౧-౪. పచ్చయచతుక్కం

హేతుపచ్చయో

౬౪. దస్సనేన పహాతబ్బహేతుకం ధమ్మం సంసట్ఠో దస్సనేన పహాతబ్బహేతుకో ధమ్మో ఉప్పజ్జతి హేతుపచ్చయా – దస్సనేన పహాతబ్బహేతుకం ఏకం ఖన్ధం సంసట్ఠా తయో ఖన్ధా…పే… ద్వే ఖన్ధే…పే…. (౧)

నదస్సనేన పహాతబ్బహేతుకం ధమ్మం సంసట్ఠో నదస్సనేన పహాతబ్బహేతుకో ధమ్మో ఉప్పజ్జతి హేతుపచ్చయా – నదస్సనేన పహాతబ్బహేతుకం ఏకం ఖన్ధం సంసట్ఠా తయో ఖన్ధా…పే… ద్వే ఖన్ధే…పే… పటిసన్ధిక్ఖణే…పే…. (౧)

నదస్సనేన పహాతబ్బహేతుకం ధమ్మం సంసట్ఠో దస్సనేన పహాతబ్బహేతుకో ధమ్మో ఉప్పజ్జతి హేతుపచ్చయా – విచికిచ్ఛాసహగతం మోహం సంసట్ఠా సమ్పయుత్తకా ఖన్ధా. (౨)

దస్సనేన పహాతబ్బహేతుకఞ్చ నదస్సనేన పహాతబ్బహేతుకఞ్చ ధమ్మం సంసట్ఠో దస్సనేన పహాతబ్బహేతుకో ధమ్మో ఉప్పజ్జతి హేతుపచ్చయా – విచికిచ్ఛాసహగతం ఏకం ఖన్ధఞ్చ మోహఞ్చ సంసట్ఠా తయో ఖన్ధా…పే… ద్వే ఖన్ధే చ…పే…. (౧)

ఆరమ్మణపచ్చయో

౬౫. దస్సనేన పహాతబ్బహేతుకం ధమ్మం సంసట్ఠో దస్సనేన పహాతబ్బహేతుకో ధమ్మో ఉప్పజ్జతి ఆరమ్మణపచ్చయా… తీణి (పటిచ్చసదిసా).

నదస్సనేన పహాతబ్బహేతుకం ధమ్మం సంసట్ఠో నదస్సనేన పహాతబ్బహేతుకో ధమ్మో ఉప్పజ్జతి ఆరమ్మణపచ్చయా – నదస్సనేన పహాతబ్బహేతుకం ఏకం ఖన్ధం సంసట్ఠా తయో ఖన్ధా…పే… ద్వే ఖన్ధే…పే… పటిసన్ధిక్ఖణే…పే…. (౧)

నదస్సనేన పహాతబ్బహేతుకం ధమ్మం సంసట్ఠో దస్సనేన పహాతబ్బహేతుకో ధమ్మో ఉప్పజ్జతి ఆరమ్మణపచ్చయా (పటిచ్చసదిసం). (౨)

దస్సనేన పహాతబ్బహేతుకఞ్చ నదస్సనేన పహాతబ్బహేతుకఞ్చ ధమ్మం సంసట్ఠో దస్సనేన పహాతబ్బహేతుకో ధమ్మో ఉప్పజ్జతి ఆరమ్మణపచ్చయా (పటిచ్చసదిసం, సంఖిత్తం). (౧)

౬౬. హేతుయా చత్తారి, ఆరమ్మణే ఛ, అధిపతియా ద్వే, అనన్తరే ఛ (సబ్బత్థ ఛ), విపాకే ఏకం…పే… అవిగతే ఛ.

అనులోమం.

నహేతుపచ్చయో

౬౭. దస్సనేన పహాతబ్బహేతుకం ధమ్మం సంసట్ఠో నదస్సనేన పహాతబ్బహేతుకో ధమ్మో ఉప్పజ్జతి నహేతుపచ్చయా – విచికిచ్ఛాసహగతే ఖన్ధే సంసట్ఠో విచికిచ్ఛాసహగతో మోహో. (౧)

నదస్సనేన పహాతబ్బహేతుకం ధమ్మం సంసట్ఠో నదస్సనేన పహాతబ్బహేతుకో ధమ్మో ఉప్పజ్జతి నహేతుపచ్చయా – అహేతుకం నదస్సనేన పహాతబ్బహేతుకం ఏకం ఖన్ధం సంసట్ఠా తయో ఖన్ధా…పే… ద్వే ఖన్ధే…పే… అహేతుకపటిసన్ధిక్ఖణే…పే… ఉద్ధచ్చసహగతే ఖన్ధే సంసట్ఠో ఉద్ధచ్చసహగతో మోహో. (౧)

నహేతుయా ద్వే, నఅధిపతియా ఛ, నపురేజాతే ఛ, నపచ్ఛాజాతే ఛ, నఆసేవనే ఛ, నకమ్మే చత్తారి, నవిపాకే ఛ, నఝానే ఏకం, నమగ్గే ఏకం, నవిప్పయుత్తే ఛ.

పచ్చనీయం.

హేతుదుకం

హేతుపచ్చయా నఅధిపతియా చత్తారి, నపురేజాతే చత్తారి…పే… నవిప్పయుత్తే చత్తారి.

నహేతుదుకం

నహేతుపచ్చయా ఆరమ్మణే ద్వే, అనన్తరే ద్వే…పే… విపాకే ఏకం…పే… అవిగతే ద్వే.