౧. విభఙ్గవారో

నహేతుపచ్చయో

౧౭౯. ఉపేక్ఖాసహగతం ధమ్మం పటిచ్చ ఉపేక్ఖాసహగతో ధమ్మో ఉప్పజ్జతి నహేతుపచ్చయా – అహేతుకం ఉపేక్ఖాసహగతం ఏకం ఖన్ధం పటిచ్చ ద్వే ఖన్ధా, ద్వే ఖన్ధే…పే… అహేతుకపటిసన్ధిక్ఖణే…పే… విచికిచ్ఛాసహగతే ఉద్ధచ్చసహగతే ఖన్ధే పటిచ్చ విచికిచ్ఛాసహగతో ఉద్ధచ్చసహగతో మోహో. ఉపేక్ఖాసహగతం ధమ్మం పటిచ్చ నఉపేక్ఖాసహగతో ధమ్మో ఉప్పజ్జతి నహేతుపచ్చయా – అహేతుకే ఉపేక్ఖాసహగతే ఖన్ధే పటిచ్చ ఉపేక్ఖా చిత్తసముట్ఠానఞ్చ రూపం; అహేతుకపటిసన్ధిక్ఖణే…పే…. ఉపేక్ఖాసహగతం ధమ్మం పటిచ్చ ఉపేక్ఖాసహగతో చ నఉపేక్ఖాసహగతో చ ధమ్మా ఉప్పజ్జన్తి నహేతుపచ్చయా – అహేతుకం ఉపేక్ఖాసహగతం ఏకం ఖన్ధం పటిచ్చ ద్వే ఖన్ధా ఉపేక్ఖా చ చిత్తసముట్ఠానఞ్చ రూపం, ద్వే ఖన్ధే…పే… అహేతుకపటిసన్ధిక్ఖణే…పే…. (౩)

౧౮౦. నఉపేక్ఖాసహగతం ధమ్మం పటిచ్చ నఉపేక్ఖాసహగతో ధమ్మో ఉప్పజ్జతి నహేతుపచ్చయా – అహేతుకం నఉపేక్ఖాసహగతం ఏకం ఖన్ధం పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే…పే… అహేతుకం ఉపేక్ఖం పటిచ్చ చిత్తసముట్ఠానం రూపం; అహేతుకపటిసన్ధిక్ఖణే…పే… ఉపేక్ఖం పటిచ్చ వత్థు, వత్థుం పటిచ్చ ఉపేక్ఖా, ఏకం మహాభూతం…పే… (యావ అసఞ్ఞసత్తా).

నఉపేక్ఖాసహగతం ధమ్మం పటిచ్చ ఉపేక్ఖాసహగతో ధమ్మో ఉప్పజ్జతి నహేతుపచ్చయా – అహేతుకం ఉపేక్ఖం పటిచ్చ సమ్పయుత్తకా ఖన్ధా; అహేతుకపటిసన్ధిక్ఖణే ఉపేక్ఖం పటిచ్చ సమ్పయుత్తకా ఖన్ధా; అహేతుకపటిసన్ధిక్ఖణే వత్థుం పటిచ్చ ఉపేక్ఖాసహగతా ఖన్ధా; విచికిచ్ఛాసహగతం ఉద్ధచ్చసహగతం ఉపేక్ఖం పటిచ్చ విచికిచ్ఛాసహగతో ఉద్ధచ్చసహగతో మోహో.

నఉపేక్ఖాసహగతం ధమ్మం పటిచ్చ ఉపేక్ఖాసహగతో చ నఉపేక్ఖాసహగతో చ ధమ్మా ఉప్పజ్జన్తి నహేతుపచ్చయా – అహేతుకం ఉపేక్ఖం పటిచ్చ సమ్పయుత్తకా ఖన్ధా చిత్తసముట్ఠానఞ్చ రూపం, అహేతుకం ఉపేక్ఖం పటిచ్చ సమ్పయుత్తకా ఖన్ధా, మహాభూతే పటిచ్చ చిత్తసముట్ఠానం రూపం; అహేతుకపటిసన్ధిక్ఖణే ఉపేక్ఖం పటిచ్చ సమ్పయుత్తకా ఖన్ధా కటత్తా చ రూపం, అహేతుకపటిసన్ధిక్ఖణే ఉపేక్ఖం పటిచ్చ సమ్పయుత్తకా ఖన్ధా, మహాభూతే పటిచ్చ కటత్తారూపం, అహేతుకపటిసన్ధిక్ఖణే వత్థుం పటిచ్చ ఉపేక్ఖాసహగతా ఖన్ధా, మహాభూతే పటిచ్చ కటత్తారూపం, అహేతుకపటిసన్ధిక్ఖణే వత్థుం పటిచ్చ ఉపేక్ఖా చ సమ్పయుత్తకా చ ఖన్ధా. (౩)

