౧. విభఙ్గవారో
హేతుపచ్చయో
౧౩. దస్సనేన పహాతబ్బో ధమ్మో దస్సనేన పహాతబ్బస్స ధమ్మస్స హేతుపచ్చయేన పచ్చయో… తీణి.
నదస్సనేన పహాతబ్బో ధమ్మో నదస్సనేన పహాతబ్బస్స ధమ్మస్స హేతుపచ్చయేన పచ్చయో – నదస్సనేన పహాతబ్బా హేతూ సమ్పయుత్తకానం ఖన్ధానం చిత్తసముట్ఠానానఞ్చ రూపానం హేతుపచ్చయేన పచ్చయో; పటిసన్ధిక్ఖణే…పే…. (౧)
ఆరమ్మణపచ్చయో
౧౪. దస్సనేన పహాతబ్బో ధమ్మో దస్సనేన పహాతబ్బస్స ధమ్మస్స ఆరమ్మణపచ్చయేన పచ్చయో – దస్సనేన పహాతబ్బం రాగం అస్సాదేతి అభినన్దతి, తం ఆరబ్భ దస్సనేన పహాతబ్బో రాగో ఉప్పజ్జతి, దిట్ఠి…పే… విచికిచ్ఛా ఉప్పజ్జతి, దస్సనేన పహాతబ్బం దోమనస్సం ఉప్పజ్జతి; దస్సనేన పహాతబ్బం దిట్ఠిం అస్సాదేతి అభినన్దతి, తం ఆరబ్భ దస్సనేన పహాతబ్బో రాగో ఉప్పజ్జతి, దిట్ఠి…పే… విచికిచ్ఛా…పే… దోమనస్సం ఉప్పజ్జతి; విచికిచ్ఛం ఆరబ్భ విచికిచ్ఛా ఉప్పజ్జతి, దిట్ఠి…పే… దోమనస్సం ఉప్పజ్జతి; దస్సనేన పహాతబ్బం దోమనస్సం ఆరబ్భ దస్సనేన పహాతబ్బం దోమనస్సం ఉప్పజ్జతి, దిట్ఠి ఉప్పజ్జతి, విచికిచ్ఛా ఉప్పజ్జతి. (౧)
దస్సనేన పహాతబ్బో ధమ్మో నదస్సనేన పహాతబ్బస్స ధమ్మస్స ఆరమ్మణపచ్చయేన పచ్చయో – అరియా దస్సనేన పహాతబ్బే పహీనే కిలేసే పచ్చవేక్ఖన్తి, పుబ్బే సముదాచిణ్ణే…పే… దస్సనేన పహాతబ్బే ఖన్ధే అనిచ్చతో…పే… విపస్సతి, చేతోపరియఞాణేన దస్సనేన పహాతబ్బచిత్తసమఙ్గిస్స చిత్తం జానాతి, దస్సనేన పహాతబ్బా ఖన్ధా చేతోపరియఞాణస్స, పుబ్బేనివాసానుస్సతిఞాణస్స, యథాకమ్మూపగఞాణస్స, అనాగతంసఞాణస్స, ఆవజ్జనాయ ఆరమ్మణపచ్చయేన పచ్చయో. (౨)
౧౫. నదస్సనేన పహాతబ్బో ధమ్మో నదస్సనేన పహాతబ్బస్స ధమ్మస్స ఆరమ్మణపచ్చయేన పచ్చయో – దానం…పే… సీలం…పే… ఉపోసథకమ్మం కత్వా తం పచ్చవేక్ఖతి అస్సాదేతి అభినన్దతి, తం ఆరబ్భ నదస్సనేన పహాతబ్బో రాగో ఉప్పజ్జతి; ఉద్ధచ్చం…పే… నదస్సనేన పహాతబ్బం దోమనస్సం ఉప్పజ్జతి, పుబ్బే సుచిణ్ణాని…పే… ఝానా …పే… అరియా మగ్గా వుట్ఠహిత్వా మగ్గం పచ్చవేక్ఖన్తి…పే… ఫలస్స ఆవజ్జనాయ ఆరమ్మణపచ్చయేన పచ్చయో; అరియా నదస్సనేన పహాతబ్బే పహీనే కిలేసే పచ్చవేక్ఖన్తి, విక్ఖమ్భితే కిలేసే…పే… పుబ్బే…పే… చక్ఖుం…పే… వత్థుం