౧. విభఙ్గవారో

హేతుపచ్చయో

౧౭౦. సుఖసహగతో ధమ్మో సుఖసహగతస్స ధమ్మస్స హేతుపచ్చయేన పచ్చయో… చత్తారి. (ఆరమ్మణేపి అధిపతియాపి సప్పీతికదుకసదిసా, సుఖన్తి నానాకరణం.)

అనన్తరపచ్చయాది

౧౭౧. సుఖసహగతో ధమ్మో సుఖసహగతస్స ధమ్మస్స అనన్తరపచ్చయేన పచ్చయో – పురిమా పురిమా సుఖసహగతా ఖన్ధా పచ్ఛిమానం పచ్ఛిమానం సుఖసహగతానం ఖన్ధానం అనన్తరపచ్చయేన పచ్చయో. (మూలం కాతబ్బం.) పురిమా పురిమా సుఖసహగతా ఖన్ధా పచ్ఛిమస్స పచ్ఛిమస్స సుఖస్స అనన్తరపచ్చయేన పచ్చయో. సుఖసహగతం చుతిచిత్తం నసుఖసహగతస్స ఉపపత్తిచిత్తస్స… సుఖసహగతం భవఙ్గం ఆవజ్జనాయ… సుఖసహగతం కాయవిఞ్ఞాణం విపాకమనోధాతుయా… సుఖసహగతా విపాకమనోవిఞ్ఞాణధాతు కిరియమనోవిఞ్ఞాణధాతుయా… సుఖసహగతం భవఙ్గం నసుఖసహగతస్స భవఙ్గస్స… సుఖసహగతం కుసలాకుసలం నసుఖసహగతస్స వుట్ఠానస్స… కిరియం వుట్ఠానస్స… ఫలం వుట్ఠానస్స అనన్తరపచ్చయేన పచ్చయో. (మూలం కాతబ్బం.) పురిమా పురిమా సుఖసహగతా ఖన్ధా పచ్ఛిమానం పచ్ఛిమానం సుఖసహగతానం ఖన్ధానం సుఖస్స చ అనన్తరపచ్చయేన పచ్చయో. (౧)

నసుఖసహగతో ధమ్మో నసుఖసహగతస్స ధమ్మస్స అనన్తరపచ్చయేన పచ్చయో – పురిమా పురిమా నసుఖసహగతా…పే…. (మూలం. తీణిపి సప్పీతికదుకసదిసా.)

౧౭౨. సుఖసహగతో చ నసుఖసహగతో చ ధమ్మా సుఖసహగతస్స ధమ్మస్స అనన్తరపచ్చయేన పచ్చయో – పురిమా పురిమా సుఖసహగతా ఖన్ధా చ సుఖఞ్చ పచ్ఛిమానం పచ్ఛిమానం సుఖసహగతానం ఖన్ధానం అనన్తరపచ్చయేన పచ్చయో. (మూలం కాతబ్బం.) పురిమా పురిమా సుఖసహగతా ఖన్ధా చ సుఖఞ్చ పచ్ఛిమస్స పచ్ఛిమస్స సుఖస్స అనన్తరపచ్చయేన పచ్చయో; సుఖసహగతం చుతిచిత్తఞ్చ సుఖఞ్చ నసుఖసహగతస్స ఉపపత్తిచిత్తస్స సుఖసహగతం భవఙ్గఞ్చ సుఖఞ్చ ఆవజ్జనాయ … సుఖసహగతం కాయవిఞ్ఞాణఞ్చ సుఖఞ్చ విపాకమనోధాతుయా… సుఖసహగతా విపాకమనోవిఞ్ఞాణధాతు చ సుఖఞ్చ కిరియమనోవిఞ్ఞాణధాతుయా… సుఖసహగతం భవఙ్గఞ్చ సుఖఞ్చ నసుఖసహగతస్స భవఙ్గస్స… సుఖసహగతం కుసలాకుసలఞ్చ సుఖఞ్చ నసుఖసహగతస్స వుట్ఠానస్స… కిరియం వుట్ఠానస్స… ఫలం వుట్ఠానస్స అనన్తరపచ్చయేన పచ్చయో. (మూలం కాతబ్బం.) పురిమా పురిమా సుఖసహగతా ఖన్ధా చ సుఖఞ్చ పచ్ఛిమానం పచ్ఛిమానం సుఖసహగతానం ఖన్ధానం సుఖస్స చ అనన్తరపచ్చయేన పచ్చయో. (౩)

సమనన్తరపచ్చయేన పచ్చయో… సహజాతపచ్చయేన పచ్చయో… అఞ్ఞమఞ్ఞపచ్చయేన పచ్చయో… నిస్సయపచ్చయేన పచ్చయో.