౧౮౧. ఉపేక్ఖాసహగతఞ్చ నఉపేక్ఖాసహగతఞ్చ ధమ్మం పటిచ్చ ఉపేక్ఖాసహగతో ధమ్మో ఉప్పజ్జతి నహేతుపచ్చయా – అహేతుకం ఉపేక్ఖాసహగతం ఏకం ఖన్ధఞ్చ ఉపేక్ఖఞ్చ పటిచ్చ ద్వే ఖన్ధా, ద్వే ఖన్ధే…పే… అహేతుకపటిసన్ధిక్ఖణే ఉపేక్ఖాసహగతం ఏకం ఖన్ధఞ్చ ఉపేక్ఖఞ్చ పటిచ్చ ద్వే ఖన్ధా, ద్వే ఖన్ధే…పే… అహేతుకపటిసన్ధిక్ఖణే ఉపేక్ఖాసహగతం ఏకం ఖన్ధఞ్చ వత్థుఞ్చ పటిచ్చ ద్వే ఖన్ధా; ద్వే ఖన్ధే…పే… విచికిచ్ఛాసహగతే ఉద్ధచ్చసహగతే ఖన్ధే చ ఉపేక్ఖఞ్చ పటిచ్చ విచికిచ్ఛాసహగతో ఉద్ధచ్చసహగతో మోహో.

ఉపేక్ఖాసహగతఞ్చ నఉపేక్ఖాసహగతఞ్చ ధమ్మం పటిచ్చ నఉపేక్ఖాసహగతో ధమ్మో ఉప్పజ్జతి నహేతుపచ్చయా – అహేతుకే ఉపేక్ఖాసహగతే ఖన్ధే చ ఉపేక్ఖఞ్చ పటిచ్చ చిత్తసముట్ఠానం రూపం, అహేతుకే ఉపేక్ఖాసహగతే ఖన్ధే చ మహాభూతే చ పటిచ్చ చిత్తసముట్ఠానం రూపం; అహేతుకపటిసన్ధిక్ఖణే ఉపేక్ఖాసహగతే ఖన్ధే చ ఉపేక్ఖఞ్చ పటిచ్చ కటత్తారూపం, అహేతుకపటిసన్ధిక్ఖణే ఉపేక్ఖాసహగతే ఖన్ధే చ మహాభూతే చ పటిచ్చ కటత్తారూపం, అహేతుకపటిసన్ధిక్ఖణే ఉపేక్ఖాసహగతే ఖన్ధే చ వత్థుఞ్చ పటిచ్చ ఉపేక్ఖా.

ఉపేక్ఖాసహగతఞ్చ నఉపేక్ఖాసహగతఞ్చ ధమ్మం పటిచ్చ ఉపేక్ఖాసహగతో చ నఉపేక్ఖాసహగతో చ ధమ్మా ఉప్పజ్జన్తి నహేతుపచ్చయా – అహేతుకం ఉపేక్ఖాసహగతం ఏకం ఖన్ధఞ్చ ఉపేక్ఖఞ్చ పటిచ్చ ద్వే ఖన్ధా చిత్తసముట్ఠానఞ్చ రూపం, ద్వే ఖన్ధే…పే… అహేతుకం ఉపేక్ఖాసహగతం ఏకం ఖన్ధఞ్చ ఉపేక్ఖఞ్చ పటిచ్చ ద్వే ఖన్ధా, ద్వే ఖన్ధే…పే… అహేతుకే ఉపేక్ఖాసహగతే ఖన్ధే చ ఉపేక్ఖఞ్చ మహాభూతే చ పటిచ్చ చిత్తసముట్ఠానం రూపం; అహేతుకపటిసన్ధిక్ఖణే ఉపేక్ఖాసహగతం ఏకం ఖన్ధఞ్చ ఉపేక్ఖఞ్చ పటిచ్చ ద్వే ఖన్ధా కటత్తా చ రూపం, ద్వే ఖన్ధే…పే… అహేతుకపటిసన్ధిక్ఖణే ఉపేక్ఖాసహగతం ఏకం ఖన్ధఞ్చ ఉపేక్ఖఞ్చ పటిచ్చ ద్వే ఖన్ధా, ద్వే ఖన్ధే…పే… అహేతుకే ఉపేక్ఖాసహగతే ఖన్ధే చ ఉపేక్ఖఞ్చ మహాభూతే చ పటిచ్చ కటత్తారూపం; అహేతుకపటిసన్ధిక్ఖణే ఉపేక్ఖాసహగతం ఏకం ఖన్ధఞ్చ వత్థుఞ్చ పటిచ్చ ద్వే ఖన్ధా ఉపేక్ఖా చ, ద్వే ఖన్ధే…పే… (సంఖిత్తం). (౩)