నదస్సనేన పహాతబ్బే ఖన్ధే అనిచ్చతో…పే… విపస్సతి అస్సాదేతి అభినన్దతి, తం ఆరబ్భ నదస్సనేన పహాతబ్బో రాగో ఉప్పజ్జతి, ఉద్ధచ్చం…పే… నదస్సనేన పహాతబ్బం దోమనస్సం ఉప్పజ్జతి; దిబ్బేన చక్ఖునా రూపం పస్సతి…పే… అనాగతంసఞాణస్స, ఆవజ్జనాయ ఆరమ్మణపచ్చయేన పచ్చయో. (౧)
నదస్సనేన పహాతబ్బో ధమ్మో దస్సనేన పహాతబ్బస్స ధమ్మస్స ఆరమ్మణపచ్చయేన పచ్చయో – దానం…పే… సీలం…పే… ఉపోసథకమ్మం…పే… పుబ్బే…పే… ఝానా…పే… చక్ఖుం …పే… వత్థుం నదస్సనేన పహాతబ్బే ఖన్ధే అస్సాదేతి అభినన్దతి, తం ఆరబ్భ దస్సనేన పహాతబ్బో రాగో ఉప్పజ్జతి, దిట్ఠి…పే… విచికిచ్ఛా…పే… దస్సనేన పహాతబ్బం దోమనస్సం ఉప్పజ్జతి. (౨)
అధిపతిపచ్చయో
౧౬. దస్సనేన పహాతబ్బో ధమ్మో దస్సనేన పహాతబ్బస్స ధమ్మస్స అధిపతిపచ్చయేన పచ్చయో – ఆరమ్మణాధిపతి, సహజాతాధిపతి. ఆరమ్మణాధిపతి – దస్సనేన పహాతబ్బం రాగం గరుం కత్వా అస్సాదేతి అభినన్దతి, తం గరుం కత్వా దస్సనేన పహాతబ్బో రాగో ఉప్పజ్జతి, దిట్ఠి ఉప్పజ్జతి, దిట్ఠిం గరుం కత్వా…పే…. సహజాతాధిపతి – దస్సనేన పహాతబ్బాధిపతి సమ్పయుత్తకానం ఖన్ధానం అధిపతిపచ్చయేన పచ్చయో. (౧)
దస్సనేన పహాతబ్బో ధమ్మో నదస్సనేన పహాతబ్బస్స ధమ్మస్స అధిపతిపచ్చయేన పచ్చయో. సహజాతాధిపతి – దస్సనేన పహాతబ్బాధిపతి చిత్తసముట్ఠానానం రూపానం అధిపతిపచ్చయేన పచ్చయో. (౨)
దస్సనేన పహాతబ్బో ధమ్మో దస్సనేన పహాతబ్బస్స చ నదస్సనేన పహాతబ్బస్స చ ధమ్మస్స అధిపతిపచ్చయేన పచ్చయో. సహజాతాధిపతి – దస్సనేన పహాతబ్బాధిపతి సమ్పయుత్తకానం ఖన్ధానం చిత్తసముట్ఠానానఞ్చ రూపానం అధిపతిపచ్చయేన పచ్చయో. (౩)
౧౭. నదస్సనేన పహాతబ్బో ధమ్మో నదస్సనేన పహాతబ్బస్స ధమ్మస్స అధిపతిపచ్చయేన పచ్చయో – ఆరమ్మణాధిపతి, సహజాతాధిపతి. ఆరమ్మణాధిపతి – దానం…పే… సీలం…పే… ఉపోసథకమ్మం…పే… పుబ్బే…పే… ఝానా వుట్ఠహిత్వా ఝానం గరుం కత్వా పచ్చవేక్ఖతి, అస్సాదేతి అభినన్దతి, తం గరుం కత్వా నదస్సనేన పహాతబ్బో రాగో ఉప్పజ్జతి, అరియా మగ్గా వుట్ఠహిత్వా మగ్గం గరుం కత్వా…పే… ఫలస్స అధిపతిపచ్చయేన పచ్చయో; చక్ఖుం…పే… వత్థుం నదస్సనేన పహాతబ్బే ఖన్ధే గరుం కత్వా అస్సాదేతి అభినన్దతి, తం గరుం కత్వా నదస్సనేన పహాతబ్బో రాగో ఉప్పజ్జతి. సహజాతాధిపతి – నదస్సనేన పహాతబ్బాధిపతి సమ్పయుత్తకానం ఖన్ధానం చిత్తసముట్ఠానానఞ్చ రూపానం అధిపతిపచ్చయేన పచ్చయో. (౧)
