౧-౭. పటిచ్చవారాది

పచ్చయచతుక్కం

హేతుపచ్చయో

౨౧౮. అతీతారమ్మణం నహేతుం ధమ్మం పటిచ్చ అతీతారమ్మణో నహేతు ధమ్మో ఉప్పజ్జతి హేతుపచ్చయా. (౧)

అనాగతారమ్మణం నహేతుం ధమ్మం పటిచ్చ అనాగతారమ్మణో నహేతు ధమ్మో ఉప్పజ్జతి హేతుపచ్చయా. (౧)

పచ్చుప్పన్నారమ్మణం నహేతుం ధమ్మం పటిచ్చ పచ్చుప్పన్నారమ్మణో నహేతు ధమ్మో ఉప్పజ్జతి హేతుపచ్చయా. (౧) (సంఖిత్తం.)

౨౧౯. హేతుయా తీణి, ఆరమ్మణే తీణి, అధిపతియా తీణి…పే… అవిగతే తీణి (సంఖిత్తం).

నహేతుయా తీణి, నఅధిపతియా తీణి, నపురేజాతే తీణి, నపచ్ఛాజాతే తీణి, నఆసేవనే తీణి, నకమ్మే తీణి, నవిపాకే తీణి, నఝానే ఏకం, నమగ్గే తీణి, నవిప్పయుత్తే ద్వే (సంఖిత్తం).

(సహజాతవారమ్పి…పే… సమ్పయుత్తవారమ్పి పటిచ్చవారసదిసం విత్థారేతబ్బం.)

ఆరమ్మణపచ్చయో

౨౨౦. అతీతారమ్మణో నహేతు ధమ్మో అతీతారమ్మణస్స నహేతుస్స ధమ్మస్స ఆరమ్మణపచ్చయేన పచ్చయో… తీణి.

అనాగతారమ్మణో నహేతు ధమ్మో అనాగతారమ్మణస్స నహేతుస్స ధమ్మస్స ఆరమ్మణపచ్చయేన పచ్చయో… తీణి.

పచ్చుప్పన్నారమ్మణో నహేతు ధమ్మో పచ్చుప్పన్నారమ్మణస్స నహేతుస్స ధమ్మస్స ఆరమ్మణపచ్చయేన పచ్చయో… తీణి (సంఖిత్తం).

౨౨౧. ఆరమ్మణే నవ, అధిపతియా సత్త…పే… అవిగతే తీణి (సంఖిత్తం).

నహేతుయా నవ, నఆరమ్మణే నవ (సంఖిత్తం).

ఆరమ్మణపచ్చయా నహేతుయా నవ (సంఖిత్తం).

నహేతుపచ్చయా ఆరమ్మణే నవ (సంఖిత్తం).

(యథా కుసలత్తికే పఞ్హావారం, ఏవం విత్థారేతబ్బం.)