ఉపనిస్సయపచ్చయో

౧౭౩. సుఖసహగతో ధమ్మో సుఖసహగతస్స ధమ్మస్స ఉపనిస్సయపచ్చయేన పచ్చయో… తీణి.

నసుఖసహగతో ధమ్మో నసుఖసహగతస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – నసుఖసహగతం సద్ధం ఉపనిస్సాయ నసుఖసహగతేన చిత్తేన దానం దేతి, సీలం…పే… సమాపత్తిం ఉప్పాదేతి, మానం జప్పేతి, దిట్ఠిం గణ్హాతి; నసుఖసహగతం సీలం…పే… పఞ్ఞం… రాగం…పే… పత్థనం… కాయికం సుఖం… కాయికం దుక్ఖం… ఉతుం… భోజనం… సేనాసనం సుఖం ఉపనిస్సాయ నసుఖసహగతేన చిత్తేన దానం దేతి…పే… సమాపత్తిం ఉప్పాదేతి, పాణం హనతి…పే… సఙ్ఘం భిన్దతి; నసుఖసహగతా సద్ధా…పే… సేనాసనం సుఖఞ్చ నసుఖసహగతాయ సద్ధాయ…పే… పఞ్ఞాయ… రాగస్స… దోసస్స…పే… పత్థనాయ… కాయికస్స సుఖస్స, కాయికస్స దుక్ఖస్స, మగ్గస్స, ఫలసమాపత్తియా సుఖస్స చ ఉపనిస్సయపచ్చయేన పచ్చయో. (౧)

నసుఖసహగతో ధమ్మో సుఖసహగతస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – నసుఖసహగతం సద్ధం ఉపనిస్సాయ సుఖసహగతేన చిత్తేన దానం దేతి…పే… సమాపత్తిం ఉప్పాదేతి, మానం జప్పేతి, దిట్ఠిం గణ్హాతి; నసుఖసహగతం సీలం…పే… పఞ్ఞం… రాగం…పే… పత్థనం… కాయికం సుఖం… కాయికం దుక్ఖం… ఉతుం… భోజనం… సేనాసనం సుఖం ఉపనిస్సాయ సుఖసహగతేన చిత్తేన దానం దేతి…పే… సమాపత్తిం ఉప్పాదేతి; సుఖసహగతేన చిత్తేన అదిన్నం ఆదియతి; ముసా…పే… పిసుణం…పే… సమ్ఫం…పే… సన్ధిం…పే… నిల్లోపం…పే… ఏకాగారికం…పే… పరిపన్థే…పే… పరదారం…పే… గామఘాతం…పే… నిగమఘాతం కరోతి; నసుఖసహగతా సద్ధా…పే… సేనాసనం సుఖఞ్చ సుఖసహగతాయ సద్ధాయ…పే… పఞ్ఞాయ… రాగస్స… మానస్స… దిట్ఠియా… పత్థనాయ… కాయికస్స సుఖస్స… మగ్గస్స ఫలసమాపత్తియా ఉపనిస్సయపచ్చయేన పచ్చయో. (౨)

నసుఖసహగతో ధమ్మో సుఖసహగతస్స చ నసుఖసహగతస్స చ ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – నసుఖసహగతం సద్ధం ఉపనిస్సాయ సుఖసహగతేన చిత్తేన దానం దేతి…పే… (దుతియగమనసదిసం) మానం జప్పేతి, దిట్ఠిం గణ్హాతి; నసుఖసహగతం సీలం…పే… సేనాసనం సుఖం ఉపనిస్సాయ దానం దేతి…పే… సమాపత్తిం ఉప్పాదేతి, సుఖసహగతేన చిత్తేన అదిన్నం ఆదియతి…పే… నసుఖసహగతా సద్ధా…పే… సేనాసనం సుఖఞ్చ సుఖసహగతాయ … సద్ధాయ…పే… పత్థనాయ … కాయికస్స సుఖస్స, మగ్గస్స, ఫలసమాపత్తియా సుఖస్స చ ఉపనిస్సయపచ్చయేన పచ్చయో. (౩)

సుఖసహగతో చ నసుఖసహగతో చ ధమ్మా సుఖసహగతస్స ధమ్మస్స ఉపనిస్సయపచ్చయేన పచ్చయో… తీణి.

