౭. పఞ్హావారో

పచ్చయచతుక్కం

ఆరమ్మణపచ్చయో

౯౪. సవితక్కసవిచారో నహేతు ధమ్మో సవితక్కసవిచారస్స నహేతుస్స ధమ్మస్స ఆరమ్మణపచ్చయేన పచ్చయో. సవితక్కసవిచారో నహేతు ధమ్మో అవితక్కవిచారమత్తస్స నహేతుస్స ధమ్మస్స ఆరమ్మణపచ్చయేన పచ్చయో. సవితక్కసవిచారో నహేతు ధమ్మో అవితక్కఅవిచారస్స నహేతుస్స ధమ్మస్స ఆరమ్మణపచ్చయేన పచ్చయో. సవితక్కసవిచారో నహేతు ధమ్మో సవితక్కసవిచారస్స నహేతుస్స చ అవితక్కవిచారమత్తస్స నహేతుస్స చ ధమ్మస్స ఆరమ్మణపచ్చయేన పచ్చయో… చత్తారి.

౯౫. అవితక్కవిచారమత్తో నహేతు ధమ్మో అవితక్కవిచారమత్తస్స నహేతుస్స ధమ్మస్స ఆరమ్మణపచ్చయేన పచ్చయో. అవితక్కవిచారమత్తో నహేతు ధమ్మో సవితక్కసవిచారస్స నహేతుస్స ధమ్మస్స ఆరమ్మణపచ్చయేన పచ్చయో. అవితక్కవిచారమత్తో నహేతు ధమ్మో అవితక్కఅవిచారస్స నహేతుస్స ధమ్మస్స ఆరమ్మణపచ్చయేన పచ్చయో. అవితక్కవిచారమత్తో నహేతు ధమ్మో సవితక్కసవిచారస్స నహేతుస్స చ అవితక్కవిచారమత్తస్స నహేతుస్స చ ధమ్మస్స ఆరమ్మణపచ్చయేన పచ్చయో… చత్తారి.

౯౬. అవితక్కఅవిచారో నహేతు ధమ్మో అవితక్కఅవిచారస్స నహేతుస్స ధమ్మస్స ఆరమ్మణపచ్చయేన పచ్చయో. అవితక్కఅవిచారో నహేతు ధమ్మో సవితక్కసవిచారస్స నహేతుస్స ధమ్మస్స ఆరమ్మణపచ్చయేన పచ్చయో. అవితక్కఅవిచారో నహేతు ధమ్మో అవితక్కవిచారమత్తస్స నహేతుస్స ధమ్మస్స ఆరమ్మణపచ్చయేన పచ్చయో. అవితక్కఅవిచారో నహేతు ధమ్మో అవితక్కవిచారమత్తస్స నహేతుస్స చ అవితక్కఅవిచారస్స నహేతుస్స చ ధమ్మస్స ఆరమ్మణపచ్చయేన పచ్చయో. అవితక్కఅవిచారో నహేతు ధమ్మో సవితక్కసవిచారస్స నహేతుస్స చ అవితక్కవిచారమత్తస్స నహేతుస్స చ ధమ్మస్స ఆరమ్మణపచ్చయేన పచ్చయో… పఞ్చ.

౯౭. అవితక్కవిచారమత్తో నహేతు చ అవితక్కఅవిచారో నహేతు చ ధమ్మా సవితక్కసవిచారస్స నహేతుస్స ధమ్మస్స ఆరమ్మణపచ్చయేన పచ్చయో. అవితక్కవిచారమత్తో నహేతు చ అవితక్కఅవిచారో నహేతు చ ధమ్మా అవితక్కవిచారమత్తస్స నహేతుస్స ధమ్మస్స ఆరమ్మణపచ్చయేన పచ్చయో. అవితక్కవిచారమత్తో నహేతు చ అవితక్కఅవిచారో నహేతు చ ధమ్మా అవితక్కఅవిచారస్స నహేతుస్స ధమ్మస్స ఆరమ్మణపచ్చయేన పచ్చయో. అవితక్కవిచారమత్తో నహేతు చ అవితక్కఅవిచారో నహేతు చ ధమ్మా సవితక్కసవిచారస్స నహేతుస్స చ అవితక్కవిచారమత్తస్స నహేతుస్స చ ధమ్మస్స ఆరమ్మణపచ్చయేన పచ్చయో… చత్తారి.