నదస్సనేన పహాతబ్బో ధమ్మో దస్సనేన పహాతబ్బస్స ధమ్మస్స అధిపతిపచ్చయేన పచ్చయో. ఆరమ్మణాధిపతి – దానం దత్వా…పే… ఝానం…పే… చక్ఖుం…పే… వత్థుం నదస్సనేన పహాతబ్బే ఖన్ధే గరుం కత్వా అస్సాదేతి అభినన్దతి, తం గరుం కత్వా దస్సనేన పహాతబ్బో రాగో ఉప్పజ్జతి, దిట్ఠి ఉప్పజ్జతి. (౨)
అనన్తరపచ్చయో
౧౮. దస్సనేన పహాతబ్బో ధమ్మో దస్సనేన పహాతబ్బస్స ధమ్మస్స అనన్తరపచ్చయేన పచ్చయో – పురిమా పురిమా దస్సనేన పహాతబ్బా ఖన్ధా పచ్ఛిమానం పచ్ఛిమానం దస్సనేన పహాతబ్బానం ఖన్ధానం అనన్తరపచ్చయేన పచ్చయో. (౧)
దస్సనేన పహాతబ్బో ధమ్మో నదస్సనేన పహాతబ్బస్స ధమ్మస్స అనన్తరపచ్చయేన పచ్చయో – దస్సనేన పహాతబ్బా ఖన్ధా వుట్ఠానస్స అనన్తరపచ్చయేన పచ్చయో. (మూలం కాతబ్బం.) పురిమా పురిమా నదస్సనేన పహాతబ్బా ఖన్ధా…పే… ఫలసమాపత్తియా అనన్తరపచ్చయేన పచ్చయో. (మూలం కాతబ్బం.) ఆవజ్జనా దస్సనేన పహాతబ్బానం ఖన్ధానం అనన్తరపచ్చయేన పచ్చయో. (౨)
సమనన్తరపచ్చయేన పచ్చయో… సహజాతపచ్చయేన పచ్చయో… పఞ్చ… అఞ్ఞమఞ్ఞపచ్చయేన పచ్చయో… ద్వే… నిస్సయపచ్చయేన పచ్చయో… సత్త.
ఉపనిస్సయపచ్చయో
౧౯. దస్సనేన పహాతబ్బో ధమ్మో దస్సనేన పహాతబ్బస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – దస్సనేన పహాతబ్బం రాగం ఉపనిస్సాయ పాణం హనతి…పే… సఙ్ఘం భిన్దతి; దస్సనేన పహాతబ్బం దోసం… మోహం… దిట్ఠిం… పత్థనం ఉపనిస్సాయ పాణం హనతి…పే… సఙ్ఘం భిన్దతి; దస్సనేన పహాతబ్బో రాగో…పే… పత్థనా దస్సనేన పహాతబ్బస్స రాగస్స…పే… పత్థనాయ ఉపనిస్సయపచ్చయేన పచ్చయో. (౨)
దస్సనేన పహాతబ్బో ధమ్మో నదస్సనేన పహాతబ్బస్స ధమ్మస్స ఉపనిస్సయపచ్చయేన పచ్చయో – అనన్తరూపనిస్సయో, పకతూపనిస్సయో…పే…. పకతూపనిస్సయో – దస్సనేన పహాతబ్బం రాగం ఉపనిస్సాయ దానం దేతి…పే… సమాపత్తిం ఉప్పాదేతి దస్సనేన పహాతబ్బం దోసం… మోహం… దిట్ఠిం… పత్థనం ఉపనిస్సాయ దానం దేతి…పే… సమాపత్తిం ఉప్పాదేతి; దస్సనేన పహాతబ్బో రాగో…పే… పత్థనా సద్ధాయ…పే… పఞ్ఞాయ నదస్సనేన పహాతబ్బస్స రాగస్స… దోసస్స… మోహస్స… మానస్స … పత్థనాయ… కాయికస్స సుఖస్స…పే… ఫలసమాపత్తియా ఉపనిస్సయపచ్చయేన పచ్చయో. (౨)
