౧. విభఙ్గవారో

నహేతుపచ్చయో

౧౪౪. సప్పీతికం ధమ్మం పటిచ్చ సప్పీతికో ధమ్మో ఉప్పజ్జతి నహేతుపచ్చయా – అహేతుకం సప్పీతికం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే…. సప్పీతికం ధమ్మం పటిచ్చ అప్పీతికో ధమ్మో ఉప్పజ్జతి నహేతుపచ్చయా – అహేతుకే సప్పీతికే ఖన్ధే పటిచ్చ పీతి చ చిత్తసముట్ఠానఞ్చ రూపం. సప్పీతికం ధమ్మం పటిచ్చ సప్పీతికో చ అప్పీతికో చ ధమ్మా ఉప్పజ్జన్తి నహేతుపచ్చయా – అహేతుకం సప్పీతికం ఏకం ఖన్ధం పటిచ్చ తయో ఖన్ధా పీతి చ చిత్తసముట్ఠానఞ్చ రూపం…పే… ద్వే ఖన్ధే…పే…. (౩)

అప్పీతికం ధమ్మం పటిచ్చ అప్పీతికో ధమ్మో ఉప్పజ్జతి నహేతుపచ్చయా – అహేతుకం అప్పీతికం ఏకం ఖన్ధం పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే…పే… పీతిం పటిచ్చ చిత్తసముట్ఠానం రూపం; అహేతుకపటిసన్ధిక్ఖణే అప్పీతికం ఏకం ఖన్ధం పటిచ్చ తయో ఖన్ధా కటత్తా చ రూపం…పే… ద్వే ఖన్ధే పటిచ్చ ద్వే ఖన్ధా కటత్తా చ రూపం, ఖన్ధే పటిచ్చ వత్థు, వత్థుం పటిచ్చ ఖన్ధా, ఏకం మహాభూతం…పే… (యావ అసఞ్ఞసత్తాపి) విచికిచ్ఛాసహగతే ఉద్ధచ్చసహగతే ఖన్ధే పటిచ్చ విచికిచ్ఛాసహగతో ఉద్ధచ్చసహగతో మోహో. అప్పీతికం ధమ్మం పటిచ్చ సప్పీతికో ధమ్మో ఉప్పజ్జతి నహేతుపచ్చయా – అహేతుకం పీతిం పటిచ్చ సప్పీతికా ఖన్ధా. (మూలం కాతబ్బం.) పీతిం పటిచ్చ సప్పీతికా ఖన్ధా చిత్తసముట్ఠానఞ్చ రూపం. (౩)

౧౪౫. సప్పీతికఞ్చ అప్పీతికఞ్చ ధమ్మం పటిచ్చ సప్పీతికో ధమ్మో ఉప్పజ్జతి నహేతుపచ్చయా – అహేతుకం సప్పీతికం ఏకం ఖన్ధఞ్చ పీతిఞ్చ పటిచ్చ తయో ఖన్ధా…పే… ద్వే ఖన్ధే చ…పే…. సప్పీతికఞ్చ అప్పీతికఞ్చ ధమ్మం పటిచ్చ అప్పీతికో ధమ్మో ఉప్పజ్జతి నహేతుపచ్చయా – అహేతుకే సప్పీతికే ఖన్ధే చ పీతిఞ్చ పటిచ్చ చిత్తసముట్ఠానం రూపం, అహేతుకే సప్పీతికే ఖన్ధే చ మహాభూతే చ పటిచ్చ చిత్తసముట్ఠానం రూపం. సప్పీతికఞ్చ అప్పీతికఞ్చ ధమ్మం పటిచ్చ సప్పీతికో చ అప్పీతికో చ ధమ్మా ఉప్పజ్జన్తి నహేతుపచ్చయా – అహేతుకం సప్పీతికం ఏకం ఖన్ధఞ్చ పీతిఞ్చ పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే చ…పే… అహేతుకం సప్పీతికం ఏకం ఖన్ధఞ్చ పీతిఞ్చ పటిచ్చ తయో ఖన్ధా…పే… ద్వే ఖన్ధే చ…పే… అహేతుకే సప్పీతికే ఖన్ధే చ పీతిఞ్చ మహాభూతే చ పటిచ్చ చిత్తసముట్ఠానం రూపం. (౩)