౧-౭. పటిచ్చవారాది
పచ్చయచతుక్కం
౧౧౪. దస్సనేన పహాతబ్బం హేతుం ధమ్మం పటిచ్చ దస్సనేన పహాతబ్బో హేతు ధమ్మో ఉప్పజ్జతి హేతుపచ్చయా. (౧)
భావనాయ పహాతబ్బం హేతుం ధమ్మం పటిచ్చ భావనాయ పహాతబ్బో హేతు ధమ్మో ఉప్పజ్జతి హేతుపచ్చయా. (౧)
నేవదస్సనేన నభావనాయ పహాతబ్బం హేతుం ధమ్మం పటిచ్చ నేవదస్సనేన నభావనాయ పహాతబ్బో హేతు ధమ్మో ఉప్పజ్జతి హేతుపచ్చయా (సంఖిత్తం).
౧౧౫. హేతుయా తీణి (సబ్బత్థ తీణి), విపాకే ఏకం…పే… అవిగతే తీణి.
నఅధిపతియా తీణి, నపురేజాతే తీణి…పే… నవిప్పయుత్తే తీణి (సంఖిత్తం. సహజాతవారమ్పి…పే… సమ్పయుత్తవారమ్పి విత్థారేతబ్బం).
౧౧౬. దస్సనేన పహాతబ్బో హేతు ధమ్మో దస్సనేన పహాతబ్బస్స హేతుస్స ధమ్మస్స హేతుపచ్చయేన పచ్చయో… తీణి.
దస్సనేన పహాతబ్బో హేతు ధమ్మో దస్సనేన పహాతబ్బస్స హేతుస్స ధమ్మస్స ఆరమ్మణపచ్చయేన పచ్చయో (సంఖిత్తం).
౧౧౭. హేతుయా తీణి, ఆరమ్మణే అట్ఠ, అధిపతియా ఛ, అనన్తరే పఞ్చ, సమనన్తరే పఞ్చ, సహజాతే తీణి, అఞ్ఞమఞ్ఞే తీణి, నిస్సయే తీణి, ఉపనిస్సయే అట్ఠ, ఆసేవనే తీణి, విపాకే ఏకం, ఇన్ద్రియే ఏకం, మగ్గే ఏకం…పే… అవిగతే తీణి (సంఖిత్తం).
నహేతుయా అట్ఠ, నఆరమ్మణే అట్ఠ (సంఖిత్తం).
హేతుపచ్చయా నఆరమ్మణే తీణి (సంఖిత్తం).
నహేతుపచ్చయా ఆరమ్మణే అట్ఠ (సంఖిత్తం).
(యథా కుసలత్తికే పఞ్హావారం, ఏవం విత్థారేతబ్బం.)