౨౦. నదస్సనేన పహాతబ్బో ధమ్మో నదస్సనేన పహాతబ్బస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – సద్ధం ఉపనిస్సాయ దానం దేతి…పే… సమాపత్తిం ఉప్పాదేతి, మానం జప్పేతి; సీలం…పే… పఞ్ఞం, నదస్సనేన పహాతబ్బం రాగం… దోసం… మోహం… మానం… పత్థనం… కాయికం సుఖం…పే… సేనాసనం ఉపనిస్సాయ దానం దేతి…పే… సమాపత్తిం ఉప్పాదేతి, మానం జప్పేతి; సద్ధా…పే… పఞ్ఞా, నదస్సనేన పహాతబ్బో రాగో…పే… పత్థనా… కాయికం సుఖం…పే… సేనాసనం సద్ధాయ…పే… పఞ్ఞాయ నదస్సనేన పహాతబ్బస్స రాగస్స…పే… పత్థనాయ… కాయికస్స సుఖస్స… కాయికస్స దుక్ఖస్స… మగ్గస్స, ఫలసమాపత్తియా ఉపనిస్సయపచ్చయేన పచ్చయో. (౨)
నదస్సనేన పహాతబ్బో ధమ్మో దస్సనేన పహాతబ్బస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – సద్ధం ఉపనిస్సాయ దిట్ఠిం గణ్హాతి; సీలం…పే… పఞ్ఞం ఉపనిస్సాయ దిట్ఠిం గణ్హాతి, నదస్సనేన పహాతబ్బం రాగం… దోసం… మోహం… మానం… పత్థనం… కాయికం సుఖం…పే… సేనాసనం ఉపనిస్సాయ పాణం హనతి…పే… సఙ్ఘం భిన్దతి; సద్ధా…పే… సేనాసనం దస్సనేన పహాతబ్బస్స రాగస్స… దోసస్స… మోహస్స… దిట్ఠియా… పత్థనాయ ఉపనిస్సయపచ్చయేన పచ్చయో. (౨)
పురేజాతపచ్చయో
౨౧. నదస్సనేన పహాతబ్బో ధమ్మో నదస్సనేన పహాతబ్బస్స ధమ్మస్స పురేజాతపచ్చయేన పచ్చయో – ఆరమ్మణపురేజాతం, వత్థుపురేజాతం. ఆరమ్మణపురేజాతం – చక్ఖుం…పే… వత్థుం అనిచ్చతో…పే… విపస్సతి అస్సాదేతి అభినన్దతి, తం ఆరబ్భ నదస్సనేన పహాతబ్బో రాగో …పే… ఉద్ధచ్చం…పే… నదస్సనేన పహాతబ్బం దోమనస్సం ఉప్పజ్జతి; దిబ్బేన చక్ఖునా రూపం పస్సతి, దిబ్బాయ సోతధాతుయా సద్దం సుణాతి. రూపాయతనం చక్ఖువిఞ్ఞాణస్స…పే… ఫోట్ఠబ్బాయతనం కాయవిఞ్ఞాణస్స…పే…. వత్థుపురేజాతం – చక్ఖాయతనం చక్ఖువిఞ్ఞాణస్స …పే… కాయాయతనం కాయవిఞ్ఞాణస్స…పే… వత్థు నదస్సనేన పహాతబ్బానం ఖన్ధానం పురేజాతపచ్చయేన పచ్చయో. (౧)
