౭. పఞ్హావారో

పచ్చయచతుక్కం

ఆరమ్మణపచ్చయాది

౨౦. కుసలో నహేతు ధమ్మో కుసలస్స నహేతుస్స ధమ్మస్స ఆరమ్మణపచ్చయేన పచ్చయో. కుసలో నహేతు ధమ్మో అకుసలస్స నహేతుస్స ధమ్మస్స ఆరమ్మణపచ్చయేన పచ్చయో. కుసలో నహేతు ధమ్మో అబ్యాకతస్స నహేతుస్స ధమ్మస్స ఆరమ్మణపచ్చయేన పచ్చయో. (౩)

అకుసలో నహేతు ధమ్మో అకుసలస్స నహేతుస్స ధమ్మస్స ఆరమ్మణపచ్చయేన పచ్చయో. అకుసలో నహేతు ధమ్మో కుసలస్స నహేతుస్స ధమ్మస్స ఆరమ్మణపచ్చయేన పచ్చయో. అకుసలో నహేతు ధమ్మో అబ్యాకతస్స నహేతుస్స ధమ్మస్స ఆరమ్మణపచ్చయేన పచ్చయో. (౩)

అబ్యాకతో నహేతు ధమ్మో అబ్యాకతస్స నహేతుస్స ధమ్మస్స ఆరమ్మణపచ్చయేన పచ్చయో. అబ్యాకతో నహేతు ధమ్మో కుసలస్స నహేతుస్స ధమ్మస్స ఆరమ్మణపచ్చయేన పచ్చయో. అబ్యాకతో నహేతు ధమ్మో అకుసలస్స నహేతుస్స ధమ్మస్స ఆరమ్మణపచ్చయేన పచ్చయో. (౩)

౨౧. కుసలో నహేతు ధమ్మో కుసలస్స నహేతుస్స ధమ్మస్స అధిపతిపచ్చయేన పచ్చయో. కుసలో నహేతు ధమ్మో అకుసలస్స నహేతుస్స ధమ్మస్స అధిపతిపచ్చయేన పచ్చయో. కుసలో నహేతు ధమ్మో అబ్యాకతస్స నహేతుస్స ధమ్మస్స అధిపతిపచ్చయేన పచ్చయో. కుసలో నహేతు ధమ్మో కుసలస్స నహేతుస్స చ అబ్యాకతస్స నహేతుస్స చ ధమ్మస్స అధిపతిపచ్చయేన పచ్చయో… చత్తారి.

అకుసలో నహేతు ధమ్మో అకుసలస్స నహేతుస్స ధమ్మస్స అధిపతిపచ్చయేన పచ్చయో… తీణి.

అబ్యాకతో నహేతు ధమ్మో అబ్యాకతస్స నహేతుస్స ధమ్మస్స అధిపతిపచ్చయేన పచ్చయో. అబ్యాకతో నహేతు ధమ్మో కుసలస్స నహేతుస్స ధమ్మస్స అధిపతిపచ్చయేన పచ్చయో… తీణి.

౨౨. కుసలో నహేతు ధమ్మో కుసలస్స నహేతుస్స ధమ్మస్స అనన్తరపచ్చయేన పచ్చయో. కుసలో నహేతు ధమ్మో అబ్యాకతస్స నహేతుస్స ధమ్మస్స అనన్తరపచ్చయేన పచ్చయో. (౨)

అకుసలో నహేతు ధమ్మో అకుసలస్స నహేతుస్స ధమ్మస్స అనన్తరపచ్చయేన పచ్చయో. అకుసలో నహేతు ధమ్మో అబ్యాకతస్స నహేతుస్స ధమ్మస్స అనన్తరపచ్చయేన పచ్చయో. (౨)

అబ్యాకతో నహేతు ధమ్మో అబ్యాకతస్స నహేతుస్స ధమ్మస్స అనన్తరపచ్చయేన పచ్చయో… తీణి…పే….

ఉపనిస్సయపచ్చయో

౨౩. కుసలో నహేతు ధమ్మో కుసలస్స నహేతుస్స ధమ్మస్స ఉపనిస్సయపచ్చయేన పచ్చయో. కుసలో నహేతు ధమ్మో అకుసలస్స నహేతుస్స ధమ్మస్స ఉపనిస్సయపచ్చయేన పచ్చయో. కుసలో నహేతు ధమ్మో అబ్యాకతస్స నహేతుస్స ధమ్మస్స ఉపనిస్సయపచ్చయేన పచ్చయో. (౩)

అకుసలో నహేతు ధమ్మో అకుసలస్స నహేతుస్స ధమ్మస్స ఉపనిస్సయపచ్చయేన పచ్చయో. అకుసలో నహేతు ధమ్మో కుసలస్స నహేతుస్స ధమ్మస్స ఉపనిస్సయపచ్చయేన పచ్చయో. అకుసలో నహేతు ధమ్మో అబ్యాకతస్స నహేతుస్స ధమ్మస్స ఉపనిస్సయపచ్చయేన పచ్చయో. (౩)

అబ్యాకతో నహేతు ధమ్మో అబ్యాకతస్స నహేతుస్స ధమ్మస్స ఉపనిస్సయపచ్చయేన పచ్చయో. అబ్యాకతో నహేతు ధమ్మో కుసలస్స నహేతుస్స ధమ్మస్స ఉపనిస్సయపచ్చయేన పచ్చయో. అబ్యాకతో నహేతు ధమ్మో అకుసలస్స నహేతుస్స ధమ్మస్స ఉపనిస్సయపచ్చయేన పచ్చయో. (౩) (సంఖిత్తం.)

౨౪. ఆరమ్మణే నవ, అధిపతియా దస, అనన్తరే సత్త, సమనన్తరే సత్త, సహజాతే నవ, అఞ్ఞమఞ్ఞే తీణి, నిస్సయే తేరస, ఉపనిస్సయే నవ, పురేజాతే తీణి, పచ్ఛాజాతే తీణి, ఆసేవనే తీణి, కమ్మే సత్త, విపాకే ఏకం, ఆహారే సత్త, ఇన్ద్రియే సత్త, ఝానే సత్త, మగ్గే సత్త, సమ్పయుత్తే తీణి, విప్పయుత్తే పఞ్చ, అత్థియా తేరస, నత్థియా సత్త, విగతే సత్త, అవిగతే తేరస (సంఖిత్తం).

నహేతుయా పన్నరస, నఆరమ్మణే పన్నరస (సంఖిత్తం).

ఆరమ్మణపచ్చయా నహేతుయా నవ (సంఖిత్తం).

నహేతుపచ్చయా ఆరమ్మణే నవ (సంఖిత్తం).

(యథా కుసలత్తికే పఞ్హావారం, ఏవం విత్థారేతబ్బం.)