పురేజాతపచ్చయాది

౧౭౪. నసుఖసహగతో ధమ్మో నసుఖసహగతస్స ధమ్మస్స పురేజాతపచ్చయేన పచ్చయో – ఆరమ్మణపురేజాతం, వత్థుపురేజాతం. ఆరమ్మణపురేజాతం – చక్ఖుం…పే… వత్థుం నసుఖసహగతేన చిత్తేన అనిచ్చతో…పే… విపస్సతి అస్సాదేతి అభినన్దతి, తం ఆరబ్భ నసుఖసహగతో రాగో ఉప్పజ్జతి…పే… దోమనస్సం ఉప్పజ్జతి, సుఖం ఉప్పజ్జతి, దిబ్బేన చక్ఖునా రూపం పస్సతి…పే… ఫోట్ఠబ్బాయతనం కాయవిఞ్ఞాణస్స…పే…. వత్థుపురేజాతం – చక్ఖాయతనం చక్ఖువిఞ్ఞాణస్స…పే… కాయాయతనం కాయవిఞ్ఞాణస్స…పే… వత్థు నసుఖసహగతానం ఖన్ధానం సుఖస్స చ పురేజాతపచ్చయేన పచ్చయో. (౧)

నసుఖసహగతో ధమ్మో సుఖసహగతస్స ధమ్మస్స పురేజాతపచ్చయేన పచ్చయో – ఆరమ్మణపురేజాతం, వత్థుపురేజాతం. ఆరమ్మణపురేజాతం – చక్ఖుం…పే… వత్థుం సుఖసహగతేన చిత్తేన అనిచ్చతో…పే… విపస్సతి, అస్సాదేతి అభినన్దతి, తం ఆరబ్భ సుఖసహగతో రాగో ఉప్పజ్జతి, దిట్ఠి ఉప్పజ్జతి. వత్థుపురేజాతం – వత్థు సుఖసహగతానం ఖన్ధానం పురేజాతపచ్చయేన పచ్చయో. (౨)

నసుఖసహగతో ధమ్మో సుఖసహగతస్స చ నసుఖసహగతస్స చ ధమ్మస్స పురేజాతపచ్చయేన పచ్చయో – ఆరమ్మణపురేజాతం, వత్థుపురేజాతం. ఆరమ్మణపురేజాతం – చక్ఖుం…పే… వత్థుం సుఖసహగతేన చిత్తేన అనిచ్చతో…పే… విపస్సతి, అస్సాదేతి అభినన్దతి, తం ఆరబ్భ సుఖఞ్చ సమ్పయుత్తకా ఖన్ధా చ ఉప్పజ్జన్తి. వత్థుపురేజాతం – వత్థు సుఖసహగతానం ఖన్ధానం సుఖస్స చ పురేజాతపచ్చయేన పచ్చయో. (౩)

పచ్ఛాజాతపచ్చయేన పచ్చయో… తీణి… ఆసేవనపచ్చయేన పచ్చయో… నవ.

కమ్మపచ్చయాది

౧౭౫. సుఖసహగతో ధమ్మో సుఖసహగతస్స ధమ్మస్స కమ్మపచ్చయేన పచ్చయో – సహజాతా, నానాక్ఖణికా. (ఛ కమ్మాని చత్తారి సహజాతాపి నానాక్ఖణికాపి కాతబ్బా, ద్వే నానాక్ఖణికా.)… విపాకపచ్చయేన పచ్చయో… నవ… ఆహారపచ్చయేన పచ్చయో… చత్తారి… ఇన్ద్రియపచ్చయేన పచ్చయో… నవ… ఝానపచ్చయేన పచ్చయో… నవ… మగ్గపచ్చయేన పచ్చయో… చత్తారి… సమ్పయుత్తపచ్చయేన పచ్చయో… ఛ… విప్పయుత్తపచ్చయేన పచ్చయో… పఞ్చ… అత్థిపచ్చయేన పచ్చయో… నవ… నత్థిపచ్చయేన పచ్చయో… నవ… విగతపచ్చయేన పచ్చయో… నవ… అవిగతపచ్చయేన పచ్చయో… నవ.