నదస్సనేన పహాతబ్బో ధమ్మో దస్సనేన పహాతబ్బస్స ధమ్మస్స పురేజాతపచ్చయేన పచ్చయో – ఆరమ్మణపురేజాతం, వత్థుపురేజాతం. ఆరమ్మణపురేజాతం – చక్ఖుం…పే… వత్థుం అస్సాదేతి అభినన్దతి, తం ఆరబ్భ దస్సనేన పహాతబ్బో రాగో…పే… దిట్ఠి…పే… విచికిచ్ఛా…పే… దస్సనేన పహాతబ్బం దోమనస్సం ఉప్పజ్జతి. వత్థుపురేజాతం – వత్థు దస్సనేన పహాతబ్బానం ఖన్ధానం పురేజాతపచ్చయేన పచ్చయో. (౨)
పచ్ఛాజాతాసేవనపచ్చయా
౨౨. దస్సనేన పహాతబ్బో ధమ్మో నదస్సనేన పహాతబ్బస్స ధమ్మస్స పచ్ఛాజాతపచ్చయేన పచ్చయో (సంఖిత్తం). (౧)
నదస్సనేన పహాతబ్బో ధమ్మో నదస్సనేన పహాతబ్బస్స ధమ్మస్స పచ్ఛాజాతపచ్చయేన పచ్చయో (సంఖిత్తం)… ఆసేవనపచ్చయేన పచ్చయో… ద్వే.
కమ్మపచ్చయో
౨౩. దస్సనేన పహాతబ్బో ధమ్మో దస్సనేన పహాతబ్బస్స ధమ్మస్స కమ్మపచ్చయేన పచ్చయో – దస్సనేన పహాతబ్బా చేతనా సమ్పయుత్తకానం ఖన్ధానం కమ్మపచ్చయేన పచ్చయో. (౧)
దస్సనేన పహాతబ్బో ధమ్మో నదస్సనేన పహాతబ్బస్స ధమ్మస్స కమ్మపచ్చయేన పచ్చయో – సహజాతా, నానాక్ఖణికా. సహజాతా – దస్సనేన పహాతబ్బా చేతనా చిత్తసముట్ఠానానం రూపానం కమ్మపచ్చయేన పచ్చయో. నానాక్ఖణికా – దస్సనేన పహాతబ్బా చేతనా విపాకానం ఖన్ధానం కటత్తా చ రూపానం కమ్మపచ్చయేన పచ్చయో. (౨)
దస్సనేన పహాతబ్బో ధమ్మో దస్సనేన పహాతబ్బస్స చ నదస్సనేన పహాతబ్బస్స చ ధమ్మస్స కమ్మపచ్చయేన పచ్చయో – దస్సనేన పహాతబ్బా చేతనా సమ్పయుత్తకానం ఖన్ధానం చిత్తసముట్ఠానానఞ్చ రూపానం కమ్మపచ్చయేన పచ్చయో. (౩)
౨౪. నదస్సనేన పహాతబ్బో ధమ్మో నదస్సనేన పహాతబ్బస్స ధమ్మస్స కమ్మపచ్చయేన పచ్చయో – సహజాతా, నానాక్ఖణికా. సహజాతా – నదస్సనేన పహాతబ్బా చేతనా సమ్పయుత్తకానం ఖన్ధానం చిత్తసముట్ఠానానఞ్చ రూపానం కమ్మపచ్చయేన పచ్చయో; పటిసన్ధిక్ఖణే…పే…. నానాక్ఖణికా – నదస్సనేన పహాతబ్బా చేతనా విపాకానం ఖన్ధానం కటత్తా చ రూపానం కమ్మపచ్చయేన పచ్చయో.
విపాకపచ్చయాది
౨౫. నదస్సనేన పహాతబ్బో ధమ్మో నదస్సనేన పహాతబ్బస్స ధమ్మస్స విపాకపచ్చయేన పచ్చయో… ఏకం… ఆహారపచ్చయేన పచ్చయో… చత్తారి… ఇన్ద్రియపచ్చయేన పచ్చయో… చత్తారి… ఝానపచ్చయేన పచ్చయో… చత్తారి… మగ్గపచ్చయేన పచ్చయో… చత్తారి… సమ్పయుత్తపచ్చయేన పచ్చయో… ద్వే.
