్ధిక్ఖణే నకామావచరం ఏకం ఖన్ధఞ్చ వత్థుఞ్చ పటిచ్చ తయో ఖన్ధా…పే… ద్వే ఖన్ధే చ…పే… నకామావచరే ఖన్ధే చ మహాభూతే చ పటిచ్చ కటత్తారూపం. (౩) (సంఖిత్తం.)