౧-౪. పచ్చయానులోమాది

హేతుపచ్చయో

౧౧౫. సవితక్కం ధమ్మం సంసట్ఠో సవితక్కో ధమ్మో ఉప్పజ్జతి హేతుపచ్చయా – సవితక్కం ఏకం ఖన్ధం సంసట్ఠా తయో ఖన్ధా…పే… ద్వే ఖన్ధే…పే… పటిసన్ధిక్ఖణే…పే…. సవితక్కం ధమ్మం సంసట్ఠో అవితక్కో ధమ్మో ఉప్పజ్జతి హేతుపచ్చయా – సవితక్కే ఖన్ధే సంసట్ఠో వితక్కో; పటిసన్ధిక్ఖణే…పే…. సవితక్కం ధమ్మం సంసట్ఠో సవితక్కో చ అవితక్కో చ ధమ్మా ఉప్పజ్జన్తి హేతుపచ్చయా – సవితక్కం ఏకం ఖన్ధం సంసట్ఠా తయో ఖన్ధా వితక్కో చ…పే… ద్వే ఖన్ధే…పే… పటిసన్ధిక్ఖణే…పే…. (౩)

అవితక్కం ధమ్మం సంసట్ఠో అవితక్కో ధమ్మో ఉప్పజ్జతి హేతుపచ్చయా – అవితక్కం ఏకం ఖన్ధం సంసట్ఠా తయో ఖన్ధా…పే… ద్వే ఖన్ధే…పే… పటిసన్ధిక్ఖణే…పే…. అవితక్కం ధమ్మం సంసట్ఠో సవితక్కో ధమ్మో ఉప్పజ్జతి హేతుపచ్చయా – వితక్కం సంసట్ఠా సమ్పయుత్తకా ఖన్ధా; పటిసన్ధిక్ఖణే…పే…. (౨)

సవితక్కఞ్చ అవితక్కఞ్చ ధమ్మం సంసట్ఠో సవితక్కో ధమ్మో ఉప్పజ్జతి హేతుపచ్చయా – సవితక్కం ఏకం ఖన్ధఞ్చ వితక్కఞ్చ సంసట్ఠా తయో ఖన్ధా…పే… ద్వే ఖన్ధే…పే… పటిసన్ధిక్ఖణే…పే…. (౧) (సంఖిత్తం.)

హేతుయా ఛ, ఆరమ్మణే ఛ, అధిపతియా ఛ (సబ్బత్థ ఛ) అవిగతే ఛ.

అనులోమం.

సవితక్కం ధమ్మం సంసట్ఠో సవితక్కో ధమ్మో ఉప్పజ్జతి నహేతుపచ్చయా. (ఏవం ఛ పఞ్హా కాతబ్బా అనులోమసదిసా, అహేతుకాతి నియామేతబ్బా, తీణియేవ, మోహో ఉద్ధరితబ్బో.)

నహేతుయా ఛ, నఅధిపతియా ఛ, నపురేజాతే ఛ, నపచ్ఛాజాతే ఛ, నఆసేవనే ఛ, నకమ్మే చత్తారి, నవిపాకే ఛ, నఝానే ఏకం, నమగ్గే ఛ, నవిప్పయుత్తే ఛ.

పచ్చనీయం.