విప్పయుత్తపచ్చయో
౨౬. దస్సనేన పహాతబ్బో ధమ్మో నదస్సనేన పహాతబ్బస్స ధమ్మస్స విప్పయుత్తపచ్చయేన పచ్చయో – సహజాతం, పచ్ఛాజాతం (సంఖిత్తం). (౧)
నదస్సనేన పహాతబ్బో ధమ్మో నదస్సనేన పహాతబ్బస్స ధమ్మస్స విప్పయుత్తపచ్చయేన పచ్చయో – సహజాతం, పురేజాతం, పచ్ఛాజాతం (సంఖిత్తం).
నదస్సనేన పహాతబ్బో ధమ్మో దస్సనేన పహాతబ్బస్స ధమ్మస్స విప్పయుత్తపచ్చయేన పచ్చయో. పురేజాతం – వత్థు దస్సనేన పహాతబ్బానం ఖన్ధానం విప్పయుత్తపచ్చయేన పచ్చయో. (౨)
అత్థిపచ్చయాది
౨౭. దస్సనేన పహాతబ్బో ధమ్మో దస్సనేన పహాతబ్బస్స ధమ్మస్స అత్థిపచ్చయేన పచ్చయో (పటిచ్చసదిసం). దస్సనేన పహాతబ్బో ధమ్మో నదస్సనేన పహాతబ్బస్స ధమ్మస్స అత్థిపచ్చయేన పచ్చయో – సహజాతం, పచ్ఛాజాతం (సంఖిత్తం). దస్సనేన పహాతబ్బో ధమ్మో దస్సనేన పహాతబ్బస్స చ నదస్సనేన పహాతబ్బస్స చ ధమ్మస్స అత్థిపచ్చయేన పచ్చయో (పటిచ్చవారసదిసా). (౩)
నదస్సనేన పహాతబ్బో ధమ్మో నదస్సనేన పహాతబ్బస్స ధమ్మస్స అత్థిపచ్చయేన పచ్చయో – సహజాతం, పురేజాతం, పచ్ఛాజాతం, ఆహారం, ఇన్ద్రియం (సంఖిత్తం). నదస్సనేన పహాతబ్బో ధమ్మో దస్సనేన పహాతబ్బస్స ధమ్మస్స అత్థిపచ్చయేన పచ్చయో. పురేజాతం – చక్ఖుం…పే… (సంఖిత్తం, పురేజాతసదిసం). (౨)
౨౮. దస్సనేన పహాతబ్బో చ నదస్సనేన పహాతబ్బో చ ధమ్మా దస్సనేన పహాతబ్బస్స ధమ్మస్స అత్థిపచ్చయేన పచ్చయో – సహజాతం, పురేజాతం. సహజాతో – దస్సనేన పహాతబ్బో ఏకో ఖన్ధో చ వత్థు చ తిణ్ణన్నం ఖన్ధానం అత్థిపచ్చయేన పచ్చయో…పే… ద్వే ఖన్ధా చ…పే…. (౧)
దస్సనేన పహాతబ్బో చ నదస్సనేన పహాతబ్బో చ ధమ్మా నదస్సనేన పహాతబ్బస్స ధమ్మస్స అత్థిపచ్చయేన పచ్చయో – సహజాతం, పచ్ఛాజాతం, ఆహారం, ఇన్ద్రియం. సహజాతా – దస్సనేన పహాతబ్బా ఖన్ధా చ మహాభూతా చ చిత్తసముట్ఠానానం రూపానం అత్థిపచ్చయేన పచ్చయో. పచ్ఛాజాతా – దస్సనేన పహాతబ్బా ఖన్ధా చ కబళీకారో ఆహారో చ ఇమస్స కాయస్స అత్థిపచ్చయేన పచ్చయో. పచ్ఛాజాతా – దస్సనేన పహాతబ్బా ఖన్ధా చ రూపజీవితిన్ద్రియఞ్చ కటత్తారూపానం అత్థిపచ్చయేన పచ్చయో. (౨)
నత్థిపచ్చయేన పచ్చయో, విగతపచ్చయేన పచ్చయో, అవిగతపచ్చయేన పచ్చయో.