౯౮. సవితక్కసవిచారో నహేతు చ అవితక్కవిచారమత్తో నహేతు చ ధమ్మా సవితక్కసవిచారస్స నహేతుస్స ధమ్మస్స ఆరమ్మణపచ్చయేన పచ్చయో. సవితక్కసవిచారో నహేతు చ అవితక్కవిచారమత్తో నహేతు చ ధమ్మా అవితక్కవిచారమత్తస్స నహేతుస్స ధమ్మస్స ఆరమ్మణపచ్చయేన పచ్చయో. సవితక్కసవిచారో నహేతు చ అవితక్కవిచారమత్తో నహేతు చ ధమ్మా అవితక్కఅవిచారస్స నహేతుస్స ధమ్మస్స ఆరమ్మణపచ్చయేన పచ్చయో. సవితక్కసవిచారో నహేతు చ అవితక్కవిచారమత్తో నహేతు చ ధమ్మా సవితక్కసవిచారస్స నహేతుస్స చ అవితక్కవిచారమత్తస్స నహేతుస్స చ ధమ్మస్స ఆరమ్మణపచ్చయేన పచ్చయో… చత్తారి.

అధిపతిపచ్చయో

౯౯. సవితక్కసవిచారో నహేతు ధమ్మో సవితక్కసవిచారస్స నహేతుస్స ధమ్మస్స అధిపతిపచ్చయేన పచ్చయో… సత్త.

అవితక్కవిచారమత్తో నహేతు ధమ్మో అవితక్కవిచారమత్తస్స నహేతుస్స ధమ్మస్స అధిపతిపచ్చయేన పచ్చయో… పఞ్చ.

అవితక్కఅవిచారో నహేతు ధమ్మో అవితక్కఅవిచారస్స నహేతుస్స ధమ్మస్స అధిపతిపచ్చయేన పచ్చయో… పఞ్చ.

అవితక్కవిచారమత్తో నహేతు చ అవితక్కఅవిచారో నహేతు చ ధమ్మా సవితక్కసవిచారస్స నహేతుస్స ధమ్మస్స అధిపతిపచ్చయేన పచ్చయో… తీణి.

సవితక్కసవిచారో నహేతు చ అవితక్కవిచారమత్తో నహేతు చ ధమ్మా సవితక్కసవిచారస్స నహేతుస్స ధమ్మస్స అధిపతిపచ్చయేన పచ్చయో… తీణి.

అనన్తరపచ్చయాది

౧౦౦. సవితక్కసవిచారో నహేతు ధమ్మో సవితక్కసవిచారస్స నహేతుస్స ధమ్మస్స అనన్తరపచ్చయేన పచ్చయో…పే… సమనన్తరపచ్చయేన పచ్చయో.

సవితక్కసవిచారో నహేతు ధమ్మో సవితక్కసవిచారస్స నహేతుస్స ధమ్మస్స ఉపనిస్సయపచ్చయేన పచ్చయో (సంఖిత్తం).

౧౦౧. ఆరమ్మణే ఏకవీస, అధిపతియా తేవీస, అనన్తరే పఞ్చవీస, సమనన్తరే పఞ్చవీస, సహజాతే తింస, అఞ్ఞమఞ్ఞే అట్ఠవీస, నిస్సయే తింస, ఉపనిస్సయే పఞ్చవీస, పురేజాతే పఞ్చ, పచ్ఛాజాతే పఞ్చ, ఆసేవనే ఏకవీస, కమ్మే ఏకాదస, విపాకే ఏకవీస, ఆహారే ఏకాదస…పే… అవిగతే తింస (సంఖిత్తం).

నహేతుయా పఞ్చతింస, నఆరమ్మణే పఞ్చతింస, నఅధిపతియా పఞ్చతింస (సంఖిత్తం).

ఆరమ్మణపచ్చయా నహేతుయా ఏకవీస (సంఖిత్తం).

నహేతుపచ్చయా ఆరమ్మణే ఏకవీస (సంఖిత్తం).

(యథా కుసలత్తికే పఞ్హావారం, ఏవం విత్థారేతబ్బం.)